Vëlospist

Vu Wikipedia
Wiesselen op: Navigatioun, sichen
D'Vëlospist iwwer d'Al Bréck an der Stad

Eng Vëlospist ass en Deel vun der ëffentlecher Verkéiersfläch, dee fir de Vëlosverkéier reservéiert ass. An Europa gëtt se duerch e blot ronnt Schëld mat engem wäisse Vëlo drop ugewisen, da mussen d'Vëloen do drop fueren. Wann d'Schëld véiereckeg ass, da kënne se drop fueren, mä mussen net.

Vëlospiste kënnen op verschidde Manéieren ugeluecht sinn, z. B. laanscht eng Strooss vun där se just duerch eng Markéierung um Buedem getrennt sinn (duebelen oder breeden duerchgezunnene Stréch), oder securiséiert doduerch, datt tëscht der Pist an der Strooss eng Sträif Grénges ass, sief et Wues oder Hecken, oder soss en Hënnernes wéi e Gruef, Leitplank oder e Gelänner. Sou Piste sinn normalerweis op den zwou Säite vun der Strooss a ginn an der Direktioun vum Verkéier befuer. Dacks si s'um Buedem duerch eng aner Zort vu Belag markéiert, oder de Belag huet eng aner Faarf. Sou Piste fënnt e besonnesch a Stadgebidder.

Iwwerlandpiste kënnen op Weeër ugeluecht sinn déi soss nach just vum landwirtschaftleche Verkéier benotzt kënne ginn, oder et kënne Weeër sinn, déi nëmme fir Vëloen oder och alt fir Vëloen a Foussgänger reservéiert sinn.

Touristesch Vëlospiste ginn hautdesdaags dacks op desaffektéierten Eisebunnsstrecken, oder op Halterweeër laanscht Kanäl ugeluecht.

Déi éischt Vëlospist, déi an deem Sënn zu Lëtzebuerg ugeluecht gouf, war den Deel vu Reisduerf op Iechternach vun der PC3 der sougenannter Piste cyclable des trois rivières, déi ëm 1975 op Initiativ vum Tourismusministère op der fréierer Sauertstreck amenagéiert gouf. 2011 gouf et 23 touristesch Vëlospisten am Land.

Mam Gesetz vum 28. Abrëll 2015 gouf de legale Kader geschaf fir de Reseau u Vëlospisten zu Lëtzebuerg vun 23 op 38 ze erhéijen.[1]

Bekannt Vëlospisten an der Belsch sinn d'Piste vum RAVeL a vum PréRAVel, déi fir de Moment[Wéini ?] awer nach kee feste Belag hunn, a just mat zolittem Geschir wéi VTTsvëloe kënne befuer ginn.

De legale Kader zu Lëtzebuerg[änneren | Quelltext änneren]

Wann am allgemeng Sproochgebrauch vun enger Vëlospist geschwat gëtt, sou ginn et am lëtzebuergesche Code de la route awer verschidden Nuancen[2]:

  • eng Vëlospist (piste cyclable) ass entweder op enger eegener Trass ugeluecht oder materiell vun der Autosspur ofgetrennt a fir d'Vëlosfuerer reservéiert. Et gëtt:
    • déi obligatoresch Pist (piste cyclable obligatoire) iwwer déi de Cyclist fuere muss. Dës Pist gëtt mam ronne Schëld D, 4 gezeechent; d'Enn vun der Pist mam Schëld D, 4a;
    • déi recommandéiert Vëlospist (piste cyclable conseillée) iwwer déi de Vëlosfuerer net fuere muss, hie kann och op der normaler Fuerbunn fueren, wann hien z. B. méi séier viru komme wëll. Fir dës Pist ginn déi véiereckeg Schëlter F, 19a (Ufank) an F, 19aa (Enn) gebraucht;
  • eng obligatoresch Vëlosspur (voie cyclable obligatoire) ass eng Fuerspur vun der ëffentlecher Strooss déi fir d'Vëlosfuerer reservéiert ass an iwwer déi se fuere mussen. Se gëtt duerch en duerchgezunnene Stréch vun den anerer Fuerspure getrennt ass;
  • eng suggestiv Vëlosspur (voie cyclable suggestive) ass eng Fuerspur déi fir de Vëlosverkéier geduecht, awer net exklusiv derfir reservéiert ass. Se ass mat engem ënnerbrachene Stréch vun den anerer Spure getrennt;
  • e Wee fir Vëlosfuerer a Foussgänger (chemin pour cyclistes et piétons) ass entweder op enger eegener Trass ugeluecht oder materiell vun der Autosspur ofgetrennt a reservéiert fir Vëlosfuerer a Foussgänger. Et gëtt:
    • den obligatoresche Wee fir Vëlosfuerer a Foussgänger (chemin obligatoire pour cyclistes et piétons) deen d'Cyclisten an d'Foussgänger benotze mussen. Déi ronn Schëlter D, 5a an D, 5b weisen den Ufank an d'Schëlter D, 5aa an D, 5ba d'Enn vu sou engem Wee un;
    • de recommandéierte Wee fir Vëlosfuerer a Foussgänger (chemin conseillé pour cyclistes et piétons) iwwer deen d'Foussgänger goe mussen an d'Cyclisten driwwer fuere däerfen, awer net mussen. Dës Weeër si mat de véiereckege Schëlter F, 20a an F, 20aa respektiv F, 20b an F, 20ba gezeechent.

Kuckt och[änneren | Quelltext änneren]

Um Spaweck[änneren | Quelltext änneren]

Commons: Vëlospist – Biller, Videoen oder Audiodateien

Referenzen an Notten[Quelltext änneren]

  1. Loi du 28 avril 2015 relative au réseau cyclable national et aux raccordements de ce réseau vers les réseaux cyclables communaux.
  2. Kapitel II „Définitions“, Artikel 2, Abschnitt 1.21 - 1.24 aus dem Arrêté grand-ducal du 23 novembre 1955 portant règlement de la circulation sur toutes les voies publiques mat Ännerunge duerno, op Legilux - den Droitsportal vun der Lëtzebuerger Regierung; fir d'lescht gekuckt den 8. Mee 2018.