Naturschutzgebitt Um Bierg
Um Bierg ass en Naturschutzgebitt an de Gemenge Beetebuerg a Réiser. Tëscht Beetebuerg a Peppeng, un der Diddelenger Autobunn um Lieu-dit Bierg läit de Bongert Altenhoven, wouvun zirka 12 ha zënter 1998 ënner Naturschutz stinn. Um Bierg gëllt als de gréisste Bongert vu Lëtzebuerg.
De Bongert Altenhoven, deem säin Ursprong op d'Enn vum 19. Joerhonnert zréckgeet, huet beim Bau vun der Autobunn méi Hektare missen afferen an ass zënterhier am Besëtz vum Staat. Nodeems sech an de leschte Joerzéngten net ëm d'Fleeg vun de Beem an Neiuplanzunge gekëmmert gouf, ass de Bambestand vereelzt an eng Partie Lächer tëscht de Beem mat der Zäit entstan. Ufanks den 1990er Joren ass vu verschiddenen Naturschutzorganisatioune vill Aarbecht an de Bongert investéiert ginn, andeems iwwer 500 nei Beem a 70 verschiddenen Zorten ugeplanzt, Beem an Hecke geschnidden a Fleegaarbechten duerchgefouert gi sinn. Mam groussherzoglechem Reglement vum 3. August 1998 sinn eng 12,32 ha als Naturschutzgebitt ausgewise ginn.
Mat sengen iwwer 1.300 zum Deel iwwer 100 Joer alen Uebstbeem ass de Bongert e wichtege Liewensraum. Sou konnten zum Beispill 69 verschidde Vullenaarten nogewise ginn, wouvun der 19 op der Rouder Lëscht vu bedréiten Aarte stinn. De gréissten Deel vum Uebstbambestänn maachen Äppelbeem aus. Donieft kommen ënnert anerem Biren-, Mirabellen-, Prommen- a Kiischtebeem vir.
| Naturschutzgebidder zu Lëtzebuerg | |
 |
Aarnescht – Amberkneppchen – Am Bauch – Beetebuerger Bësch – Um Bierg – Biirgerkräiz – Birelergronn – Boufferdanger Muer – Brill – Conzefenn – Deiwelskopp – Dreckswiss – Dumontshaff – Ellergronn – Ënneschte Bësch – Fënsterdall – Fëlschdrefergronn – Grouf – Haard – Haff Réimech – Hierden – Hierberbësch – Kelsbaach – Kuebebierg – Kuebendällchen – Laangmuer – Lannebur – Léi – Léibierg – Lénger Wisen – Manternacher Fiels – Pällembierg – Pëttenerbësch – Prënzebierg – Am Pudel – Ramëscher – Réiserbann – Saueruecht – Sonnebierg – Stréissel – Strombierg – Telpeschholz Kuckt och → Bemierkenswäert Beem zu Lëtzebuerg |
