Protektorat

Vu Wikipedia
Op d'Navigatioun wiesselen Op d'Siche wiesselen

E Protektorat ass e staatlechen Territoire, deen deelweis onofhängeg ass an en Deel vu senger Souveränitéit un en anere Staat ofginn huet. E Protektorat gëtt generell mat engem internationalen Traité etabléiert, an deem e mächtege Staat engem méi schwaache Staat Schutz versprécht, an als Géigeleeschtung d'Kontroll iwwer bestëmmt Aspekter vun deem méi schwaache Staat senger Staatsgewalt iwwerhëlt, wéi zum Beispill d'Aussebezéiungen, d'Sécherheet oder d'Verwaltung. De méi schwaache Staat behält awer seng international Perséinlechkeet.[1][2]

Am Géigesaz zur Kolonie ass e Protektorat also nach méi autonom.

Beispiller[änneren | Quelltext änneren]

An der Geschicht gouf et vill verschidde Forme vu Protektorater. De Begrëff Protektorat gëtt zënter dem 19. Joerhonnert benotzt. Sou Schutzbezéiunge selwer gëtt et awer scho vill méi laang. Sou stoungen zum Beispill d'Kinnekräicher Numidien (am haitegen Algerien an Tunesien) a Pergamon (an der haiteger Tierkei) ënnert dem Schutz an der Kontroll vu Roum[3]. Spéider hunn d'europäesch Muechten Protektorater benotzt fir nieft dem Kolonialismus hir global Dominanz auszebauen.[3]

Bis virum Éischte Weltkrich war zum Beispill Däitsch-Südwestafrika en däitscht Schutzgebiet. Marokko an Tunesien ware fréier franséisch Protektorater.[4] Tëscht 1947 an 1956 huet och d'Saarland als Protektorat vu Frankräich gegollt.[5]

De Begrëff Protektorat gouf heiansdo och benotzt fir carrement eng Annexioun ze verstoppen, wéi zum Beispill am Fall vum Protektorat Böhmen und Mähren am haitegen Tschechien, dat vun 1939 bis 1945 vun Nazidäitschland kontrolléiert gouf.[2]

Den 8. August 1949 hunn de Bhutan a säi grousst Nopeschland Indien e Frëndschaftstraité ënnerschriwwen, an deem de Bhutan zougestëmmt huet, der indescher Féierung am Beräich vun der Aussepolitik ze follegen. Indien krut net d'Recht, Bhutan diplomatesch ze vertrieden. De Bhutan ass also fräiwëlleg zu engem indesche Protektorat ginn a selwer fir seng Aussepolitik verantwortlech bliwwen. Zousätzlech huet Indien versprach, sech net am Bhutan seng Bannenugeleeënheeten anzemëschen.[6] Et gëtt awer och Fäll, an deenen d'Protektorat seng Souveränitéit als Staat verluer huet.[6][2]

A méi rezenter Zäit gi Bosnien an Herzegowina an de Kosovo wéinst dem groussen Afloss vun der internationaler Gemeinschaft op déi national Politk heiansdo als international Protektorater oder "Hallef-Protektorater" ugesinn,[7][8][9] och wann déi Bezeechnung net onëmstridden ass.

Referenzen[Quelltext änneren]

  1. Definitioun op cnrtl.fr (gekuckt den 20. Februar 2019)
  2. 2,0 2,1 2,2 Definitioun op rechtslexikon.net (gekuckt den 20. Februar 2019)
  3. 3,0 3,1 Definitioun op britannica.com (gekuckt den 20. Februar 2019)
  4. Definitioun op wissen.de (gekuckt den 20. Februar 2019)
  5. Deutschlandfunk: Vom französischen Protektorat zum zehnten Bundesland (1. Januar 2017)
  6. 6,0 6,1 Mohammed Bedjaoui - International Law: Achievements and Prospects, 1991, S. 51
  7. European Western Balkans: Bosnia and Kosovo: Europe's Forgotten Protectorate (24. Februar 2017)
  8. The New Yorker: Bosnia’s Unending War (4. November 2015)
  9. New Vision: Why Kosovo has remained a UN protectorate (24. Juni 2017)