Willy Bourg

Willy Bourg
Gebuer	22. Februar 1934 Lëtzebuerg
Gestuerwen	21. Februar 2003
Nationalitéit	Lëtzebuerg
Educatioun	Athénée de Luxembourg
Aktivitéit	Politiker, Enseignant, Offizéier
Partei	CSV

De Willy Bourg, gebuer den 22. Februar 1934 an der Stad, a gestuerwen den 21. Februar 2003, war e lëtzebuergesche Arméisoffizéier, Enseignant an CSV-Politiker.

Seng Jugend huet de Willy Bourg zu Beggen verbruecht. No sengem Secondaire am Kolléisch huet hien eng militäresch Ausbildung zu Arel an zu Bréissel gemaach. Duerno gouf hien Leitnant an der Lëtzebuerger Arméi, wou hie spéider responsabel war fir d'Ausbildung vun den Offizéier.

Am Joer 1967 huet hie bei der Arméi opgehalen, an ass op d'Technesch Universitéit vu Karlsruhe gaangen, fir Ingenieur ze ginn. Duerno war hie Professer am Lycée des arts et métiers, an deem hie méi spéit Directeur adjoint gouf.

1979 gouf de Willy Bourg an de Stater Gemengerot gewielt. Vun 1984 bis 1995 war hie Generalsekretär vun der CSV.

1985 huet hien dem Nic Mosar säi Chambersëtz iwwerholl, wéi deen als Kommissär op Bréissel goung. Zanterhier ass hie bei de Chamberwale vun 1989, 1994, an 1999 erëmgewielt ginn. 1998 gouf e Vizepresident vun der Chamber.

Den 21. Februar 2003, um Virowend vu sengem 69. Gebuertsdag ass de Willy Bourg un enger laanger Krankheet gestuerwen.

Publikatiounen

• Zesumme mam André Muller:
  • Eis Garde - Die Geschichte der Grossherzoglichen Garde (1945-1966) im Rahmen der luxemburgischen Pflichtarmee, Sankt-Paulus Lëtzebuerg, 1990
  • Ons Arméi - Die Luxemburger Pflichtarmee 1944 bis 1967, Band I, Eegeverlag, Lëtzebuerg, 1997

Gielercher

• Commandeur vum Ordre de Mérite du Grand-Duché de Luxembourg (Promotioun 2000)

Virgänger	Generalsekretär vun der CSV	Nofollger
Jean-Pierre Kraemer	1984 - 1995	Camille Dimmer