LUGA 2025

D'Lëtzebuerger Gaardenausstellung 2025, gekierzt LUGA 2025 ((en) Luxembourg Urban Garden), ass déi éischt national Gaardenausstellung déi zu Lëtzebuerg organiséiert gëtt. Déi offiziell Ouverture vun der LUGA ass fir de 7. Mee 2025 virgesinn an d'Ausstellung dauert bis den 18. Oktober 2025.

D'Gaardenausstellung gëtt engersäits um Gebitt vun der Stad Lëtzebuerg - haaptsächlech an der Péitruss, am Stater Park, am Pescatore-Park, an de Quartiere Clausen, Gronn a Pafendall au um Kierchbierger Plateau - an anersäits zu Ettelbréck, als Deel vun der Nordstad organiséiert. Si war ursprénglech fir 2023, tëscht dem 23. Abrëll an dem 23. Oktober geplangt, huet awer am Oktober 2021 missen, wéinst de Suitte vun der COVID-Pandemie, an engem Budget, dee vun 10 op 22 Millioune geklommen ass, ëm zwee Joer no hanne verréckelt ginn.

D'LUGA 2025 soll net just eng reng Gaardenausstellung ginn, mä ë. a. sollen den Image vun de grénge Beruffer, de Gaardebau, de Wäibau a déi landwirtschaftlech Produiten aus dem Land an d'Vitrinn gestallt ginn. Et geet och drëm, fir de Bewosstsinn fir méi Ekologie an de Stied an an den Dierfer eropzesetzen a fir de Sujet vun der Ëmwelterzéiung ze thematiséieren.

Am Géigesaz zu änleche Manifestatiounen am Ausland ass d'LUGA, mat Ausnam vu bestëmmte Manifestatiounen, grondsätzlech gratis a fräi zougänglech.

Et gëtt mat enger hallwer Millioun Visiteure gerechent.

Konzept a Veranstaltungsplazen

Déi véier Haaptsujete sinn:

Natur a Gesellschaft: Stater Park, Pescatore-Park

Bedeelegung vun der Bevëlkerung beim Ubau vu Kulturplanzen op fräiwëlleger Basis, Promotioun vu Gemeinschaftsgäert, Manifestatiounen am Beräich Gesondheet a Sport, Schoulgäert, dynamesch Beliichtung.

Natur pur: Péitrussdall

Renaturéierung vun der Péitruss, Aartendiversitéit an Ekologie, Verschéinerung ronderëm d'Haaptstroossen, Déiereschutz, Notze vum Waasser; Dekoratioun a Moderniséierung vun der Beliichtung am Aquatunnel.

Natur a Kultur: Clausen, Gronn a Pafendall

Verschéinerung vun der Festung, Naturereegnisser an de Kasematten, Manifestatioune ronderëm de Mansfeld an iwwer d'Rousen, Museksinstallatiounen, Beliichtung duerch regenerativ Energiequellen.

Natur a Stadentwécklung: Kierchbierg

Arboretummen, Geseems, Urban Greening, Vertical Greening an Zukunftstechnologien, Gréngs op den Diech an an de Bannenhäff.

Nordstad

Hydrokultur-Installatiounen « myEduGarden by Restopolis », onkonventionell Kulturtechniken

• 
  Stater Park
• 
  Péitrussdall
• 
  Gronn
• 
  Kierchbierg
• 
  Ettelbréck

Organisatioun

D'Gaardenausstellung gëtt vum Ministère fir Landwirtschaft, Wäibau a ländlech Entwécklung a vun der Stad Lëtzebuerg an enker Zesummenaarbecht mam Ministère fir Tourismus, mam Ministère fir Kultur, der Inspection générale des finances an der Fédération horticole organiséiert.

Fir d'Manifestatioun op Basis vun enger étude de faisabilité vum Büro „Neumann & Gusenburger” vun 2016 ze plangen, ze organiséieren an ze betreien, gouf d'Asbl LUGA 2023 gegrënnt. Hire Verwaltungsrot besteet aus aacht Memberen, wouvun der véier vum Staat a véier vun der Stater Gemeng sinn. Dobäi kënnt nach e Member vun der Fédération horticole, deen awer just eng Beobachterfunktioun huet. D'Presidence vum Verwaltungsrot gëtt ofwiesselend fir ee Joer vun engem Member vum Staat a vun der Stad assuréiert. D'Asbl gëtt Enn 2025 opgeléist.

Finanzen

De Budget vun der LUGA 2023 Asbl war ufanks op 10 Milliounen Euro ugesat, déi zu gläichen Deeler vun der Stad Lëtzebuerg a vum Landwirtschaftsministère bäigesteiert ginn. Dës Sue géife fir d'Personal-, d'Verwaltungs- a Betribskäschten, fir d'Koordinatioun vun der LUGA, fir Hiwäisschëlter, fir d'Kommunikatiouns- an d'Ëffentlechkeetsaarbecht a fir d'Kofinanzéierung vu verschiddene Projete gebraucht. 2021 gouf däitlech, dass op d'mannst 22 Millioune gebraucht géifen. Am Mee 2024 gouf dunn e Budget vun 23,4 Milliounen Euro genannt, wouvun allkéiers eelef Millioune vun der Stad Lëtzebuerg an dem Landwirtschaftsministère an 1,4 Milliounen Euro vun der Stad Ettelbréck bäigesteiert ginn.

Literatur

• Diane Lecorsais, Eine Vitrine für das Grüne - Von Mai bis Oktober 2023 soll die Luxemburger Gartenschau Bürger und Besucher begeistern am Luxemburger Wort vum 19. Juli 2019, S. 19 an ënnert dem Titel Eine Gartenschau für Luxemburg op wort.lu
• Amélie Schroeder, Die LUGA nimmt langsam aber sicher Form an, 08.05.2024, wort.lu

Um Spaweck

• Internetsäit vun der LUGA (fr)
• Presentatioun Exposition horticole nationale LUGA 2023 vun der Stad Lëtzebuerg an dem Landwirtschaftsministère (Dokument vum 18.07.2019)
• LUGA - Exposition horticole op der Websäit vun der Stad Lëtzebuerg