SNCB-Linn 48

D'Linn 48 vun der belscher Eisebunnsgesellschaft SNCB war eng Linn déi vu Raeren iwwer Waimes op Sankt Vith gefouert huet.

Et war domat een Deel vun der Vennbunn déi 1895 a Betrib goung. D'Streck déi net méi a Betrib ass, ass zanter Enn 2007 am Gaang ewechgerappt ze ginn.

Vun de Garen ass nach d'Gare vu Surbrodt déi 2009 restauréiert gouf, erhalen, déi vu Monschau an d'Gare vu Raeren a Waimes. D'Gare vu Weywertz gouf 1997 ewechgerappt.

Well d'Streck op enger Längt vu ronn 23 km duerch däitschen Terrain gefouert huet, a belscht Hoheitsgebitt war, sinn sou tëscht der Streck an der däitsch-belscher Grenz Exklaven entstanen. Déi klengst an och südlechst ass Ruitzhof. Weider no Norde koum dann d'Uertschaft Mützenich deen zur Gemeng Monschau gehéiert, an am Norden en Deel vu Roetgen. Op der Streck selwer sti riets lénks vum Gleis d'Grenzmaarke vis-à-vis.

D'Schinnen op der Streck komme vun Arbed-Belval, vun der Hadir a vun TREB.

Eng Korjéisheet gëtt et zu Roetgen. Beim Zeréckbau vun der Streck gouf do en Deel gebraucht, fir eng Kanalisatioun ënner Daach ze bréngen. Déi leeft do zum Deel iwwer d'Grenz, soudatt elo d'Grenzmaark 887 aus engem Kanalsdeckel besteet.

Uschlëss un d'Linn

Op der Grenz mat Däitschland zu Raeren hat d'Linn 48 Uschloss un dat däitscht Eisebunnsnetz a Richtung Oochen - Stollberg.
Vun der Gare vu Raeren aus hat se Uschloss un d'Linn 49 (Raeren-Eupen-Welkenraedt)
Vu Weywertz aus hat se iwwer den Y vun Oberweywertz Uschloss un d'Linn 45A déi iwwer Bütgenbach a Büllingen op Losheim an Däitschland gefouert huet.
Vu Waimes aus, huet d'Linn 45 iwwer Malmedy a Stavelot den Déngscht bis op Trois-Ponts gemaach. Dat war och déi Parti déi am längsten am ziville Beräich den Déngscht gemaach huet. D'Streck Raeren-Eupen gouf nach bis 1998 an der Rei gehalen, well d'NATO do den Domm drop hat.
Vu Born aus, ass d'Linn 47A op Vielsalm fortgaangen.
Zu Sankt Vith hat se Uschloss un d'Linn 46 (Lommersweiler-Steinebrück) an dann an Däitschland weider iwwer d'Westäifelbunn bis op Prüm, un d'Linn 47 (Sankt Vith-Lengeler) an dann zu Lëtzebuerg weider op Ëlwen, an un d'Linn 163 (Libramont - St. Vith).