Krim-Observatoire

De Krim-Observatoire ass en astrophysikaleschen Observatoire op der ukrainescher Hallefinsel Krim.

Positioun

Déi fréier sowjetesch Ariichtung besteet haut

aus dem Observatoire zu Nautschnyj, ongeféier 30 km vu Simferopol ewech a läit 560 m héich.
an der Sektioun Simejis, 16 km südwestlech vu Jalta (op enger Héicht vun 200m, 44° 24’ 46.16’’ N 33° 59’ 29.71’’ O).

Geschicht

Den Observatoire zu Simejis existéiert schonn zanter 1900. Deemools gouf en als Privatobservatoire gegrënnt a spéider 1912 vum Pulkowo-Observatoire (südlech vu Sankt Petersburg) als südlech Sektioun iwwerholl. No der Zerstéierung am Zweete Weltkrich gouf e bis 1948 nees opgebaut.

D'Ariichtung zu Nautschnyj ass net sou al a gouf eréischt 1949 fäerdeggestallt. Nom Zesummebroch vun der Sowjetunioun gehéiert den Observatoire zu der Ukrain, allerdéngs gëtt et nieft der Zesummenaarbecht mat europäesche Wëssenschaftler och eng enk Kooperatioun mat Russland.

Teleskopen an Aarbechten

Den Observatoire huet e 65 cm Maksutov-Teleskop, zwéi Reflektere mat 1,2 m an 2,6 m Ëffnung, e Koronograph, zwéi Sonnentierm an e 40 cm Duebelastrograph. Ausserdeem ass zu Simejis en 22 m Radioteleskop.

Zu Nautschnyj ass och nach déi d'Süd-Sektioun vum staatleche Sternberg-Institut fir Astronomie vun der Moskauer Lomonossow-Universitéit ënnerbruecht.

De Fuerschungsschwéierpunkt vum Observatoire läit op de Gebidder vun der Sonnephysik, Duebelstäresystemer, Radialvitess vu Stären a Quasaren.