Käschtebam bei Branebuerg

Käschtebam bei Branebuerg
Käschtebam bei Branebuerg
	De Käschtebam am Februar 2024
Kategorie	Bemierkenswäert Beem zu Lëtzebuerg
Land	Lëtzebuerg
Gemeng	Tandel
Plaz	Branebuerg
Adress	Heedebierg, Weschterbaach
Koordinaten	49°54'39,67"N, 6°9'6,19"O
Bamaart	Wëlle Käschtebam
Héicht	15,5 m (2023)
Duerchmiesser	1,19 m (2023)
Ëmfang	3,74 m (2023)

Lag vum bemierkenswäerte Bam

De Käschtebam bei Branebuerg ass e Wëlle Käschtebam (Aesculus hippocastanum, (fr)marronnier commun, (de)Gewöhnliche Rosskastanie) dee bei Branebuerg an der Gemeng Tandel steet an zënter 2002 zu de bemierkenswäerte Beem zu Lëtzebuerg gehéiert.

Lokalisatioun

De Bam steet am Flouer Heedebierg / Weschterbaach, ëstlech vu Branebuerg an der Sektioun Baastenduerf vun der Gemeng Tandel. Et gesäit een de Bam wann ee vu Baastenduerf aus iwwer den CR352 a Richtung Groestee fiert, ronn 2,5 km nom Enn vum Duerf, lénkssäiteg vun der Strooss.

Geschicht

De Käschtebam deen isoléiert an der Landschaft steet huet weeder en aussergewéinlechen Alter, Ëmfang oder Héicht, nach eng speziell Form oder eng extra Kroun. Et ass e klassesche Wëlle Käschtebam deen eleng an als Unhaltspunkt an der Landschaft steet.

Ëm 2023 konnt gesi ginn, datt e Bam net méi an engem ganz gudden Zoustand ass, well en décken Aascht ofgebrach ass an doduerch Waasser an de Bam andréngt.

Et ass net genee gewosst wéi al de Bam ass, e gouf awer warscheinlech um Enn vum 19. Joerhonnert geplanzt, wéi d'Weekräiz ënnert dem Bam opgeriicht gouf.

Am Rampli nieft dem Bam goufen am Zweete Weltkrich Läiche vun däitschen Zaldote provisoresch do begruewen, ier se dunn nom Krich definitiv op enger anerer Plaz bäigesat goufen.

Nieft dem Bam erënnert och nach e Gedenksteen un de Weckerings Mett, deen de 17. Mäerz 1945 op der Strooss duerch Tellerminnen ëmkoum.

Entwécklung

Ongeféier Moosse vum Bam (m)
Joer	$U$	$d$	$h$
2000	3,33	1,06	15,0
2023	3,74	1,19	15,5

Biller

D'Käschtebam bei Branebuerg am Laf vum Joer
Fréijoer ()
Summer ()
Hierscht ()
Wanter (2024)

Literatur

Murat, Danièle et al. Les arbres remarquables du Grand-Duché de Luxembourg. [3^e parution revue et adaptée]. Diekirch: ANF, 2023. Print. ISBN 978-2-9199474-3-0 (cf. S. 38-39, Foto an Text)
Bartimes, Mett et al. Les arbres remarquables 2002. Luxembourg: Administration des eaux et forêts, 2002. Print. ISBN 2-919877-05-4 (cf. S. 142-143, Foto an Text)
Arbres remarquables du Grand-Duché de Luxembourg. Luxembourg: Administration des eaux et forêts, 1981. Print.

Um Spaweck

Commons: Käschtebam bei Branebuerg – Biller, Videoen oder Audiodateien

Referenzen an Notten

Quell vum Artikel wou net anescht uginn: (Les) Arbres remarquables… an der Literatur