Lux-Development

Lux-Development S.A.
Typ	Société anonyme
Grënnungsdatum	1978
Sëtz	Lëtzebuerg, Stad Lëtzebuerg
Mataarbechter	644
Produit	Entwécklungszesummenaarbecht
Homepage	https://www.luxdev.lu/fr

Schëld um Chantier vun enger Schoul déi Luxembourg Cooperation am Kosovo baut (2012)

Bureau zu Praia, Cap Vert.

Lux-Development S.A., besser bekannt als LuxDev, ass d'Agence déi d'Entwécklungszesummenaarbecht vun der Lëtzebuerger Regierung ëmsetzt.

Si gouf 1978 als Agence fir d'Ënnerstëtze vu klengen a mëttelgrousse lëtzebuergesche Betriber gegrënnt an ass eréischt zanter 1992 op Entwécklungszesummenaarbecht ausgeriicht. Haut ass et eng Aktiegesellschaft (S.A.) där hir Aktionären de Lëtzebuerger Staat (98 %) an d'Société nationale de crédit et d'investissement (2 %), déi och dem Staat gehéiert, sinn.

LuxDev huet hire Sëtz beim Rousegäertchen an der Stad Lëtzebuerg, mä huet och regional Büroen zu Priština (Kosovo), Dakar (Senegal), Praia (Kap Verde), Ouagadougou (Burkina Faso), Bamako (Mali), Kigali (Ruanda), Cotonou (Benin), Vientiane (Laos), a San José (Costa Rica).

Missioun

LuxDev geréiert bal all d'Ressourcen, déi d'Regierung der bilateraler Entwécklungszesummenaarbecht zouweist. D'Agence kann awer och Programmer exekutéieren, déi vun anere bilateralen Donneuren oder vun der Europäescher Kommissioun finanzéiert ginn.

Aarbechtsberäich

D'Agence këmmert sech ëm Projeten a follgenden Haaptsecteuren: Landwirtschaft, Bëschaarbecht a Fëscherei, Digitaliséierung an ICT, Educatioun, Beruffsausbildung a Beschäftegung, Ëmwelt a Klimawandel, Gouvernance, Gesondheet, an Investissementer mat sozialem Impakt (engl: Impact investing), sozio-ekonomesch Entwécklung a Waasser a Sanitär.

D'Programmer konzentréiere sech op de Benin, de Burkina Faso, Cape Verde, de Kambodja, de Costa Rica, DR Congo, El Salvador, de Laos, de Mali, d'Mongolei, de Kosovo, de Ruanda, de Senegal, Togo, d'Ukrain an de Vietnam.

Zuelen

2024 huet LuxDev 89 Projete geréiert an eng Gesamtzomm vun 144.364.226 Euro ausginn.