Millebaach (Äischen)

Vu Wikipedia
Op d'Navigatioun wiesselen Op d'Siche wiesselen
Disambig.svg Dësen Artikel beschäftegt sech mat der Millebach: enger Niewebaach vun der Äisch zu Äischen. Fir aner Baache mat demselwechten Numm, kuckt w.e.g. Millebaach.
D'Millebaach op der Furt bei der Millen an der Gäichel.

D'Millebaach ass eng belsch-lëtzebuergesch Baach um Territoire vun de Gemengen Arel an Habscht.

Se huet hir Quellen op enger Héicht vun 350 Meter südëstlech vu Fruessem, an enger Zoch déi vu Seymerich kënnt a leeft vun do no Osten a Richtung Lëtzebuerg. Kuerz virun der Gäichel ännert se hire Wee no Süden, a gëtt och do um Stéck laanscht Geechelermillen, op der topographescher Kaart als Geechelbaach gefouert.

Op der Millen an der Gäichel, op der belscher Säit, fiddert se de Milleweier, an huet och fréier d'Energie fir eng Seeërei geliwwert.

Virun der Mille leeft se iwwer de Wee, dee vun der Gäichel op Bunnert féiert, an deen op der Strooss vun Arel op Uewerpallen op der Giischer Kräizung, beim Haus genannt Beim Klénkebatti eraus kënnt.

Op der Héicht vun der Gossemaark LB 099 um Flouer Aatz leeft s'an d'Lëtzebuerger Land fir da laanscht d'Felleschmillen op Äischen ze lafen, wou se op enger Héicht vun 276 Meter, just nodeem se ënner dem Chemin repris CR105 erduercht ass, um Flouer Buuschten an d'Äisch leeft.