Camille Sutor

Dësen Artikel iwwer den Zweete Weltkrich ass eréischt just eng Skizz. Wann Dir méi iwwer dëst Theema wësst, sidd Dir häerzlech invitéiert, aus dëse puer Sätz e richtegen Artikel ze schreiwen. Wann Dir beim Schreiwen Hëllef braucht, da luusst bis an d'FAQ eran.

Camille Sutor
Gebuer	30. Mee 1921
Gestuerwen	18. Mee 1944
Nationalitéit	Lëtzebuerg
Aktivitéit	Resistenzler
Member vun	Trei Lëtzebuerger Studenten

De Camille Sutor, gebuer den 30. Mee 1921 zu Iermsdref an do den 18. Mee 1944 gestuerwen, war e lëtzebuergesche Resistenzler.

Seng Resistenzaktivitéiten

De Camille Sutor huet am Zweete Weltkrich zu Dikrech am Kolléisch studéiert. Do huet hien 1941 d'Resistenzgrupp "Trei Lëtzebuerger Studenten" (TLS) gegrënnt. Als Haaptschëllege vum Widderstand bei de Studenten ass hie vun der Schoul geflunn.

Am August 1941 huet hie sech vun engem Passeur bei Péiteng iwwer d'franséisch Grenz brénge geloss an ass bis op Lyon komm. Hie war um Begriefnes vum verschleefte Paschtouer N. Biwer vu Gilsdref an ass duerno awer erëm op Lëtzebuerg zeréckkomm.

Bei dem gelongene Versuch kanadesch Parachutisten ze retten, huet den Drama ugefaangen. De Camille Sutor huet d'Kanadier an d'Heemechtshaus op Iermsdref bruecht a se do verstoppt.

Duerch de Verrot vun Iermsdrëffer Bierger sinn déi däitsch Truppe séier gewuer ginn datt "a Maischens" eppes méi lass war. Si hunn d'Proprietéit ëmstallt a gläich de Richard Sutor, dem Camille säi Brudder, un d'Mauer gestallt a mam Papp Sutor als Schutzschëld an d'Stuff gestiermt, wou de Camille Sutor sech opgehalen huet. No der Opfuerderung seng Pistoul falen ze loossen hu se geschoss an hien déidlech tëscht d'Ae getraff.

De Richard Sutor konnt am Duerchernee flüchten a sech an de Bëscher verstoppen. D'kanadesch Zaldoten an en Deel vun der Famill hate sech an de "Bunker" gerett.

40 Joer nom Doud hu seng 3 bescht Frënn um Heemechtshaus vum Camille Sutor zu Iermsdref eng Plack ubruecht mat der Opschrëft HIC OBEIT CAMILLUS SUTOR PRO PATRIA LEO PUGNANS.

Zu Iermsdref gouf eng Strooss nom Camille Sutor benannt an den 19. Mee 2024 huet d'Ärenzdallgemeng an enger Gedenkfeier fir säin 80. Doudesdag e Monument fir de Camille Sutor ageweit.

Literatur

• Raths, Aloyse: Erënnerong un e grousse Resistenzler: Camille Sutor vun Iermsdref am: Rappel: bulletin trimestriel de la Ligue luxembourgeoise des prisonniers et déportés politiques. - Luxembourg. - Joergang 59(2004), n° 3, p. 353-377
• Hoffmann, Serge: Le mouvement de résistance LVL au Luxembourg, Archives nationales, 2004, 158 S.
• André Grosbusch, Camille Sutor, Lion de la résistance, Net ee vu villen, 2024, ISBN13 9789995909680, Letzshop

Um Spaweck

• Camille Sutor, ons jongen a meedecher.lu
• (en) https://www.liberationroute.com/stories/361/camille-sutor
• Léiw vun der Resistenz, Sendung "Den Hallwer Néng" vum 24.5.2024 um Radio 100,7 E Gespréich vum Maurice Molitor mam Nathalie Brachmond-Sutor, dem Camille seng Kleng-Niess, a mam André Grosbusch.
• A.H.M.E, 1986, Luxemburg: Kriegsfgeshehen 1940-1945, Umschreiben von handgeschriebenen Texten aus Kriegstagebücher, Anhang 2, Camille Sutor
• Richard Sutor, ons jongen a meedecher.lu