Buerg Falkesteen

Dësen Artikel iwwer eng Buerg oder e Schlass ass eréischt just eng Skizz. Wann Dir méi iwwer dëst Theema wësst, sidd Dir häerzlech invitéiert, aus dëse puer Sätz e richtegen Artikel ze schreiwen. Wann Dir beim Schreiwen Hëllef braucht, da luusst bis an d'FAQ eran.

Falkesteen

Land

Däitschland

Plaz

Waldhof-Falkenstein

Koordinaten

49° 58’ 10.39’’ N
06° 11’ 39.80’’ O

Bauzäit

11. Joerhonnert

D'Buerg Falkesteen ass eng héichmëttelalterlech Buergruin am Ourdall géintiwwer vu Biwels an eng 800 Meter südlech vun der däitscher Uertschaft Waldhaff-Falkesteen am Äifelkrees Béibreg-Prüm a Rheinland-Pfalz (Däitschland).

Geographie

D'Buerg läit op enger géier Fielsnues iwwer dem Ourdall am Däitsch-Lëtzebuergeschen Naturpark (Naturschutzgebitt „Ourschleife-Falkenstein“). Vun der Uertschaft Waldhaff-Falkesteen aus ass d'Buerg iwwer e Feldwee z'erreechen, deen zum Deel aus dem Fiels gehae gouf. Vu Bauler aus féiert e Wanderpad (Nr. 37) bis bei d'Buerg, vun der Foussgängerbréck zu Biwels aus féiert e Bëschwee, deen zum Deel als Huelwee ausgebild ass, géi op d'Buerg erop.

De Victor Hugo gëtt follgend Beschreiwung vun der Kuliss ronderëm d'Ourschläif:^[1]

« Nous sommes allés par le haut plateau au-dessus de Vianden, route de Clairvaux, puis à travers champs à pied, voir une magnifique vallée de l'Our. Un cirque de hautes collines entourant comme un amphithéâtre une sorte de mont figurant un proscenium ou une estrade.^[2] Un peu en arrière de ce mont, la croupe escarpée qui porte la ruine de Falkenstein. Au fond, en bas, la rivière tordue comme une couleuvre. »

Beschreiwung vun der Anlag

Vun der Buerganlag si just nach follgend Elementer iwwereg: d'Buergpaart, Deeler vun der Schëldmauer, eng Wand vum Palas, Deeler vun engem Zwénger, e Wiertuerm, verwëlleft Gäng, déi romanesch Kapell a Mauerreschter vu Ställ.

Geschicht

Et gëtt ugeholl, datt d'Buerg am 11. Joerhonnert opgeriicht gouf. D'Haaptbuerg an déi romanesch Buergkapell sinn aus dem 12. bis 14. Jh.

1225 koum s'an de Besëtz vun de Lëtzebuerger Grofen.

Vum Haus Mellier goung se un d'Haus Branebuerg, well de Jakemin vu Mellier, Här vu Falkesteen, senger Fra Hedwig vu Keel Falkesteen 1297? bei der Hochzäit verschriwwen hat, soudatt si d'Herrschaft no sengem Doud behalen huet an hiren zweete Mann, de Jang vu Branebuerg, d'Herrschaft vun 1315/1316 u verwalt huet a sech doduerch Här vu Falkesteen nenne konnt.

Am 16. Jh. gouf se vum Grof vu Manderscheid ausgebaut. 1679 gouf d'Buerg zerstéiert an duerno nees opgeriicht.

1685 huet sech deen éischten de la Gardelle, dee vun Toulouse koum, am Herzogtum Lëtzebuerg néiergelooss, wou en eng Fra aus dem Haus Iewerleng bestuet huet, déi Falkesteen du geierft huet.

Nom Wiener Kongress 1815 ass d'Buerg u Preisen iwwergaangen. 1882 ass déi lescht Bewunnerin aus der franséisch-lëtzebuergescher Famill, d'Anna-Maria de la Gardelle, gestuerwen.^[3]

1895 gouf d'Buerg verkaf an d'Wunnhaus gouf ausgebaut.

D'Buerg ass bis haut a Privatbesëtz a bewunnt.

Chronologie vun den Herrscherhaiser

1225-1236: Ermesinde
1236-1317: Haus Mellier
1325-1351: Haus Branebuerg
1351-1360: Haus Blankenheim
1361-1477: Haus Vinstingen / Schoenecken
1478-1539: Haus Haraucourt
1539-1610: Haus Manderscheid / Blankenheim
1625-1688: Haus Everlingen
1688-1799: Haus de la Gardelle

Chronologie vun de biergerleche Besëtzer

1799-1895: Nokomme vun der Famill de la Gardelle
1895-1919: Ernst Schmitz-Hübsch, Veianen
1919-1953: Christian Stöck, Tréier
1954-1987: Hermann Schippers, Düsseldorf
1987-haut: Déi zwou Duechtere vun der Famill Schippers, Charlotte Sartor an Edda Norkauer.

Falkesteen an der Literatur

Aus der Fieder vum Victor Hugo staamt d'Gedicht Falkenfels aus sengem 1872 erschéngene Wierk « L'Année terrible »:^[4]

« Falkenfels, qu'on distingue au loin dans la bruine,
Est le burg démoli d'un vieux comte en ruine. »

Volleksseechen

Vun a ronderëm d'Buerg a seng Häre gëtt et eng Rei Seeërcher:^[5]

Heinrich von Falkenstein und die Magier
Der Teufelsweg auf Falkenstein
Der Weg zum Falkenstein
Der Schlossbrunnen zu Falkenstein
Der nächtliche Jäger
Vom Falkenstein
Falkenstein (2 x)
Neuerburg
Euphrosine
Euphrosine de Falkenstein
Die weisse Frau bei Vianden
Das Schlossgespenst von Falkenstein
Die zwei verwünschten Spieler
Der Graf von Falkenstein

Illustratiounen

Bild 3. D'Buerg Falkestee mat dem Ourdall a Biwels am Hannergrond. Vue a Richtung Süden.
Bild 4. Vue vum Biwelsser Flouer op d'Buerg Falkesteen. Vue a Richtung NNO.

Literatur

Arendt, K., 1901. Monographie der Burg Falkenstein. Ons Hémecht Jg. 7. Luxemburg: P. Worré-Mertens. [27 S.]
Joly, Victor, 1854. Les Ardennes. Ill. de trente planches à l'eau-forte, gravures sur bois, lithographies, etc., par Martinus A. Kuytenbrouwer. Bruxelles: J. Vanbuggenhoudt. 2 vol. (268 p., 30 pl.h.t.; 284 p.)
Meier, Paul-Maria, 1994. Burg Falkenstein an der Our. 222 S. Éd. Borschette, Christnach.
Milmeister, Jean, 1996. Victor Hugo berichtet über die letzten Burgherren von Falkenstein. Ous der Veiner Geschicht Nr. 14: 43-56. Vianden.
Milmeister, Jean, 2001. Die Herrschaft Falkenstein. Ous der Veiner Geschicht Nr. 19: 7-28. Vianden.
Norkauer, Sebastian, 1987. Geschichte der Burg Falkenstein an der Our. Eigenverlag, 14 S.
Wackenroder, Ernst, 1927. Die Kunstdenkmäler des Kreises Bitburg. Düsseldorf, Schwann, 27 cm. 10, 315, (1) S. mit 12 Tafeln, 227 Abbildungen und 1 Karte. [Falkesteen S. 94 ff.]
Wilhelm, Frank, 2003. Maison de Victor Hugo à Vianden: Musée littéraire. 63 p. Les Amis de la maison de Victor Hugo à Vianden, Vianden. Imprimerie centrale, Luxembourg.

Kuckt och

Lëscht vun de Buergen a Schlässer am Ourdall

Um Spaweck

Internetsäit iwwer d'Buerg Falkesteen op eifel.de

Referenzen an Notten

↑ Notiz vum Victor Hugo a senge Carneten iwwer eng Exkursioun den 2. August 1871, organiséiert vum deemolege Buergermeeschter vu Veianen, Adolphe Pauly. Quell: Wilhelm 2003: 9 an der Literatur.
↑ Gemengt ass hei de Biwelsser Flouer.
↑ Nokomme vun der veraarmter Famill de la Gardelle hunn deels an engem Haischen um Fouss vun der Buerg (Biwelser-Waas genannt), deels nach bis an den 1970er Joren zu Biwels gewunnt.
↑ Cf. den integralen Text vum Gedicht Falkenfels op wikisource
↑ Quell: Meier 1994 an der Literatur.

[1] Notiz vum Victor Hugo a senge Carneten iwwer eng Exkursioun den 2. August 1871, organiséiert vum deemolege Buergermeeschter vu Veianen, Adolphe Pauly. Quell: Wilhelm 2003: 9 an der Literatur.

[2] Gemengt ass hei de Biwelsser Flouer.

[3] Nokomme vun der veraarmter Famill de la Gardelle hunn deels an engem Haischen um Fouss vun der Buerg (Biwelser-Waas genannt), deels nach bis an den 1970er Joren zu Biwels gewunnt.

[4] Cf. den integralen Text vum Gedicht Falkenfels op wikisource

[5] Quell: Meier 1994 an der Literatur.

[1]

[2]

[3]

[4]

[5]