Victoria (Marskrater)

Vu Wikipedia
Wiesselen op: Navigatioun, sichen
Victoria (Marskrater)
De Victoria-Krater
Eegeschaften
Regioun Meridiani Planum
Breet -2.05
Längt -5.50
Duerchmiesser 730 m
Déift 70 m
Entdecker Opportunity
Genannt nom Schëff Victoria

De Victoria-Krater ass en Aschlagkrater um Planéit Mars. Hien ass am Meridiani Planum a läit op 5,50° W an 2,05° S. Hie gouf vum Rover Opportunity besicht. Mat enger Breet vu ronn 730 m an enger Déift vu 70 m ass hie bal aachtmol méi grouss wéi den Endurance-Krater. De Victoria-Krater gouf nom Schëff Victoria, engem vun de fënnef Schëffer vum Ferdinand Magellan an dat éischt Schëff, dat eng Äerdëmsegelung gemaach hat, genannt.

De Victoria-Krater ass interessant fir d'Wëssenschaftler, well hie bitt d'Méiglechkeet, mam Rover Opportunity méi déif geologesch Strukturen op der Uewerfläch ze ënnersichen, déi Réckschlëss op d'Entwécklungsgeschicht vum Mars zouloossen. Sou leien un de géie Ramplie vum Krater bis zu 30 m grouss Sedimentschichten.

Den Opportunity hat 21 Méint gebraucht, fir de Victoria-Krater de 26. September 2006 (Sol 951) an der „Duck Bay“ z'erreechen. An der noer Ëmgéigend vum Krater goufe weider Objete genannt: „No Name“, „Duck Crater“, „Emma Dean“, „Maid of the Canyon“ a „Kitty Clyde’s Sister“.

Den 29. August 2008 ass den Opportunity nees aus dem Krater erausgefuer an huet sech op de Wee bei den Endeavour-Krater gemaach deen 12 Kilometer dovun ewech läit an deen en am August 2011 erreecht hat.

Resultater vun den Ënnersich[änneren | Quelltext änneren]

Beim Krater hu sech géi Klippen a flaach Abuchtungen laanscht de Rand ofgewiesselt. Duerch déi Strukture léisst sech ofschätzen, datt de Krater fréier méi kleng war wéi haut an duerch Wanderosioun ëm 25 Prozent méi grouss gouf. Bäileefeg gouf hie mat Sand opgefëllt. D'Klippen hu Fielse mat Schichtstrukturen, déi bis zu 9 m déck sinn. Déi visuell Schichtmusteren deiten drop hinn, datt d'Fielse fréier Wanderdüne sinn, déi sech spéider ënner dem Afloss vu Waasser zu Sandsteen verfestegt hunn.

Och am Gestengs vum Victoria-Krater goufen déi sougenannt „Blueberries“ fonnt. Dës Steekugele goufen iwwerall op der Meridiani-Fläch fonnt. Si bilde sech normalerweis, wa Waasser Gestengs duerchdréngt. Well d'Kugelen an den déiwe Lage vum Krater méi grouss si wéi déi op méi héije Lagen, gëtt dovun ausgaangen, datt den Afloss vum Grondwaasser an den déiwe Lagen méi intensiv war.

Um Rand vum Krater goufe Meteorittestécker fonnt, déi eventuell zum Impaktor gehéiert hunn, deen de Krater gebilt hat.

Bei der Analys vun der Abuchtung mam Numm „Duck Bay“ gouf festgestallt, datt sech déi ënnescht Schichten an der chemescher Zesummesetzung vun den ieweschten ënnerscheeden (déi ënnescht Lagen hu manner Schwiefel an Eisen, awer méi Aluminium a Silizium). Dës Zweedeelung gouf och am Endurance-Krater op 6 km Distanz festgestallt. Doraus kann e schléissen, datt d'Konditioune vun der Ëmgéigend, déi d'Gestengs verännert hunn, regionale Charakter haten, an net nëmme lokal gewierkt hunn.[1]

Panorama[änneren | Quelltext änneren]

Dëst Panoramabild (zimlech no bei de richtege Faarwen) ass zesummegesat aus Eenzelfotoen déi vum MER Opportunity an engem Zäitraum vun dräi Wochen (vum 6. Oktober bis 6. November 2006) opgeholl goufen

Kuckt och[änneren | Quelltext änneren]

Saturn 01.svg Portal Astronomie

Um Spaweck[änneren | Quelltext änneren]

Commons: Victoria-Krater – Biller, Videoen oder Audiodateien

Referenzen[änneren | Quelltext änneren]