Käicher

Käicher

Käicher: Habitus a Friichten
Wëssenschaftlech Klassifikatioun
Räich	Planzeräich
Stamm	Cicereae
Ofdeelung	Bléieplanzen
Klass	Rosopsida
Uerdnung	Fabales
Famill	Fabaceae
Ënnerfamill	Faboideae
Gattung	Käicheren (Cicer)
Wëssenschaftlechen Numm
Cicer arietinum
L.

Zeideg Fruucht

D'Käicher an der Scheek

Käichereproduktioun 2013

De Käicher (Cicer arietinum) ass eng Planzenaart aus der Gattung Käicheren (Cicer) an der Ënnerfamill Faboideae bannent der Famill vun den Scheekefriichten (Fabaceae). Trotz hirem däitschen oder franséischen Numm (Kichererbse, resp. pois chiche) ass se net weider Famill mat der Ierbes (Pisum sativum).

Beschreiwung

De Käicher ass eng eejäreg krauteg Planz, déi bis zu 1 Meter héich gëtt. D'Bléie kënne purpurrout, mof, violett oder wäiss sinn a ginn 10 bis 12 mm grouss.

An de ronn 3 cm grousse Scheeken, déi sech draus entwéckelen, si gewéinlech 2 onreegelméisseg geformte Somen déi däischter beige bis schwaarz sinn. Dës kënne giess ginn.

Verbreedung

A Klengasien gouf de Käicher scho virun 8000 Joer ugebaut, a gouf vun do am ganze Mëttelmierraum a bis an Indien verbreet. Méi spéit ass en duerch d'Réimer och nërdlech vun den Alpen agefouert ginn.

An der Kichen

De gedréchente Som vum Käicher gëtt am Waasser opgeweecht an da gekacht. Duerno komme s'entweeder a Plate wéi Couscous, Tajine oder Cocido Madrilleno. Se kënnen awer och püréiert ginn - dat gëtt dann Houmous genannt - oder graff gemuelen, als Falafel (frittéiert kleng Bullen) verschafft ginn. De Som kann awer och einfach geréischtert gi wéi Nëss, oder zu Miel gemuelen an da gebak.

• 

  Gedréchent Käicheren

• 

  E Cocido: Gekacht Käicheren, mat ë. a. Poulet, Muerten an Zellerie.

Weltproduktioun

Indien ass haut den Haaptliwwerant vu Käicheren, duerno kënnt Pakistan an d'Tierkei.

Déi 10 gréisst Käichereproduzenten

Land	Produktioun (Tonnen/Joer)	Informatioun
Indien	5 970 000
Pakistan	842 000
Tierkei	523 000
Australien	313 000
Iran	310 000	Geschat
Myanmar	225 000	Geschat
Kanada	215 000
Ethiopien	190 000	Geschat
Mexiko	165 000	Geschat
Irak	85 000	Geschat
Welt	≈ 9 000 000

Um Spaweck

Commons: Cicer arietinum – Biller, Videoen oder Audiodateien