Pascal Schumacher

Pascal Schumacher
Pascal Schumacher
Gebuer	12. Mäerz 1979; Lëtzebuerg
Nationalitéit	Lëtzebuerg
Aktivitéit	Komponist, Bandleader, Jazzmuseker

De Pascal Schumacher gebuer den 12. Mäerz 1979, ass e lëtzebuergesche Museker, Komponist a Professer am Stater Conservatoire. Hien ass zënter dem Dezember 2018 Ambassadeur fir d'Hëllefsorganisatioun SOS-Kannerdierfer^[1].

Studien

De Pascal Schumacher huet am Conservatoire vun der Stad Lëtzebuerg Perkussioun geléiert, duerno huet hie sech um Conservatoire National de Région - Strasbourg op Marimba a Vibraphon spezialiséiert. Duerno huet hien um Conservatoire Royal de Bruxelles an um Koninklijk Conservatorium vun Den Haag Jazz studéiert, an e Master a Musikologie op der Université Marc Bloch vu Stroossbuerg gemaach. Do dernieft huet hien eng sëllege Coursen a Workshope bei Leit wéi Gary Burton, Mike Manieri, David Friedman, Stefon Harris gemaach.

Karriär

1995 huet de Pascal Schumacher, zesumme mat der Saxophonistin Nadine Kauffmann, den Ensembel Interchange gegrënnt.

1998 krut en den IKB Jugend-Förderpreis an 1999 de Prix Norbert Stelmes vun de Jeunesses Musicales Luxembourg. Zanter 1997 spillt de Pascal Schumacher mat verschiddene Bands, wéi dem Kristen Cornwell Quintet, dem Marc Demuth Quartet, Gasz3, an huet mat Jazzmuseker zesummegespillt wéi dem Rabih Abou Khalil, Wolfgang Haffner, Jef Neve, Michael Wollny, Kenny Barron, Marc Demuth, Jeff Herr, Jim Grandcamp, Greg Lamy, Sylvain Rifflet, Francesco Tristano Schlimé, Brice Soniano, Oliver Strauch…

Zanter 2003 huet e säin eegene Quartett, de Pascal Schumacher Quartet. Am August 2004 huet dës Band den Éischte Präis an de Publikumspräis um Tremplin Jazz zu Avignon kritt, an am November 2005 de belschen Django d'Or an der Kategorie "Nei Talenter".

Am Laf vun de Joren huet de Pascal Schumacher och als Solist gespillt, ë. a. mam Zürcher Kammerorchester, mam WDR Rundfunkorchester Köln, der Camerata Megaron Athen, dem Orchestre Philharmonique du Luxembourg, dem Orchestre de Chambre du Luxembourg, United Instruments of Lucilin, dem Deutsches Kammerorchester Berlin, der Neue Philharmonie Frankfurt an der Junge Norddeutsche Philharmonie.

Enseignement

De Pascal Schumacher enseignéiert klassesch Perkussioun an Jazz Vibraphon am Conservatoire vun der Stad Lëtzebuerg.

Discographie

Change Of The Moon, Igloo Records (2004), Bréissel
Personal Legend, Igloo Records (2006), Bréissel
Silbergrau, Igloo Records (2007), Bréissel
Here we Gong, Enja Records (2009), München
Face to Face, Enja Records (2010), München
Bang My Can, Enja Records (2011), München
Left Tokyo Right, Laborie Jazz (2015), Limoges
Afrodiziak, MPS Records (2015), Hamburg
Drops & Points, Modulating Music (2017), Luxembourg
Drops & Points Reworks, Modulating Music (2018), Luxembourg
SOL, Neue Meister, Edel (2020), Berlin
SOL - The Mudam Session, Neue Meister, Edel (2020), Berlin
LUNA, Neue Meister, Edel (2022), Berlin
CTRL-Variations, Neue Meister, Edel (2023), Berlin

Kuckt och

Lëscht vu lëtzebuergesche Museker

Um Spaweck

Commons: Pascal Schumacher – Biller, Videoen oder Audiodateien

Referenzen

↑ Lëtzebuerger Museker Pascal Schumacher neien Ambassadeur op rtl.lu den 12. Dezember 2018

[1] Lëtzebuerger Museker Pascal Schumacher neien Ambassadeur op rtl.lu den 12. Dezember 2018

[1]