Kierch Veianen (Nikloskierch)
| Nikloskapell zu Veianen | |
 |
|
| Uertschaft | Veianen |
| Par | Veianen |
| Numm / Patréiner | Hl. Niklos |
| Konsekratiounsjoer | |
| Parverband | Veianen |
| Architekt(en) | |
| Kierchen - Kapellen | |
D'Nikloskapell (fr. chapelle St-Nicolas)[1], och nach Nikloskierch genannt, ass eng Kapell an der Veianer Ënnerstad, déi am 13. Joerhonnert gebaut gouf.
Inhaltsverzeechnes |
Gechicht [änneren]
1248 koumen d'Trinitarier op Veianen an hunn d'Spidol iwwerholl, dat de Grof vu Veianen baue gelooss hat. Virdru war Veianen en Deel vun der Par Ruet, déi vun den Tempelhäre geféiert gouf.
Esou gouf 1256 Veianen nei opgedeelt. D'Uewerstad war vun do un eng eege Par, déi vun den Trinitarier geleet gouf, d'Ënnerstad blouf Filial vun der Par Ruet an d'Templer hunn eng 50 Meter ënner der Our-Bréck eng eege Kierch gebaut. Nodeems den Templeruerden 1312 opgeléist gouf, an d'Johanniter zu Ruet d'Par iwwerholl haten, krut d'Kierch den Numm Nikloskierch.
Lénks niewent der Kierch gouf 1545 e Kierfecht ugeluecht.
D'Gebai [änneren]
Um Ufank war d'Kierch eng Halekierch (mat engem Raum), eréischt méi spéit ass de Chouer an d'Sakristei bäigebaut ginn. 1723 koum et an der Virstad zu engem Brand, bei deem d'Kierch an dee gréissten Deel vun der Virstad d'Affer vun de Flame goufen. Schonns ee Joer drop war d'Kierch nees opgebaut. D'Kierch hat dunn en typescht gotescht Kräizrëppegewëllef. Mee déi gotesch Fassad gouf dem Barock-Stil ugepasst, grad ewéi de barocken Daachreider mat héijem Helm.
De Chronogramm [änneren]
SANCTE TVOS CHRISTOS NICOLAE TVERE CLIENTES CORPORIS AC ANIMAE TVTOR ORARE POTENS (Wiechter Niklos, protegéier déi, déi der uvertraut sinn, mächtege Beschützer, biet fir Leif a Séil!)
Dëse Chronogramm vun 1724 iwwer der Kierchendier war am Ufank baussen iwwer der Dier ubruecht.
Den Altor [änneren]
Den Altor an der Nikloskierch ass e Barockaltor vu 1768. Op dem Antependium vum Altor ass an engem Dräieck en A ze gesinn, d'Symbol vun der Dräifaltegkeet, ëmgi vu Liichtstrahlen an engem Kranz. De Retabel mécht en Hallefkrees agerummt vun Eckpottoen a Sailen. Op der geschnëtzter Dier vum Tabernakel ass e Kielech mat enger Hostie mat Drauwen. Doriwwer steet eng Statu vum hellegen Niklos. Zu senge Féiss kommen dräi zum Liewen erwechte Jongen aus dem Faass. Den Ofschloss vum Altor ass eng Kartusch mat der Zuel 1768, d'Joer, an deem den Altor gebaut gouf.
De Bommenzinnes [änneren]
An der lénkser Säitemauer steet zënter e puer Joer déi original Statu vum hellege Nepomuk, am Volleksmond Bommenzinnes genannt. D'Statu op der Our-Bréck ass nëmmen eng Kopie.
D'Klacken [änneren]
Am Dachreider hänken zwou Klacken. Eng Marieklack an "do" vun 1624 an eng Niklosklack a "sol" vun 1873.
D'Veianer Nikloskierch ass zënter 1938 op der Lëscht vun de klasséierte Monumenter als nationaalt Monument agedroen.
Literatur [änneren]
- Pierre Bassing: Vianden in seinen Kirchen, Kapellen und sakralen Kunstschätzen, Veiner Geschichtsfrënn, 1983
Kuckt och [änneren]
Um Spaweck [änneren]
| Commons: Église Saint-Nicolas Vianden – Biller, Videoen oder Audiodateien |
Referenzen [änneren]
- ↑ D'Gebai ass an der Lëscht vun den nationale Monumenter als Kapell opgefouert.
