Kifer um Briddel

Geographesch Koordinaten:

49° 39’ 04.51’’ N 06° 04’ 46.25’’ O

D'Kifer vun ënnen aus der Wercollier-Strooss erop (Februar 2008)

D'Kifer um Briddel ass eng Bëschkifer (Pinus sylvestris; pin sylvestre; Waldkiefer) a steet laanscht d'Lucien Wercollier-Strooss, net wäit vum Briddeler Waassertuerm.

Wéinst hirer opfälleg onsymmetrescher Kroun, déi d'Strooss wéi e Schierm iwwerdeckt, gehéiert se zu de bemierkenswäerte Beem zu Lëtzebuerg.

De Bam, deen a Privatbesëtz ass, ass 2008 an nach engem relativ gesonden Zoustand, trotz dem Schued dee seng Kroun duerch Camionen, Bussen asw, an och dem Macadam dee bis un de Stamm erureecht, erlidden huet.

Dëse Bam kënnt schonn op der éischter Lëscht vun de bemierkenswäerte Beem zu Lëtzebuerg vir, eng Lëscht déi 1893 vum Forstinspekter Ernest Faber, de Pionéier um Gebitt vun de bemierkenswäerte Beem zu Lëtzebuerg, verëffentlecht gouf. De Faber vergläicht se mat engem natierlechen Triumphbou virum Agank vun der Uertschaft.

Deemools stoung de Bam nieft der onbebauter Landstrooss déi vu Stroossen op de Briddel gefouert huet. Zanterhier huet d'Bebauung sech laanscht d'Kifer bis bei de Waassertuerm ausgebreet, an d'Strooss fir op Stroossen, den CR181, gouf méi südlech nei ugeluecht. Zanterhier ass d'Wercollier-Strooss eng Sakgaass an domat e rouegt Wunngebitt.

Den Ëmfank op Broschthéicht huet wéi follegt zougeholl: 2,45 m (1942) - 2,58 m (1967) - 2,73 m (1980) - 2,73 m (ëm 2000). D'Gréisst vum Bam huet ofgeholl: 1980 waren et 14 m, ëm 2000 nëmme méi 11 m.

Quellen

• Sinner, J. et al., 2002. Les arbres remarquables. Administration des Eaux et Forêts. Musée national d'histoire naturelle. 255 S. (Cf. S. 186-187, Text a Foto).
• Administration des eaux et forêts, 1981. Arbres remarquables du Grand-Duché de Luxembourg. Imprimerie Saint-Paul, 167 S. (Cf. S. 138-139, Foto an Text).
• Ernest Faber, 1915. Merkwürdige Baumgestalten aus dem Grossherzogtum Luxemburg. Bulletin de la Société des naturalistes luxembourgeois, Festschrift 1915: 335-417. (Cf. S. 373, Foto; keen Text zur Kifer um Briddel heiran). Eroflueden, PDF
• Ernest Faber, 1893. Alte Bäume. St. Paulus Gesellschaft, Lëtzebuerg.

Kuckt och

• Aner bemierkenswäert Beem um Briddel:
  • Lann an der rue du tilleul
  • Eech an der rue Nic-Goedert
• Bemierkenswäert Beem zu Lëtzebuerg

Fotoalbum

D'Kifer vun uewen erof aus der Strooss gesinn

D'Kifer vun der anerer Säit vun der Strooss aus gesinn

D'Kifer ëm 1910 (Faber 1915)