Äerduewerfläch

D'Äerduewerfläch ass d'Grenzschicht tëscht der fester Äerdkuuscht oder den Ozeanen op der enger an der Atmosphär op der anerer Säit. Si léisst sech no verschiddene Krittären an Hemisphären (vum griicheschen ἥμισυς hemisys „hallef“ a σφαῖρα sfaira „Kugel“) an Hallefkugelen andeelen, also an Hallschente vun der Äerduewerfläch.

Terrainshéichten op der Äerduewerfläch ginn op de mëttlere Mieresspigel bezunn. Dës Niveaufläch – d'Geoid – huet bal d'Form vun engem Ellipsoid an eng Uewerfläch vu 510 Millioune km², wouvu 70,8 % vu Miere bedeckt sinn.

Kuckt heizou den Artikel Äerd

Geowëssenschaften

Weltkaart vum İbrahim Hakkı Erzurumi, 1756, mat Nord- a Südhallefkugel

Weltkaart vum Pieter van der Aa, fréit 18. Jh., mat Aler an Neier Welt

D'Geographie beschäftegt sech mat de Groussforme vun der Äerduewerfläch an hire Systemzesummenhäng.
D'Geomorphologie (Deel vun der Geographie) erfuerscht déi genee Form (de Relief) vun der Äerduewerfläch a (zesumme mat der Geologie) säin Entstoen.
D'Geodesie befaasst sech mat der Vermiessung vun der Äerduewerfläch an hirer Infrastruktur, souwéi – zesumme mat der Geophysik – mat dem Äerdschwéierfeld.
D'Pedologie ënnersicht déi iewescht, organesch Schicht vun der Äerduewerfläch.

De Buedem ass déi iewescht Verwitterungsschicht vun der Lithosphär (Gestengsmantel) an entsteet duerch Virgäng vun der Verwitterung an der Humusbildung, bei där Aflëss vu ville Geofaktoren zesummewierken. Duerch Verwitterung an aner exogen Prozesser gëtt déi iewescht Gestengsschicht vun der Äerdkuuscht zerklengert. Jee no Grad vun der Verwitterung an de cheemeschen Eegenschafte vum Gestengs entstinn ënnerschiddlech Buedemaerten a Buedemschichten.

Glidderung no Hemisphären

Geodesie: D'Nord- an d'Südhemisphär, wéi si sech aus der Breet respektiv dem Äerdequator erginn, souwéi d'ëstlech an d''westlech Hemisphär, nom Längegrad a Funktioun vum Nullmeridian.
Geomorphologie: D'Waasserhemisphär ëmfaasst de ganze pazifesche Raum an ass zu 89 % vun Ozeane bedeckt, d'Landhemisphär ëmfaasst den atlantesche Raum an Eurasien mat ongeféier 50 % Festland.

Daten

D'Uewerfläch vun der Äerd huet 510 Millioune km².

Landfläch

Den Undeel vun der Landfläch ass ongeféier 148,9 Mio. km² (29 %); d'Land verdeelt sech op Kontinenter an Inselen:^[1]

Kontinent	Landfläch	%	Küst
Asien (ouni Polarinselen)	044,4 Mio. km²	031 %	057.000 km
Amerika (ouni Polargebidder)	038,3 Mio. km²	027 %	064.500 km
Afrika	029,3 Mio. km²	020 %	026.000 km
Antarktika	013,2 Mio. km²	009 %
Europa (ouni Island, Nowaja Semlja, atlantesch Inselen)	009,9 Mio. km²	007 %	031.460 km
Australien (mat Tasmanien)	007,7 Mio. km²	005 %	034.000 km
total	148,9 Mio. km²	100 %	356.000 km

D'total Längt vun de Küsten ass ongeféier 356.000 km.

Waasserfläch

Den Undeel vun der Waasserfläch ass zirka 361,2 Mio. km² (71 %); d'Waasser verdeelt sech haaptsächlech op d'Ozeanen:

Ozean	%	mëttelst Déift
Pazifeschen Ozean	47 %	3870 m
Atlanteschen Ozean	24 %	3380 m
Indeschen Ozean	20 %	3600 m
Südlechen Ozean	05 %
Arkteschen Ozean	04 %

Héichten

Déi mëttelst Héicht vun den dréchenen Äerduewerflächendeeler berechent een op ongeféier 700 m (Europa 300 m, Asien 880 m, Amerika 610 m, Afrika 660 m, Ozeanien an Australien 300 m). hiren héchste Punkt op der Äerduewerfläch ass de Mount Everest mat 8.848 Meter, den déifste fräi zougängleche Punkt vun der Äerduewerfläch ass d'Doudegt Mier, deem seng Waasseruewerfläch – an Uferberäich – 423 Meter ënner dem normale Mierespiegel läit. Déift an der Moyenne vun de Mierer läit bei 3.500 m.

Aner Himmelskierper

Verglach vun der Äerduewerfläch mat aneren Himmelskierper:

Himmelskierper	Uewerfläch a km²
Jupiter	61.420.000.000
Saturn	42.610.000.000
Uranus	8.083.000.000
Neptun	7.620.000.000
Äerd	510.100.000
Venus	460.200.000
Mars	144.600.000
Merkur	74.760.000
Äerdmound	37.960.000