Al Bréck

Vu Wikipedia
Op d'Navigatioun wiesselen Op d'Siche wiesselen
Viaduc
Al Bréck, Passerelle
Luxbg Passerelle Al Bréck 01crop.jpg
Geographie
Land Flag of Luxembourg.svg Lëtzebuerg
Plaz Lëtzebuerg
Koordinaten 49° 36’ 20.78’’ N
6° 08’ 00.95’’ O
Funktioun
Benotzt als Stroossebréck
Benotzt vun Nationalstrooss 50
Féiert iwwer Péitruss-Dall
Technesch Detailer
Bréckentyp Boubréck
Totallängt 308,40 m
Felder/Béi 26
Feldbreet(en) 8 m - 15 m
Héicht 45 m
Material Steen
Bemierkungen
Opgaangen 29. August 1861
Architekt(en) Achille Grenier
Auguste Letellier
Entreprener Waring Brothers

D'Al Bréck och nach Passerelle genannt (offiziell pont Viaduc), ass eng Bréck an der Stad Lëtzebuerg, déi d'Uewerstad mam Garer Quartier verbënnt. Si huet eng Längt vun 308,40 Meter a besteet aus 26 Béi (vun deenen der haut e puer verstoppt sinn). D'Feldwäite vun de Béi variéieren tëscht 8 a 15 Meter an d'Bréck ass 45 Meter héich.

D'Pläng vun der Bréck goufe vun den Ingenieure vum Guillaume-Luxembourg, Achille Grenier an Auguste Letellier, gemaach. Se gouf vun der englescher Firma Waring Brothers gebaut; de Grondstee gouf de 5. Oktober 1859 geluecht. Fir de Verkéier goung d'Bréck den 29. August 1861 op.
Bei Renovéierungsaarbechte gouf se 1960 fir den ëmmer méi héije Verkéier duebel esou breet gemaach, vun 7,5 op 15 Meter.

Well während dem Bau vun der Bréck eng hëlzen Noutbréck, eng Passerelle, opgeriicht gi war, huet och déi fäerdeg Bréck deen Numm kritt a bis haut behalen.

Den Numm Al Bréck krut se, wéi uganks 1900 d'Nei Bréck, nämlech d'Adolphe-Bréck, gebaut gouf.

Den 22. September 2006 ass am Kader vun der Europäescher Mobilitéitswoch déi westlech Fuerspur op der Bréck fir d'Vëlosfuerer reservéiert ginn. D'Vëlosspur kann - anescht wéi den Individualverkéier deen nëmmen a Richtung Stad fuere kann - a béide Richtunge benotzt ginn[1].

Zanter Hierscht 2018, bis Oktober 2020 (Stand: Juni 2019), sinn Aarbechte am Gaang, fir d'Bréck ëm 2,40 Meter, bis op am Ganze 17,70 Meter, nach eng Kéier méi breet ze maachen. Et kënnt haaptsächlech eng 3 Meter breet Busspur a Richtung Garer Quartier derbäi, d'Spure fir de motoriséierte Verkéier gi vun 2,90 op 3 Meter méi breet gemaach, an et kënnt e 4,50 Meter breede Wee fir Foussgänger a Vëloen (a béid Richtungen) op der Westsäit, iwwerdeems den Trëttoir op der Nordsäit 20 Zantimeter bäikritt.[2] De Projet ass mat engem Budget vu knapps eelef Milliounen Euro geplangt; d'Käschte gi vum Staat iwwerholl.[3]

Um Spaweck[änneren | Quelltext änneren]

Commons: Al Bréck – Biller, Videoen oder Audiodateien

Fotoen[änneren | Quelltext änneren]

Referenzen an Notten[Quelltext änneren]

  1. Feist, P., 2006, “So viele Aktionen” am Lëtzebuerger Land, Nr. 38 vum 22. September 2006
  2. Nadine Schartz: "Brückenschlag in der Hauptstadt." wort.lu, 11.06.2019.
  3. Nadine Schartz, Die Tram, eine Radpiste und die Platanen op wort.lu de 6. August 2018 an ënner dem Titel Die Platanen-Allee am Luxemburger Wort vum 6. August 2018, Säit 17.