Robert Goddard

Vu Wikipedia
Wiesselen op: Navigatioun, sichen
De Robert Goddard
E Film iwwer d'Liewen an d'Rakéite vum Robert Goddard (en)
D'Team vum Robert Goddard no engem Rakéitentest an New Mexico 1932

De Robert Hutchings Goddard, gebuer de 5. Oktober 1882 zu Worcester am Massachusetts, USA a gestuerwen den 10. August 1945 zu Baltimore am Maryland war en amerikanesche Wëssenschaftler a Rakéitepionéier. Seng voll Bedeitung fir d'Technik an d'Raumfaart gouf awer eréischt posthum unerkannt.

De Goddard hat Physik un der Clark University in Worcester (Massachusetts) studéiert, a krut 1910 säi Master. D'Joer drop hat hie promovéiert.

Ähnlech wéi den Hermann Oberth hat sech och de Robert Goddard fréizäiteg Gedanken iwwer Raumflich zum Äerdmound an zum Mars gemaach. Wéinst senge futuristeschen Raumfluchvisiounen gouf hien awer als Phantast ofgedunn a war a Bezuch op d'Raumfaart bal ganz vergiess ginn.

Méi erfollegräich war de Goddard am Beräich vun der Rakéitentwécklung. Hien hat schonn ëm 1918 eng militäresch Feststoffrakéit an och de Prototyp vun der Bazooka, enger Panzerofwierrakéit entwéckelt. D'Bazooka gouf eréischt nom Enn vum Éischte Weltkrich fäerdeggestallt a koum sou eréischt am Zweete Weltkrich zum Asaz.

Hien hat net nëmmen déi mathematesch Grondlagen vum Rakéitenundriff an eng praktikabel Technik vu Rakéitentester (Dreifwierks-Préifstand asw.) entwéckelt, mä hien hat och bewisen, datt Rakéitenundriff am Vakuum Schub produzéiere kënnen, wat d'Raumfaart eréischt méiglech gemaach huet.

Vu 1916 beschäftegt sech de Goddard mat der Entwécklung vu Flëssegkeetsrakéiten. D'Smithsonian Institution (kuckt och SAO) hat de Goddard dobäi finanziell ënerstëtzt. Den éischte Brennversuch vun engem Rakéitemodell war de 6. Dezember 1925, en éischten erfollegräichr Rakéitestart war de 16. Mäerz 1926. Obwuel dës Rakéit nëmmen 2,5 Sekonnen an der Luucht war, nëmme 50 m wäit a nëmme knapps 14 m héich geflu war, hat dëst bewisen, datt dem Goddard seng Rakéitendreem Wirklechkeet kënnte ginn.

De 17. Juli 1929 hat de Goddard dann déi éischt flëssegkeetsgedriwwe Rakéit mat enger wëssenschaftlechen Notzlaascht gestart. U Bord waren e Barometer, en Thermometer an eng Kamera. D'Rakéit hat eng Héicht vu 27 Meter erreecht. Duerch de Geräisch beim Start bekoum hien deemools e puer Problemer mat den Administratiounen an et gouf him e Startverbuet fir seng Rakéiten am Massachusetts erdeelt. Duerch déi folgend Zeitungsberichter gouf de Charles Lindbergh op de Goddard opmierksam an hat den Daniel Guggenheim dofir op seng Säit gezunn, fir d'Rakéiteversich ze ënnerstëtzen.

Den Robert H. Goddard op engem US-amerikaneschen Timber (1964)

Vun Oktober 1930 huet de Goddard zu Roswell geschafft an hat et do erreecht, firm at sengem fënneften Rakéitestart nei Bestwäerter ze kréien. D'Rakéit hat eng Héichr vun 610 Meter erreecht a war mat 800 km/h geflunn. Heibäi ass dem Goddard d'Problem vun der Fluchstabiliséierung bewosst ginn.

No knapps dräi Joer Paus gouf den 8. Mäerz 1935 eng Rakéit, déi als éischt mat enger Vitesse vun 1125 km/h d'Schallmauer duerchbrach hat. Den 28. Mäerz 1935 hat hie mat weidere Starten eng kreeselstabiliséiert Rakéiten den Duerchbroch realiséiert. D'Rakéit hat eng Héicht vu 1460 Meter erreecht a war bal 4000 Meter wäit geflunn.

De Goddard war 1945 am Alter vu 63 Joer un Keelkappkribs gestuerwen.

Eréischt bei der Wéiderentwécklung vun de Rakéiten nom Zweete Weltkrich gouf him déi verdéngten Unerkennung zougeschwat – ënner anerem duerch d'Nummgiewung vum Goddard Space Flight Center.

De Moundkrater Goddard ass och no him genannt.

Kuckt och[änneren | Quelltext änneren]

Saturn 01.svg Portal Astronomie


Um Spaweck[änneren | Quelltext änneren]

Commons: Robert Goddard – Biller, Videoen oder Audiodateien