Jean-Pierre Welter
| Jean-Pierre Welter | |
|---|---|
| Gebuer |
2. Juni 1902 Iernster |
| Gestuerwen |
14. Mäerz 1945 Réiden op der Atert |
| Nationalitéit | Lëtzebuerg |
| Aktivitéit | Journalist |
 | |
De Jean-Pierre (Jempi) Welter (Pseud.: Thériente[1]), gebuer den 2. Juni 1902 zu Iernster, a gestuerwen de 14. Mäerz 1945 zu Réiden op der Atert, war Auteur vu Revue-Stécker, Dichter a Journalist.
Liewen
[änneren | Quelltext änneren]De Papp Edouard Welter war Schoulmeeschter a Musekskenner. 1903 ass hie mat senger Fra Anne Schergen a sengen dräi Bouwen Jempy, Charel a Pol vun Iernster op Stengefort geplënnert, wou hien och Organist war an de Bouwechouer geleet huet.
De Jempi Welter war Korrespondent vu verschiddenen Zeitungen, dorënner Luxemburger Zeitung, Luxemburger Volksblatt an Escher Tageblatt. Zesumme mam Eugen "Pucki" Forman huet hien d'satiresch Wochenzäitschrëft De Gukuk (1922-1934) an d'Lëtzebuerger Illustréiert erausginn. Am Gukuk huet hie Gedichter ("Thérientes Gedichte") an déi legendär "Pittis Aufsätze" verëffentlecht.
Tëscht 1933 an 1940 goufe fënnef politesch Revuë vun him mat groussem Erfolleg an der Stad Lëtzebuerg, zu Esch/Uelzecht an zu Ettelbréck opgefouert; verschiddener goufe bis zu 25-mol widderholl. Aus de Revuë goungen eng Abberzuel Lidder ervir. Seng Liddtexter huet hien haaptsächlech op d'Melodie vu bekannten internationale Schlager geschriwwen.
Seng Pseudonymme waren Anagramme vum Virnumm vu senger Frëndin Henriette, déi him de Kuerf ginn hat: Thériente a Picothériente.
Zu Réiden op der Atert huet hien iwwer seng Stéifschwëster Yvonne (säi Papp hat sech nom Doud vu senger Fra eng zweet Kéier bestuet) den amerikanesche Majouer Wally kennegeléiert, dee wéinst der Ardennenoffensiv beim Dr. Zoller, dem Yvonne sengem Mann, zu Réiden aquartéiert war. Vun him huet de Jempi Welter wuel och d'Weis Oh My Darling, Clementine kennegeléiert, eng amerikanesche Western-Ballad, op déi hie säi bekannten Text Un der Atert geschriwwen huet.
Bei enger Sprëtztour am amerikanesche Jeep mam Majouer Wally ass de Jean-Pierre Welter am Zentrum vu Réiden op der Atert verongléckt a gouf schro blesséiert. De 14. Mäerz 1945 ass hien an der Clinique Saint-François um Stater Fëschmaart un de Follge vum Accident gestuerwen.
Wierk
[änneren | Quelltext änneren]Revuen
[änneren | Quelltext änneren]- 1933: YoYo (Stater Theater)
- 1936: `t ass net erlaabt (Hotel de la Poste, Al Avenue)
- 1937: `t ass eppes dran
- 1937: `t ass allerhand (Hotel Alfa)
- 1940: Ass dat nach dran? (Hotel Alfa)
Bekannt Lidder
[änneren | Quelltext änneren]- Un der Atert
- Den décken Heng
- De Stoussnéckel
- D'Kanéileliss vu Weier
- Cojellico's Jang