Réibaach

Vu Wikipedia
Op d'Navigatioun wiesselen Op d'Siche wiesselen
D'Réibaach 100 Meter éier s an d'Our leeft

D'Réibaach ass eng kleng Baach am Éislek op der Grenz tëscht de Gemengen Klierf a Wäisswampech am Kanton Klierf, a laanscht d'belsch Grenz um südwestlechsten Eck vun der Gemeng Burg-Reuland.

Si huet hir Quellen eng ronn 400 Meter nordëstlech vu Lausduer um Flouer Fenn op enger Héicht vu 475 Meter.

Si leeft vun do aus no Nordosten lénks laanscht Léiler a Richtung belsch Grenz. Eppes 2.300 Meter no der Quell kritt se vu lénks e klengen Niewefloss d'Birkelburen déi vu Wäisswampech erofkommen. Just op der belscher Grenz bei der Maark LB N° 53 leeft nach eng kleng Baach vu lénks dran, déi aus enger Griecht mam Numm Weierchessäit kënnt.

Vun do aus dréint se an engem grousse Bou no Südosten a mécht déi ganzen Zäit bis s'um Dräilännereck an d'Our leeft, d'Grenz mat der Belsch. Op deem Deel leeft nach just e Gruef, dee vu Lotzebur kënnt, op der rietser Säit dran.