Juristesch Persoun
|
Dësen Artikel gehéiert zur Serie vun den Droits-Artikelen. Dës Explikatioune bezéie sech am Prinzip just op dat lëtzebuergescht Recht. Ënner Ëmstänn goufen déi lescht Changementer an der Legislatioun an/oder der Jurisprudenz nach net berécksichtegt. Et handelt sech och net ëm e juristesche Rot, mä ëm eng vereinfacht Duerstellung fir Laien. A konkreete Fäll soll ee sech ëmmer un en Affekot wennen! |
Juristesch Persoun (och nach moralesch Persoun) ass e Begrëff aus dem Droit a bezitt sech op eng Entitéit déi eng juristesch Perséinlechkeet (oder Rechtsperséinlechkeet, (fr) personnalité juridique) huet, déi et hir erméiglecht Rechter a Flichten auszeüben, aplaz vun den (natierlechen oder juristesche) Persounen déi d'Entitéit gegrënnt hunn. Et handelt sech beispillsweis ëm Gesellschaften, Veräiner, asw.
Am Géigesaz zu der juristescher Persoun steet d'physesch Persoun. Béides si Persounen.
„Gebuert” vun enger juristescher Persoun[änneren | Quelltext änneren]
Handelsgesellschaften[änneren | Quelltext änneren]
Net all Handelsgesellschaft ((fr)société commerciale) huet eng juristesch Perséinlechkeet, well se a verschiddene Fäll keng eegen, ma nëmmen d'juristesch Perséinlechkeet vun hiren Associéen huet.
Méi Info hei drënner an der Iwwersiicht.
Sou sinn eng momentan Gesellschaft ((fr) société momentanée), eng Bedeelegungsgesellschaft ((fr) société en participation) an eng speziell Kommanditgesellschaft ((fr) société en commandite spéciale) keng juristesch Persounen, d'speziell Kommanditgesellschaft muss doriwwer eraus awer trotzdeem am Handelsregëster ageschriwwe ginn.
Gebuertsdatum vun der juristescher Persoun[änneren | Quelltext änneren]
D'juristesch Perséinlechkeet vun der Gesellschaft fänkt mat der Ënnerschrëft vun de Statuten un, ausser déi gesinn en aneren Datum vir. Eng Gesellschaft ass also direkt vum Ament vun hirer Grënnung u prinzipiell handlungsfäeg (muss awer jee nodeem wéi nach aner Autorisatioune froe wéi z. B. eng Handelsermächtegung). D'Verëffentlechung vun de Statuten am RESA déngt just dozou, datt d'Grënnung vun der Gesellschaft Drëtten entgéintgehale ka ginn an datt d'Gesellschaft op d'Geriicht kann zéien.
Aner Gesellschaften[änneren | Quelltext änneren]
Iwwerdeems eng Zivilgesellschaft, eng Asbl oder e GIE juristesch Persoune sinn, ass eng Filial (Succursale) et net. Och eng individuell Entreprise - am Géigesaz zu enger Handelsgesellschaft - däerf wuel eng Handwierksaktivitéit maachen (wa se bis hir Handelsermächtegung huet), huet awer keng aner Rechtsperséinlechkeet wéi déi vun hirem Patron.
Identifikatioun vun enger juristescher Persoun[änneren | Quelltext änneren]
Eng juristesch Persoun huet als eege juristesch Perséinlechkeet en Numm (eng Bezeechnung), e Sëtz an eng Nationalitéit.
Numm[1][änneren | Quelltext änneren]
All Handelsgesellschaft duerch d'Form, Zivilgesellschaft, Asbl, Stëftung etc. (mee och d'speziell Kommanditgesellschaft obwuel dat keng juristesch Persoun ass) ginn duerch eng Firmebezeechnung ((fr) dénomination sociale) qualifizéiert. Dës Bezeechnung muss sech vun all aner lëtzebuergescher Gesellschaft ënnerscheeden.
Nëmmen europäesch Gesellschaften däerfen de Kierzel „SE” an hirer Firmebezeechnung hunn.
All juristesch Persoun zu Lëtzebuerg kritt och eng national Identifikatiounsnummer.
Gesellschaftssëtz[1],[2][änneren | Quelltext änneren]
Eng Gesellschaft muss en offizielle Sëtz hunn, an dee muss an de Statuten ugi ginn.
Den Domicile vun der Gesellschaft ass do, wou d'Zentralverwaltung vun der Gesellschaft ass, an déi ass op där Plaz déi an de Statuten ugi gouf ausser et kéint de Beweis erbruecht ginn datt en enzwousch aneschters ass.
Nationalitéit[3][änneren | Quelltext änneren]
D'Nationalitéit vun enger Gesellschaft ass relativ wichteg, well si ass den Haaptfaktor dee bestëmmt wat fir Gesetzer op d'Gesellschaft zoutreffen. Fir festzestellen, ob eng Gesellschaft d'Lëtzebuerger Nationalitéit huet oder net, gëtt gekuckt ob se hiren Domicile am Land huet, a wéi dee festgeluecht gëtt steet just hei driwwer.
Eng Gesellschaft kann awer och eng duebel Nationalitéit hunn, da sinn d'Gesetzer vun zwee Länner op d'Gesellschaft unzewennen. Dat ass meeschtens dat bossegt Resultat vu widerspréchlechen Nationalitéiten- oder Sëtzgesetzer vun den zwee betraffene Länner, sou betruecht z. B. Groussbritannien eng Gesellschaft ëmmer als brittesch wa se do gegrënnt gouf, och wa se mëttlerweil hir Zentralverwaltung (an eigentlech och hire Sëtz) op Lëtzebuerg verluecht huet a Lëtzebuerg dowéinst och ufängt seng Gesetzer z'applizéieren.
Iwwersiicht[änneren | Quelltext änneren]
| Form | juristesch Persoun | Aschreiwung am Handelsregëster[4] |
|---|---|---|
| Association sans but lucratif (Asbl) | jo | jo |
| Geschäftsleit | nee | jo |
| Société anonyme (SA) | jo | jo |
| Société par actions simplifiée (SAS) | jo | jo |
| Société à responsabilité limitée (Sàrl) | jo | jo |
| Société à responsabilité limitée simplifiée (Sàrl-s) | jo | jo |
| Société en nom collectif (SENC) | jo | jo |
| Société en commandite simple (SCS) | jo | jo |
| Société en commandite spéciale (SCSp) | nee | jo |
| Société en commandite par actions (SCA) | jo | jo |
| Société coopérative (SCOP) | jo | jo |
| Société européenne (SE) | jo | jo |
| Groupement d'intérêt économique (GIE) | jo | jo |
| Groupement européen d'intérêt économique (GEIE) | jo | jo |
| Zivilgesellschaft (SC) | jo | jo |
| Stëftung | jo | jo |
| Société en participation (SEP) | nee | nee |
| Société momentanée | nee | nee |
| Succursale | nee | jo (lëtzebuergesch Filial vun enger lëtzebuergescher oder auslännescher Entreprise) |
Um Spaweck[änneren | Quelltext änneren]
- Loi modifiée du 10 août 1915 concernant les sociétés commerciales, hei verlinkt an der koordinéierter Fassung vum groussherzogleche Reglement vum 5. Dezember 2017, déi mëttlerweil awer och net méi aktuell ass
- Loi du 19 décembre 2002 concernant le registre de commerce et des sociétés ainsi que la comptabilité et les comptes annuels des entreprises, hei verlinkt an der Urfassung, mat op der Säit Referenzen op d'Ännerungen
Referenzen an Notten[Quelltext änneren]
- ↑ 1,0 1,1 Artikel 100-5 vum modifizéierte Gesetz vum 10. August 1915 iwwer d'Handelsgesellschaften
- ↑ Fiche 3. - La notion de personne morale. www.cdm.lu. Gekuckt de(n) 29.09.2020.
- ↑ Artikel 1300-2 vum modifizéierte Gesetz vum 10. August 1915 iwwer d'Handelsgesellschaften
- ↑ Artikel 1 vum modifizéierte Gesetz vum 19. Dezember 2002 iwwer den Handelsregëster, d'Comptabilitéit an de Joresofschloss vun den Entreprisen