Philippe II. vun der Bourgogne

Philippe II. Philippe de Kéngen
Titelen
Biographie
Gebuer	17. Januar 1342 jul. Pontoise
Gestuerwen	27. Abrëll 1404 jul. Halle
Bestuet mat	Marguerite III.
Papp	Jang de Gudden
Mamm	Bonne vu Lëtzebuerg
Geschwëster	Charles V. vu Frankräich
Kanner	Antoine vu Brabant, Jean sans Peur

Den Herrschaftsterritoire vum Haus Bourgogne ënner dem Philippe II.

De Philippe II. vun der Bourgogne, genannt de Kéngen (fr. Philippe le Hardi), gebuer de 15. Januar 1342 zu Pontoise, a gestuerwen de 27. Abrëll 1404 zu Halle am Herzogtum Brabant, war Herzog vun der Bourgogne. Hie war de véierte Jong vum franséische Kinnek Jean de Gudden aus dem Haus Valois an der Bonne vu Lëtzebuerg. Als Herzog vun der Bourgogne huet hien d'Haus Bourgogne als Säitebranche vun de Valois gegrënnt.

1363 krut hien d'Herzogtum Bourgogne vu sengem Papp geschenkt, deemno als donation pleine et entière iwwerdroen, an net, wéi spéider vum Louis XI., net ouni Hannergedanke behaapt, als "Apanage" déi net vun enger Fra konnt geierft ginn. E klengen Deel vum Herzogtum louch iwwregens hannert der Grenz tëscht Frankräich an dem Hellege Réimesche Räich.

Duerch säi Bestietnes 1369 mat der Marguerite de Maele, Ierwin vun de Grofschafte Flandern, Artois a Franche-Comté, huet en d'Basis vun engem gréisseren territorialen Ensembel geluecht, dee schliisslech vum Mâconnais am Süde bis a Frisland am Norde gereecht huet, dat souwuel op Käschte vu Frankräich wéi zum Nodeel vum Réimesche Räich Däitscher Natioun.

1385 konnt hie mat de flämesche Stied Gent, Bruges an Ypern, déi sech net ënnerwerfe wollten, Fridde schléissen. Dat selwecht Joer huet hien zu Cambrai säin eelste Jong Jean mat der Margarete vu Bayern bestuet, a gläichzäiteg seng eegen Duechter Margarete mat hirem Brudder Wilhelm II, dem Ierwe vu Bayern.

Hien huet sech säi Liewe laang als e franséische Fürst gefillt, dee sech laang mat senge Bridder, besonnesch mam Louis vun Orléans, ëm d'Muecht um franséische Kinnekshaff an den Hoer louch.

Seng Kanner a Kandskanner hunn an de Joerzéngten duerno d'Bourgogne zu engem praktesch eegestännege Staat tëscht Frankräich an Däitschland opgebaut.

Kanner

Vun eelef Kanner, déi de Philippe mat der Margarete hat, hunn der siwen et bis an den Erwueesenenealter gepackt:

• Jean sans Peur (1371–1419), Herzog vun der Bourgogne ∞ Margarete vu Bayern (1363–1423)
• Charles (* Mäerz 1372; † 13. Juli 1373)
• Marguerite (* Oktober 1374; † 8. Mäerz 1441) ∞ Wilhelm II. (1365–1417), Grof vun Holland
• Louis (* Mai 1377; † 10. Januar 1378)
• Catherine (1378–1425) ∞ Leopold IV. (1371–1411), Herzog vun Éisträich
• Bonne (* 1379; † 10. September 1399)
• Marie (* August 1380; † 3. Oktober 1422) ∞ Amadeuo VIII. (1383–1451), Grof vun der Savoie
• Antoine (1384–1415), Herzog vu Brabant a Limburg ∞ I: Jeanne vu Lëtzebuerg (1380/85–1407); ∞ II: Elisabeth vu Görlitz (1390–1451)
• Philippe (1389–1415), Grof vun Nevers ∞ I: Isabel de Coucy (–1411); ∞ II: Bonne d'Artois (1396–1425)

Literatur

• Richard Vaughan, Philip the Bold. The Formation of the Burgundian State; London (Longmans), 1962.
• Joseph Calmette, Les grands ducs de Bourgogne; Paräis (Albin Michel), 1949 (méimols nei opgeluecht).
• Élodie Lecuppre-Desjardin, Le royaume inachevé des ducs de Bourgogne (XIVe-XVe siècles); Paräis (Belin), 2016. ISBN 2-7011-9666-4978 - Am Kapitel IV gëtt d'Schenkung (net "Apanage"!) genee dokumentéiert.
• Bart Van Loo, Burgund - Das verschwundene Reich. Eine Geschichte von 1111 Jahren und einem Tag; München (C. H. Beck Verlag), 2020; aus dem Hollänneschen iwwersat; 656 S. (ill., Bibliogr.); ISBN 978-3-406-74927-8.