Scott Carpenter

Vu Wikipedia
Op d'Navigatioun wiesselen Op d'Siche wiesselen
Scott Carpenter
Den Scott Carpenter
Kategorie Astronaut
Land USA
Agentur NASA
Auswiel 2. Abrëll 1959
(1. NASA-Grupp)
Zuel vu Flich 1
Éischte Start 24. Mee 1962
Lescht Landung 24. Mee 1962
Dauer 4h 56min
1. Missioun Mercury-Atlas 7
opgehalen August 1974
Ungaresche Gedenktimber aus dem Joer 1962.
De Carpenter iwwerpréift d'Hëtzschëld vun der Aurora 7

De Malcolm Scott Carpenter, gebuer den 1. Mee 1925 zu Boulder am Colorado a gestuerwen den 10. Oktober 2013 zu Denver,[1]) war en US-amerikaneschen Astronaut an Aquanaut.

Liewen[änneren | Quelltext änneren]

Dem Carpenter seng Elteren hate sech getrennt, wéi hien dräi Joer al war. Well seng Mamm un Tuberkulos gelidden huet, ass de Carpenter bei Frënn vun der Famill opgewues. Nom Studium vun der Loftfaarttechnik op der Universitéit vu Boulder ass de Carpenter am Joer 1949 an d'US Navy agetratt a gouf do 1951 Pilot, an 1954 Testpilot.

Astronautecarrière[änneren | Quelltext änneren]

1959 koum hie bei der NASA an déi éischt US-Astronautegrupp vun de Mercury Seven. Hien huet sech weider op Kommunikatioun an Navigatioun spezialiséiert. Wéi am Februar 1962 den éischten US-Weltraumfluch an d'Äerdëmlafbunn gestart gouf, stoung de Carpenter als Ersatzmann fir de Pilot John Glenn op der Lëscht.

Fir den zweete Fluch vun engem Amerikaner am Orbit war am Ufank den Deke Slayton virgesinn. Wéi deen awer wéinst Häerzproblemer net fléie konnt, gouf de Carpenter fir dëse Fluch bestëmmt. De 24. Mee 1962 ass hie mat der Missioun Mercury-Atlas 7 mat dem Raumschëff Aurora 7 gestart. No dräi Äerdëmkreesungen ass hien am Atlantik gelant, allerdéngs 400 km vum Rettungsschëff ewech, sou datt hien en etlech Stonnen huet misse waarden, ier en aus dem Waasser gefëscht gouf. Hie war den eenzege Mercury-Astronaut, deen d'Kapsel iwwer d'Spëtz verlooss hat, wéi et am Ufank vun den Techniker och geplangt war, all déi aner Astronauten hunn d'Sprengluk benotzt.

Seng weider Aufgabe bei der NASA waren d'Iwwerwaachung vun der Entwécklung an der Konstruktioun vun der Moundlandefär fir den Apollo-Programm. Vun der NASA entbonnen, huet de Carpenter um Sealab-II-Projet vun der US-Marine matgeschafft. An där Zäit hat hien en Accident mam Motorrad, wou hie sech um lénksen Aarm blesséiert hat an domat a senger Beweeglechkeet geschwächt war. Trotz engem chirurgeschen Agrëff (1964 an 1967) war hien net méi kapabel fir e weidere Raumfluch. Am Summer 1965 huet hien ee Mount an enger Ënnerwaasserstatioun a 60 Meter Déift verbruecht. Wéi hien duerno nees bei der NASA war, huet de Carpenter seng Erfarungen als Verantwortleche fir den Ënnerwaassertraining vun den Astronauten ausgenotzt.

No der NASA[änneren | Quelltext änneren]

Am August 1967 huet de Carpenter d'NASA definitiv verlooss a koum zréck bei d'Marin, wou hien d'Aquanautenasäz vum Sealab-III-Projets geleet huet. 1969 ass hien aus dem Militärdéngscht ausgescheet. De Carpenter huet dann d'Bedeelegungsgesellschaft Sear Sciences gegrënnt[2], dären Zil et war, Mieresressourcen besser ze notzen. Heibäi hat hien dann enk mam franséischen Mieresfuerscher Jacques-Yves Cousteau zesumme geschafft. De Carpenter hat an allen Ozeane gedaucht, och ënner dem Äis vum Nordpolarmier.

Privates[änneren | Quelltext änneren]

De Carpenter huet zwéi Romaner an eng Autobiographie geschriwwen. Hie war véiermol bestuet, gouf dräimol gescheet a war Papp vu siwe Kanner. Hien ass am Oktober 2013 am Alter vun 88 Joer an engem Spidol zu Denver no engem Schlagufall gestuerwen.

Schrëften[änneren | Quelltext änneren]

  • (mam Kris Stoever): For spacious skies : the uncommon journey of a Mercury astronaut. Harcourt, Orlando 2002.
  • Deep Flight. Roman. Pocket Books, New York 1991.
  • The Steel Albatross. Roman. Pocket Books, New York 1991.
  • Inner Space. Silver Burdett, Morristown, N.J. 1969.
  • Exploring space and sea. Smithsonian Institution Press, Washington 1967.
  • (mat den aneren Astronauten vum Mercury-Programm): We Seven. Simon & Schuster, New York 1962.

Kuckt och[änneren | Quelltext änneren]

Saturn 01.svg Portal Astronomie

Um Spaweck[änneren | Quelltext änneren]

Commons: Scott Carpenter – Biller, Videoen oder Audiodateien

Referenzen[Quelltext änneren]

  1. Scott Carpenter, astronaut-aquanaut, dies, was second American in orbit
  2. https://www.jsc.nasa.gov/Bios/htmlbios/carpenter-ms.html