Kierch Welfreng

Vu Wikipedia
Kierch vu Welfreng
Filialkierch vu Welfreng, Nordsäit (2013

Filialkierch vu Welfreng, Nordsäit (2013
Filialkierch vu Welfreng, Nordsäit (2013
Uertschaft / Plaz Welfreng
Par Dräilännereck Musel a Ganer
Saint-Nicolas
Dekanat Osten
Numm / Patréiner Hl. Wendelin
Konsekratioun 1930
Architekt(en) J.P. Knepper
Baujoer 1928 - 1930
Koordinaten 49° 32’ 21.6’’ N
      06° 16’ 59.7’’ O
Kierchen - Kapellen

D'Kierch vu Welfreng ass eng kathoulesch Kierch déi zur Par Dräilännereck Musel a Ganer Saint-Nicolas, zum Dekanat Osten an zu der Gemeng Duelem gehéiert.

De Patréiner vun der Kierch ass den hellege Wendelin deem säi Fest den 20. Oktober gefeiert gëtt, den Zweetpatréiner ass den hellege Markus.

D'Kierch steet am Zentrum vun der Uertschaft do wou de Munnerëffer Wee an de Réimecher Wee iwwergeet. Op der Ostsäit ass d'Schoul un d'Kierch ugebaut.

Den 29. Mäerz 2019 gouf d'Kierch als nationaalt Monument klasséiert.[1]

Zu der Par Duelem gehéieren ausser der Filialkierch vu Welfreng och nach d'Parkierch vun Duelem an d'Filialkierch vu Fëlschdref.

All 1. an 3. Freiden am Mount gëtt eng Wiertesmass zu Welfreng gehalen, all Sonnden eng eucharistesch Ubiedung an op den Héichfester eng Houmass

Geschichtleches[änneren | Quelltext änneren]

1555 gëtt d'Filialkapell vu Welfreng an engem Visitatiounsbericht wéinst hirem schlechte Foussbueden ernimmt, grad esou wéinst dem Kierfecht, deen nach ëmmer net ugeluecht ass. A Visitatiounsberichter vum Joer 1570 gëtt ernimmt, datt d'Filial Welfreng e Recht op jee ee Wiertesgottesdéngscht pro Woch huet an en Deel vum Ënnerhalt vum Duelemer Kaploun muss iwwwerhuelen. Déi éischt gréisser Kierch zu Welfreng gouf 1721 gebaut, et war eng Kapell, déi dem hellege Markus geweit war.

Welfreng ass vun Ufank un eng Filial vun der Par Duelem gewiescht. 1926 huet dunn d'Gemeng entscheet déi baufälleg Kapell net ze renovéieren, mä eng nei Kapell opriichten ze loossen. Den Architekt Jean-Pierre Knepper huet d'Pläng fir déi nei Kierch gemaach, déi al Kapell ass 1928 ofgerappt ginn. De Grondstee fir déi nei Kierch ass dunn den 8. Juli 1928 geluecht ginn, den 21. Abrëll 1930 ass d'Kierch feierlech ageweit ginn.

Bis 1958 sinn d'Filialkierche vu Welfreng a Fëlschdref nieft dem Paschtouer vun Duelem och vun engem Kaploun betreit ginn, deen zu Duelem gewunnt huet. De leschte Kaploun vu Welfreng war den Albert Thilges vu Käerch. D'Kapell zu Welfreng gouf 2003 bausse renovéiert an nei ugestrach, anengems ass och d'Plaz ronderëm d'Kierch nei amenagéiert ginn. 2010 gouf den Daach vum Kierchtuerm nei gedeckt an den Hunn nei vergëllt.

Am Joer 2016 ass d'Kierch och banne renovéiert ginn. Dobäi krut d'Kierch en neien Ustrach, nei elektresch Anlagen an en neien Holzbuedem, an d'Rëss am Plaffong si gefléckt ginn. D'Fënsteren aus dem Joer 1929 goufe vum Atelier M.Bauer vu Munneref duebel verglaast. An der Kierch gouf och e Weekräiz aus dem Atelier Nicolas Greef-Greisch vun Altwis opgestallt, dat fréier beim Haff Boss laanscht d'Strooss stoung.

Bannenariichtung[änneren | Quelltext änneren]

An der Kierch sti verschidde Statuen: eng Häerz-Jesu Statu, eng Häerz-Maria Statu, eng Statu vum hellegen Donatus, vum hellege Markus, vum hellege Jousef, vum hellege Wendelin an eng vun der Tréischterin am Leed. Den Héichaltor gouf 1709 vum Nic Greeff-Roesdorf vun Altwis gemaach, e gouf am Joer 2000 vum Atelier Juan Morales vu Réimech renovéiert, deen och en neien Ambo an en Zelebratiounsaltor fir d'Kierch gemaach huet.

D'Fënstere vun der Kierch goufen 1929 an der Glaserei F.A. Linster zu Munneref gemaach a si vun de Welfrenger Famillje gestëft ginn.

D'elektresch Uergel vun der Firma Ahlborn ass 1978 vum Paschtouer Edmond Urth geseent ginn.

Klacken[änneren | Quelltext änneren]

Am Tuerm vun der Kierch hänken zwou Klacken:

  • Eng Klack am Toun Sol vun der Géisserei A. Delacourt aus dem Joer 1635, déi fréier en Deel vum ale Klackespill vun der Stater Jesuittekierch war;
  • Eng Klack aus der Géisserei Mabilon vu Saarburg, déi 1974 gegoss gouf mat der Opschreft: "Sankt Wendelin verlass uns nie, schütz unser Dorf, hilf unserem Vieh!"

Virun der Kierch[änneren | Quelltext änneren]

Op der Südsäit vun der Kierch sti Statue vum hellege Wendelin an der helleger Theresa. E Weekräiz vu 1735 staamt aus dem Atelier Greef vun Altwis. Dat "Missiounskraiz" gouf vum Auguste Reuter opstelle gelooss a stoung fréier direkt widder der Mauer vun der aler Kapell, déi 1928 ofgerappt gouf. Dobai ass d'Kräiz zesummegebrach, et gouf awer reparéiert an virun der neier Kierch opgestallt.

Biller[änneren | Quelltext änneren]

Kuckt och[änneren | Quelltext änneren]

Um Spaweck[änneren | Quelltext änneren]

Commons: Kierch Welfreng – Biller, Videoen oder Audiodateien

Referenzen[Quelltext änneren]

  1. Institut national pour le patrimoine architectural: Liste des immeubles et objets bénéficiant d'une protection nationale. (Lescht Versioun vum 27. Februar 2024).