Marie-Thérèse Kolbach
| Marie-Thérèse Kolbach | |
|---|---|
| Gebuer |
23. Abrëll 1918 Esch-Uelzecht |
| Gestuerwen |
7. Februar 2009 Ettelbréck |
| Nationalitéit | Lëtzebuerg |
| Aktivitéit | Moler |
| Famill | |
| Papp | Gustav Kolbach |
 | |
D'Marie-Thérèse Kolbach (oder Juchem-Kolbach), gebuer den 23. Abrëll 1918 zu Esch-Uelzecht a gestuerwen de 7. Februar 2009 zu Ettelbréck[1], war eng lëtzebuergesch Molerin an Zeechnerin, déi virun allem bekannt war fir hir Uelegbiller, Fresken a Wandmolereie respektiv Wanddekoratiounen.[2]
D'Marie-Thèrèse Kolbach huet vun 1938 bis 1939 op der Académie des Beaux-Arts vu Léck studéiert, spéider zu Tréier (1944), da vun 1946 bis 1947 a vun 1954 bis 1956 op der Académie royale des beaux-arts vu Bréissel.[3]
1956 war si Laureatin vum Prix Potter,[3] an 1964 krut si, zesumme mam Roger Koemptgen, de Prix Grand-Duc Adolphe[2].
Si hat individuell Austellungen ë. a. zu Esch-Uelzecht (Galerie municipale: 1959, 1960, Theater: 1999), an der Stad Lëtzebuerg (Galerie Bradtké: 1959, Galerie Scatola: 1976, 1977, Galerie Clairefontaine: 1995), zu Rued-Sir (al Kierch: 2001), zu Iechternach (Abtei: 2001). Si huet u kollektiven Austellungen am Stater Cercle, zu Munneref, Wolz, Dikrech, Buerglënster, Prüm, Bréissel, Monte-Carlo, Tokyo, Arel, Heidelberg, etc. deelgeholl.[3]
Am Juli 2008 konnt een zu Beefort am Kader vun Art in Beaufort eng Retrospektiv vun hire Wierker gesinn.[4]
Si war d'Duechter vum Dr. Gustav Kolbach[5] a si war mam Victor Juchem (2.9.1925 - 22.4.2006)[6] bestuet. De Mann war aus der Fiels, mä d'Koppel huet zu Esch-Uelzecht gewunnt, wou de Victor Juchem eng Filial vun der Spuerkeess geleet huet. No senger Pensionéierung am Joer 1980 si si op Beefort geplënnert.[7]
Referenzen
- ↑ Doudesannonce am Luxemburger Wort vum 12. Februar 2009.
- ↑ 2,0 2,1 G. Hausemer, 2006. Luxemburger Lexikon. Das Großherzogtum von A–Z. Éditions Binsfeld, Luxembourg, S. 221.
- ↑ 3,0 3,1 3,2 Marie-Thérèse Kolbach: exposition du 28 octobre au 4 novembre 2001. Echternach: Galerie d'art du Lycée classique et technique d'Echternach (ancienne abbaye St. Willibrord). 2001. 1 vol. (non paginé).
- ↑ Vom 17. bis 20. Juli 2008 15. Auflage des Kunstfestivals Art in Beaufort. [1]
- ↑ Massard, J.A. & R. Thill, 2011. Gustav Kolbach, Arzt und Botaniker. Bulletin de la Société des naturalistes luxembourgeois, 112 (2011), S. 16. [2]
- ↑ Doudesannonce am Luxemburger Wort vum 26. Abrëll 2006.
- ↑ Ein Leben im Zeichen der Kunst: Marie-Thérèse Juchem-Kolbach feierte den Neunzigsten. In: De Beeforter, Nr. 42, 2008. S. 25 [3]