Goodyear-Dunlop Colmar-Berg

Vu Wikipedia
Op d'Navigatioun wiesselen Op d'Siche wiesselen

Goodyear-Dunlop Tires Operations SA ass eng Filial vun der Goodyear Tire & Rubber Company, déi zu Colmar-Bierg, Biissen an Diddeleng e Pneue-Komplex bedreift. Zum Komplex gehéieren Tire Plant, Luxembourg Mounting Center (LMC), Mold Plant, Tire Test Center, Regional Calendaring Center Europe (RCC*E), Goodyear Innovation Center Luxembourg (GIC*L), Luxembourg Automotive Campus an eng Testpist[1]

Haut schaffe ronn 3570 Leit fir d'Firma zu Lëtzebuerg[2]. 2016 huet Goodyear 1,6 Millioune Pneuen zu Lëtzebuerg produzéiert[3].

Grouss Deeler vum Komplex 2020.

Den éischte Pneu gouf 1951 an der Tire Plant produzéiert.

Mataarbechter bei der Goodyear zu Lëtzebuerg[4][5]

De 27. Juli 1949 gouf d'Goodyear S.A. gegrënnt, déi dat éischt Goodyear Wierk am kontinentalen Europa an dat 35. weltwäit bedriwwen huet.

D'Tire Plant 1964 mam Schmëtteknapp.

Tire Plant[änneren | Quelltext änneren]

D'Pneueproduktioun huet 1951 an der Tire Plant mat ongeféier 300 Mataarbechter ugefaangen, déi ronn 500 Pneuen pro Dag produzéiert hunn[6].

Se gouf op der Plaz vun enger aler Kalleks- an Zementsfabréck, der Chauxdolux, déi et vun ongeféier 1920 bis 1936 gouf, opgeriicht[7]. D'Kalleksfabréck koum no der Colmer Schmelz déi 1919 zou gemaach huet[8][9][10].

D'Fabréck grad sou wéi den ugrenzende Parking goufe bis an d'2010er ëmmer rëm vergréissert. Mat de Joren ass sou de Schmëtteknapp vun der Kaart verschwonnen.

Wou fréier Fliger- an Autospneuen gebaut goufen, sinn et haut Camions- a sougenannt Earthmover oder Off-The-Road (OTR) Pneuen[11][12].

GIC*L[änneren | Quelltext änneren]

De Komplex zu Lëtzebuerg gouf 1957 mam Pneuefuerschungszentrum Technical Center erweidert.1969 gouf deen als GITC (Goodyear International Corporation Tire Technical Center), iwwert d'Joren an GTC*L (Goodyear Technical Center Luxembourg), an GIC*L emgebaut oder ëmgenannt. 2018 hätt de ganze GIC*L, mat iwwer 1000 Mataarbechter, zesumme mat engem Fuerschungsdepartement vun IEE an den Luxembourg Automotive Campus plënnere sollen[13][14]. Aus dem GIC*L komme reegelméisseg Konzeptpneuen[15].

Mold Plant[änneren | Quelltext änneren]

No der Ukënnegung 1969, ass 1970 déi deemoleg Luxmold opgaangen, an där nach haut Formen aus Aluminium a Stol fir d'Hierstellung vu Pneuen produzéiert ginn.

RCC*E[änneren | Quelltext änneren]

1997 ass de Regional Calendaring Center Europe opgaangen. Am RCC*E gëtt de Stoff mat Gummi verstäerkt[16].

LMC[änneren | Quelltext änneren]

Am Joer 2000 gouf d'Firma Luxembourg Mounting Center S.A. gegrënnt déi zanter 2001 eng ronn 8000 Camionspneuen pro Dag op Felgen opzitt[10][16].

Fabric Plant[änneren | Quelltext änneren]

1969 huet d'Produktioun an der Luxyold, spéider Fabric Plant, ugefaangen, an där d'Textileinlage fir d'Pneuen hiergestallt gëtt[3]. 2006 ass d'Gebai un déi südkoreanesch Hyosung verkaaft ginn.

Wire Plant[änneren | Quelltext änneren]

D'Wire Plant, déi Drot fir Pneue produzéiert huet, ass 1971 opgaangen. Nom Verkaf un Hyosung 2011, ass d'Fabréck 2012 zougemaach ginn. Haut steet do de Luxembourg Automotive Campus.

Mercury Plant[änneren | Quelltext änneren]

Uganks Mee 2022 ass d'Mercury Plant, déi zanter 2018 zu Diddeleng am Bau war, offiziell ageweit ginn. An der automatiséierter Fabrick gi mat engem digitaliséierte Procedé Pneuen a klenger Stéckzuel an Ersatzpneuen op Commande produzéiert. D'Goodyear Tire & Rubber Company huet 73 Milliounen Euro investéiert fir d'Wierk zu Diddeleng opzeriichten[17].

Circuit[änneren | Quelltext änneren]

Den Testcircuit goung 1970 op[4]. Déi längst Variant huet 3.260 Meter an 12 Kéieren[18]. De Circuit gëtt quasi exklusiv vu Goodyear benotzt fir Pneuen ze testen. Zanter 2013 organiséiert den HSRCL e puer Courssen, Trackdays an Testdays pro Joer um Circuit[19][20]. Sporadesch ginn och Motoscourssen organiséiert[21]. Bis 2011 huet d'Écurie Motoclub Goodyear heiansdo Evenementer organiséiert[22].

Kuckt och[änneren | Quelltext änneren]

Referenzen[Quelltext änneren]

  1. (en)GOODYEAR All Season Press Event (11 October 2017). Gekuckt de(n) 22 November 2021.
  2. (fr)Luxembourg en chiffres 2021. STATEC. Gekuckt de(n) 22 November 2021.
  3. 3,0 3,1 (en)Goodyear ─ The pioneer of economic diversification in Luxembourg (13 August 2018). Gekuckt de(n) 24 November 2021.
  4. 4,0 4,1 (de)Schweizerische Bauzeitung, Zwei Jahrzehnte Reifenproduktion in Colmar-Berg, Luxemburg (1972). Gekuckt de(n) 22 November 2021.
  5. (fr)Liste des principaux employeurs au 1er janvier 2003 - 2021. STATEC. Gekuckt de(n) 24 November 2021.
  6. (de)Goodyear: Bau des ersten Reifens in Colmar-Berg vor 70 Jahren. auto revue (29 Januar 2021). Gekuckt de(n) 22 November 2021.
  7. (fr)Chauxdolux. industrie.lu. Gekuckt de(n) 21 November 2021.
  8. (fr)Kolmer Schmelz. industrie.lu. Gekuckt de(n) 21 November 2021.
  9. (fr)Histoire de la commune. Gemeng Colmer-Bierg. Gekuckt de(n) 22 November 2021.
  10. 10,0 10,1 (fr)Goodyear. industrie.lu. Gekuckt de(n) 21 November 2021.
  11. (en)Goodyear ─ The pioneer of economic diversification in Luxembourg. tradeandinvest.lu. Gekuckt de(n) 21 November 2021.
  12. (en)Goodyear moving niche car tire production. Gekuckt de(n) 21 November 2021.
  13. (fr)Étienne Schneider présente le futur Luxembourg Automotive Campus dédié à la recherche et à l'innovation dans le secteur automobile. Ministère de l'Economie (24 März 2016). Gekuckt de(n) 22 November 2021.
  14. (fr)Automotive Campus: le projet piétine. wort.lu (11 Juli 2017). Gekuckt de(n) 22 November 2021.
  15. (fr)Goodyear, Goodyear : des concepts de pneus élaborés à Colmar-Berg. science.lu (23 Juli 2019). Gekuckt de(n) 24 November 2021.
  16. 16,0 16,1 (en)Goodyear. Gekuckt de(n) 24 November 2021.
  17. Marco Meng, Science Fiction in der Reifenfabrik, Luxemburger Wort, 6. Mee 2022, S. 10
  18. (de)Streckendaten - Circuit Goodyear Test Track (Colmar-Berg). Gekuckt de(n) 24 November 2021.
  19. (fr)HSRCL Nos Albums. hsrcl.lu. Gekuckt de(n) 24 November 2021.
  20. (fr)Calendriers 2021. ACL Sport. Gekuckt de(n) 24 November 2021.
  21. (de)Motorenruhe im Geburtstagsjahr - 10. Geburtstag HSRCL. ACL Sport (15 Juni 2020). Gekuckt de(n) 24 November 2021.
  22. Goodyear-Circuit: Keng Coursë [sic] méi zu Colmar-Bierg?