Centre national d'incendie et de secours

Vu Wikipedia
Op d'Navigatioun wiesselen Op d'Siche wiesselen
Maquette vum CNIS

De Centre national d'incendie et de secours (gekierzt: CNIS) ass den nationale Rettungszenter fir de Corps grand-ducal d'incendie et de secours. Den Zenter gëtt zu Gaasperech, tëscht der Autobunn A3 an dem Boulevard de Kockelscheuer gebaut.

De CNIS ass d'Häerzstéck vun der Reform vum nationale Rettungswiesen[1]. Wann e bis fäerdeg ass, besteet de CNIS aus zwéin Deeler: een Deel (Zon 1) mat der Kasär fir d'fräiwëlleg an d'Beruffspompjeeë vun der Stad Lëtzebuerg, fir d'Verwaltung vun de Rettungsdéngschter, d'Noutruffzentral 112 a fir den Institut national de formation des services de secours. Den zweeten Deel ass reservéiert fir déi technesch Installatioune fir déi sportlech a praktesch Ausbildung fir d'Pompjeeën. Dorënner sinn eng Tunnelsimulatiounsanlag, en Ambulanzsimulator, en Übungsweier, en Dirty Classroom, eng Hal mat enger Otemschutz-Übungsstreck, e Brandhaus an e Realbrandcontainer.[2] Ausserdeem kritt d'Gebai e 35 Meter héije Schlauchtuerm.

De Projet gesäit fir d'Kasär an d'Garage vun de Beruffspompjeeën 11.340 m² vir, fir d'Verwaltungsgebaier 2.600 m² a fir alles wat mat der Ausbildung ze dinn huet 3.800 m² .

De Grondstee gouf de 24. Mäerz 2017 geluecht

Den Architekteconcours fir den Zenter ze bauen ass am Juni 2014 ausgeschriwwe ginn; de Büro Böge Lindner K2 Architekten krut den Zouschlag[2]. De Projet de loi fir de Bau an d'Finanzéierung vum CNIS gouf de 24. Mäerz 2015 deposéiert. Op den Dag genee zwee Joer méi spéit, de 24. Mäerz 2017, gouf de Grondstee fir den Zenter geluecht. De Bau soll Enn 2020 fäerdeg sinn.

De Käschtepunkt gëtt op eppes méi wéi 140 Milliounen Euro geschat: 121 Milliounen Euro fir d'Zon 1, déi vun der Stater Gemeng virfinanzéiert an duerno vum Staat zu 45 % zréckbezuelt ginn an 19,4 Milliounen Euro fir d'Zon 2, déi integral vum Staat bezuelt gëtt.

Biller[änneren | Quelltext änneren]

Um Spaweck[änneren | Quelltext änneren]

Commons: Centre national d'incendie et de secours – Biller, Videoen oder Audiodateien

Referenzen an Notten[Quelltext änneren]

  1. Sou huet den Inneminister Dan Kersch den Zenter a senger Ried genannt, déi hien de 24. Mäerz 2017 gehalen huet wéi de Grondstee geluecht gouf.
  2. 2,0 2,1 "Das Flaggschiff des Rettuingswesens." wort.lu, 25. August 2018.