Jason (Satellit)

Jason ass e kollektive Satellitteprogramm fir Mierobservatioun vun der NASA (USA) an dem CNES (Frankräich).

Eenzelmissiounen

Jason 1, Nofollger vum Satellit TOPEX/Poseidon, gouf zesumme mat TIMED de 7. Dezember 2001 mat enger Delta-7920-Drorakéit vun der Vandenberg Air Force Base aus gestart. Hie flitt op enger 1340 km héijer kreesfërmeger Ëmlafbunn mat enger Inklinatioun vu 66,0°.
Jason 2, och OSTM (Ocean Surface Topography Mission) genannt, koum den 20. Juni 2008 no. De Satellit gouf och vu Vandenberg aus op eng 1336 km héich Kreesbunn mat 66° Inklinatioun bruecht. De Satellit ass mam Duebel-Frequenz-Altimeter „Poseidon 3“ fir d'Bestëmmung vun der Miereswellenhéicht ausgerëscht.
Jason 3, de Start war ufanks fir Dezember 2014 geplangt, nodeems en e puermol verréckelt gouf war de Start dunn de 17. Januar 2016 mat enger Falcon 9 op der Vandenberg Air Force Base.

Instrumenter

D'Notzlaaschte gläichen deene vun TOPEX/Poseidon:

Poseidon: Héichtemiessradar am C-Band an Ku-Band
Jason Microwave Radiometer (JMR): Bestëmmung vum Waasserdamp fir d'Korrektur vun den Héichteradardate vum Poseidon.
Doppler Orbitography and Radiopositioning Integrated by Satellite (DORIS): Positiounsbestëmmung a Korrekturdate fir Poseidon
BlackJack: GPS-Empfänger fir Positiounsbestëmmung
Laser-Retroreflekter: Buedemgestëtzt Positiounsbestëmmung

Missioun

Zesumme mam RA-2-Altimeter op dem ESA-Satellit Envisat ass Jason déi wichtegst Informatiounsquell fir prezis global Viraussoen iwwer Mieresstréimungen a Wellegang. Jason gouf besonnesch fir d'Observatioun vun den tropesche Mierer optiméiert, wärend aner Héichtemiesser och mëttel Breeten an d'Polargebidder (CryoSat) ofdecken. Well Altimeter nëmme laanscht eng relativ schmuel Buedemspuer miesse kënnen ass et vu Virdeel Héichteninformatioune vun en ettlechen Instrumenter kombinéieren ze kënnen.

Besonnesch Ziler vu Jason sinn:

Vermoosse vum Mieresspigel mat enger Genauegkeet vu 4 cm
Observatioun vu Mieresstréimungen, Wellenhéichtebestëmmung a Bestëmmung vun de Wandvitessen
Virausso vum El Niño
Kollektiv Vermiessungsaufgabe mam TOPEX/Poseidon bis zu deem sengem Ausfall Enn 2005

Technesch Daten

D'Satellitte baséieren op Alcatel Proteus Satellittebus. Si si per magnetic torque rods (elektromagnéitesch Ausriichtung um Äerdmagnéitfeld duerch bordeege Spulen^[1]) dräiachsestabiliséiert an hunn en Undriffssystem mat enger Dreifstoffreserve vun 28 kg Hydrazin. Si sinn ongeféier 500 kg schwéier, 3 m héich a si mat zwou Solarzelleflächen ausgerëscht, déi 0,5 kW (Jason-2) resp. 1,0 kW Leeschtung liwweren. Déi gesammelt Date ginn iwwer e S-Band Telemetriesystem mat 613 (Jason-1) resp. 838,86 kbits/s (Jason-2) op d'Äerd iwwerdroen.

Kuckt och

Portal Astronomie

Um Spaweck

NASA: OSTM/Jason-2
Aviso: Jason-2

Referenzen

↑ (en) Stanford University: GRAVITY PROBE B

[1] (en) Stanford University: GRAVITY PROBE B

[1]