Jean-François Theisen
| Jean-François Theisen | |
|---|---|
| Gebuer | 12. Juni 1865 |
| Gestuerwen | 3. September 1926 |
| Nationalitéit | Lëtzebuerg |
| Aktivitéit | Politiker |
 | |
De Jean François (Franz) Theisen, gebuer den 12. Juni 1865 zu Hunchereng[1], a gestuerwen den 3. September 1926 zu Esch-Uelzecht, war e lëtzebuergesche Schoulmeeschter a Politiker.[2]
De Franz Theisen war vun 1881 bis 1884 an der Normalschoul. Nodeems hie Schoulmeeschter zu Fréiseng, Leideleng a Mamer war, huet hie seng Carrière als “instituteur primaire supérieur” zu Miersch ofgeschloss.[1]
1914 ass hien aus Gesondheetsursaachen an d'Pensioun gaangen an huet sech op Esch-Uelzecht zeréckgezunn.[1] Do huet hien ugefaange, Politik ze maachen, a gouf 1917 an den Escher Gemengerot gewielt, wou hien de 4. Januar 1918 als Conseiller vereedegt ginn ass.[3] Bis 1920 ass hie Conseiller bliwwen.[4]
Bei enger Ersatzwal fir d'Chamber ass den Theisen bei der Stéchwal vom 11. Mäerz 1918 als Deputéierte vum Escher Kanton gewielt ginn.[5] Hien ass awer nëmme bis den Oktober 1918 an der Chamber bliwwen.[4]
De Franz Theisen war President vum “Lehrer-Unterstützungsverein” (Société des secours mutuels des instituteurs) a Generalsekretär vun der Pompjeesfederatioun.[1] Hie war ee vun de fréie Membere vun der Société des naturalistes luxembourgeois, an déi hien am Juli 1890, wéi hien nach Schoulmeeschter zu Mamer war, opgeholl ginn ass.[6]
De Franz Theisen huet bei verschiddenen in- an auslännesche pedagogeschen Zäitschrëfte matgeschafft.[1]
Gielchen
[änneren | Quelltext änneren]- Chevalier vum Ordre de Mérite civil et militaire d'Adolphe de Nassau
Literatur
[änneren | Quelltext änneren]- Massard, J.A., 2015. La Société des naturalistes luxembourgeois de 1890 à 2015. Bulletin de la Société des naturalistes luxembourgeois 116, S. 5-302.
- Molitor, M., 1931. Der luxemburgische Lehrer in seiner schriftstellerischen Betätigung von 1815-1930. Luxemburg, 157 S.
Referenzen
[Quelltext änneren]- ↑ 1,0 1,1 1,2 1,3 1,4 Molitor 1931, S. 105; Massard 2015, S. 10.
- ↑ Doudesannonce vum Jean-François Theisen am Luxemburger Tageblatt vum 4. September 1926.
- ↑ Luxemburger Wort 1918-01-05, S. 3, Nr. 5/6 (Esch a. d. Alz., 4. Jan.)
- ↑ 4,0 4,1 Flies, J., 1979. Das andere Esch - An der Alzette. Luxembourg, S. 556.
- ↑ Luxemburger Wort 1918-03-12, S. 1, Nr. 71 (Zur Escher Kammerersatzwahl)
- ↑ Massard 2015, S. 8.