Hammbier

Hammbier
	Rubus idaeus
Wëssenschaftlech Klassifikatioun
Räich	Planzeräich
Ofdeelung	Bléieplanzen
Klass	Magnoliopsida
Ënnerklass	Rosidae
Uerdnung	Rosales
Famill	Rosaceae
Gattung	Rubus
Wëssenschaftlechen Numm
	Rubus idaeus
	L.

Hammbier (Rubus idaeus) ass den Numm vun enger Fruucht a vum Trausch, op deem se wiisst. Et ass eng Planzen aart vun der Gattung Rubus aus der Ënnergattung Idaeobatus.

D'Hammbier kënnt wëll a bal ganz Europa vir, wou et meeschtens um Bord vu Bëscher wiisst. Zanter der Antiquitéit ass et als Heelplanz bekannt, an zanter dem Mëttelalter gëtt et och a Gäert gezillt, am Ufank besonnesch a Kléischter.

Den Hammbiertrausch gëtt bis zu zwéi Meter héich, op de Rudde sëtzen dënn Stachelen.

Tëscht Mee an August wuesse vun den eenzele Schëtz aus Kludderen (de: „Rispen“) vu wäisse Bléien. All Bléi huet jee 5 Kielech- a Krounblieder an iwwer 20 Stëbs- a Fruuchtblieder. De Buedem vun der Bléi ass staark no bausse verwëlleft.

D'Friichten, déi meeschtens rout sinn (et gëtt och giel a schwaarz Zuuchtformen), sinn, anescht wéi den Numm et mengen deet, botanesch gesi keng Bieren, mä Sammelsteefriichten, déi sech aus den eenzele Fruuchtblieder bilden. Anescht wéi beim Schwaarzbier sëtzt d'Fruucht labber um Fruuchtbuedem a ka liicht gepléckt ginn.

Hammbier huet en héije Vitaminnegehalt a ka réi giess ginn, zu Sirup, Kompott, Coulis oder Gebeess verkacht oder als Belag an der Pâtisserie gebraucht ginn. Och an Drëppen oder am Béier kann et fir de Geschmaach bäigemëscht ginn.

Literatur

Helminger, Thierry, 1992. Liste der in Luxemburg wildwachsenden Brombeeren (Rubus L. Subgenus Rubus). Bulletin de la Société des naturalistes luxembourgeois 93: 99-111.
Helminger T., 2009. Checklist of the brambles (Rubus L. subgenus Rubus, Rosaceae) of Luxembourg. Bull. Soc. Nat. luxemb. 110: 53-67.

Hammbier
Bléi
grénge Fruuchtstand
Hammbierdessert mat frëschem Kéis an Hunneg

Um Spaweck

Commons: Rubus idaeus – Biller, Videoen oder Audiodateien