Philippe Marini
| Philippe Marini | |
|---|---|
 am Joer 2009 | |
| Gebuer |
28. Januar 1950 Paräis |
| Nationalitéit | Frankräich |
| Educatioun |
École nationale d'administration, Institut d'études politiques de Paris, Universitéit Panthéon-Assas |
| Aktivitéit | Politiker |
| Partei | Rassemblement pour la République, Union pour un mouvement populaire |
 | |
De Philippe Marini, gebuer den 28. Januar 1950, ass e franséische Politiker. Zanter 1987 ass e Buergermeeschter vu Compiègne an zanter 1992 als UMP-Representant vum Departement Oise Member vum franséische Senat.
Als Rapporter vun der Finanzkommissioun vum Senat huet en 2008 mat zwéi kontroverséierte Virschléi op sech opmierksam gemaach:
- deen éischte sollt et erméigleche fir Verloschter déi een am Kader vun der Finanzkris op der Bourse gemaach huet vun der Steier ofzesetzen[1],
- deen zweeten hat als Zil eng Besteierung vu Verkeef tëscht Privatleit iwwer den Internet[2].
International negativ Schlagzeilen huet e provozéiert andeems en den 18. September 2010 géinteniwwer dem Radiosender France Culture ausgesot huet, e géif sech wënschen, "datt den Napoleon III. an de Bismarck am Joer 1867 e Gespréich mat engem aneren Ausgank gehat hätten, soudatt Lëtzebuerg net existéiere géif.... D'Schwächt vum Napoleon III. huet et Lëtzebuerg erlaabt z'existéieren"[3], dëst nodeem datt d'EU-Kommissärin Viviane Reding vun enger méiglecher EU-Infractiounsprozedur wéinst franséische Repressiounsmoossname géint Roma geschwat hat. De lëtzebuergeschen Ausseminister Jean Asselborn huet dës Aussoe vum Marini schaarf verurteelt andeems e géinteniwwer dem DNR erkläert huet, dem Marini säi Gedankegutt wier äusserst blesséierend a geféierlech a seng Aussoe géife bei wäitem alles iwwertreffe wat de Front National seet. D'Buergermeeschtesch vu Veianen Gaby Frantzen-Heger huet als éischt Reaktioun e Studentenaustauschprogramm mat der jumeléierter Gemeng Compiègne op Äis geluecht[4]. Den 20. September 2010 huet de franséische Premier François Fillon säi Lëtzebuerger Homolog Jean-Claude Juncker ugeruff a sech fir d'Aussoe vum Marini entschëllegt, déi net d'Meenung vu Frankräich a vum franséische Vollek erëmgi géifen[5].
Referenzen[Quelltext änneren]
- ↑ Crise boursière: l'amendement Marini (UMP) torpillé par son camp, AFP, 8. Dezember 2008.
- ↑ "Les ventes entre particuliers sur le Net bientôt taxées ?", Le Point, 18. Dezember 2008.
- ↑ Jean Asselborn: "Extrem verletzendes und gefährliches Gedankengut", Wort, 19. September 2010.
- ↑ Vianden legt Studentenaustausch auf Eis, Wort, 20. September 2010.
- ↑ Frankreich rudert zurück, Wort, 20. September 2010.