Robert Stawell Ball
| Robert Stawell Ball | |
|---|---|
 | |
| Gebuer |
1. Juli 1840 Dublin |
| Gestuerwen |
25. November 1913 Cambridge |
| Nationalitéit | Vereenegt Kinnekräich |
| Educatioun | Universitéit Dublin |
| Aktivitéit | Astronom, Mathematiker, Universitéitsprofesser, Schrëftsteller |
| Member vun | Royal Society |
 | |
De Sir Robert Stawell Ball, gebuer den 1. Juli 1840 zu Dublin, a gestuerwen de 25. November 1913 zu Cambridge, war en ireschen Astronom, Mathematiker a Verfaasser vu populärwëssenschaftleche Bicher.
Liewen a Wierken
[änneren | Quelltext änneren]De Robert Stawell Ball koum als Jong vum Robert Ball (1802–1857) zu Dublin op d'Welt. Säi Papp war Naturfuerscher a President vun der Geological Society of Ireland. De Robert Stawell Ball hat d'Schoul Tarvin Hall besicht an duerno um Trinity College zu Dublin studéiert.
1865 gouf hie Privatschoulmeeschter fir d'Kanner vum Lawrence Parsons, 4. Earl of Rosse (1840–1908), woufir hien als Géigeleeschtung Zougank zum Teleskop an zum Observatoire vum William Parsons zu Parsonstown krut. D'Teleskop vum Parsons war deemools dat gréisst vun senger Aart weltwäit. An dëser Zäit observéiert de Ball ettlech Niwwelobjete; hien entdeckt véier nei Spiralniwwelen. Donieft hëlleft hie mat mathematesche Mëttelen d'Teleskop nach méi genee ze maachen.
1867 ass de William Parsons gestuerwen an de Ball gouf Professer fir Mathematik (Professor of Applied Mathematics and Mechanics) um „Royal College of Science“ vun der Universitéit Dublin. 1874 gouf hien Andrews Professor of Astronomy op der Universitéit Dublin a krut gläichzäiteg den Titel Royal Astronomer of Ireland. Dës Plaz hat hie bis 1898. 1892 gouf hien och Professer fir Astronomie a Geometrie („Lowndean Professor of Astronomy“) op der University of Cambridge an Direkter vum Observatoire vun där Universitéit. Als Professer fir Astronomie ass hien deem berüümten Astronom John Couch Adams (1819–1892) gefollegt, deen de Planéit Neptun entdeckt hat. Dee Posten hat hie bis zu sengem Doud am Joer 1913. Vun 1877 bis 1880 war hie Sekretär, a vun 1885 bis 1892 gewielte Vizepresident vun der Royal Irish Academy. 1890 gouf hie gewielte President vun der Royal Zoological Society.
De Ball hat eng Partie erfollegräich populärwëssenschaftlech Bicher iwwer d'Astronomie geschriwwen. Säin Haaptinteressi huet der Mathematik gegollt; e groussen Deel vu senger Fräizäit hat hie senger „Schrauwentheorie“ gelooss.
Wierker
[änneren | Quelltext änneren]- Experimental Mechanics. 1871.
- The Theory of Screws: A Study in the Dynamics of a Rigid Body. 1876.
- A Story of the Heavens. 1886.
- The Story of the Sun. 1893.
- A Treatise on the Theory of Screws. 1900.
- A Treatise on Spherical Astronomy. 1908.
Éierungen
[änneren | Quelltext änneren]1873 gouf de Ball Member vun der Royal Society of London ernannt.
1886 gouf hien zum „Chevalier“ geschloen.
Kuckt och
[änneren | Quelltext änneren]
Um Spaweck
[änneren | Quelltext änneren]- (en) Kuerzbiographie bei nahste.ac.uk
- (de) Klima-Luft.de
- (en) Entrée am Archiv vun der Royal Society