Kasemattentheater
De Kasemattentheater (fr.: Théâtre des casemates) ass e lëtzebuergeschen Theater-Ensembel.
E gouf den 11. Dezember 1964 als Centre grand-ducal d'art dramatique asbl vum Tun Deutsch gegrënnt, dee wollt avantgardisteschen Theater fir en neie Public opféieren, an de Schauspiller-Beruff opzewäerten. 1965 gouf e Summerfestival an de Kasematten um Bock organiséiert, wou La leçon a La jeune fille à marier vum Eugène Ionesco opgefouert goufen.
Vun do u gouf nach just vu Kasemattentheater geschwat, soudatt dësen Numm dee vum Centre grand-ducal d'art dramatique ersat huet.
1991 ass de Kasemattentheater am alen Tramsschapp um Lampertsbierg ënnerkomm, wou e bis 1997 gespillt huet.
Am Mäerz 1998 huet de Kasemattentheater vun der Stad Lëtzebuerg eng Lagerhal zu Bouneweg iwwerlooss kritt, wou e sech fir zeguttst ariichte konnt. De Sall gouf nom Tun Deutsch genannt, deen 1977 stënterlech gestuerwe war. E gouf ee Joer drop mat der Opféierung vum Dario Fo sengem Kinder, Küche, Kirche ageweit.[1]
De Kasemattentheater ass Member vun der Fédération luxembourgeoise des théâtres professionnels.
Literatur[änneren | Quelltext änneren]
- Marc Limpach, Germaine Goetzinger a Lex Weyer; (Red. a Koord.): 50 Jahre Kasemattentheater: 1964 - 2014. Centre Grand-Ducal d'art dramatique, 2014.
- Limpach, Marc: 50 Jahre Kasemattentheater. Die Geburtsstunde des zeitgenössischen Theaters. Wie Tun Deutschs Bruch mit der Tradition Luxemburgs Bühnengeschehen neue Türen aufstieß.Die Warte, 15. Januar 2015, S. 7-10 (1. Deel), 22. Januar 2015, S. 11-12 (2. Deel).