Europäesch Zentralbank
 | |
| Land | Däitschland |
|---|---|
| Gemeng | Frankfurt am Main |
| Koordinaten | 50°6'14"N, 8°41'55"O |
| Datum vum Bau | 1. Juni 1998 |
| Genannt no | Europa |
 | |
D'Europäesch Zentralbank (kuerz: EZB) gouf 1998 gegrënnt, fir, wéi et am Traité iwwer d'Europäesch Unioun virgesi war, déi neigeschaaft Wärung, den Euro, anzeféieren an ze geréieren, Change-Operatiounen ze maachen an dofir ze suergen, datt d'Bezuelsystemer ouni Problemer funktionéieren. Hir Aufgab ass et och, d'Wirtschafts- a Wärungspolitik vun der EU ze definéieren an ëmzesetzen. Si ass zanter dem 1. Dezember 2009 eng vun den Institutioune vun der Europäescher Unioun an huet hire Sëtz zu Frankfurt am Main.
Fir dës Aufgaben z'erfëlle schafft si mam "Europäesche System vun den Zentralbanken" zesummen, an deem déi 27 Zentralbanke vun den EU-Memberstaaten vertruede sinn. Op den 1. Januar 2023 hunn 20 vun deene Länner den Euro agefouert, cf. Eurozon, a bilden, zesumme mat der Europäescher Zentralbank, de sougenannten "Eurosystem".
D'Europäesch Zentralbank, wéi och d'national Zentralbanke vum Eurosystem, si vëlleg onofhängeg an hiren Decisiounen. Déi aner Europäesch Institutiounen an d'Regierunge vun de Memberstaaten däerfen net probéieren, dës ze beaflossen.
Hir Aufgaben
[änneren | Quelltext änneren]Eng vun den Haaptaufgabe vun der Europäescher Zentralbank ass et, d'Präisstabilitéit an der Eurozon bäizebehalen, fir datt den Euro seng Kafkraaft behält.
Fir dat s'erreechen, muss si d'Inflatioun genee am A behalen. D'EZB mécht alles, fir datt dës ënner 2 % am Joer bleift. Dofir kontrolléiert se fir d'éischt emol, wéi vill Suen am Ëmlaf sinn. Wann dat der ze vill wiere par Rapport zu de Wueren a Servicer, déi ugebuede ginn, géif d'Inflatioun an d'Luucht goen. Zweetens kontrolléiert se, wéi d'Präisser sech entwéckelen a se evaluéiert, wéi wäit doduerch d'Präisstabilitéit an der Eurozon a Gefor ass.
Fir d'Mass vun de Suen am Ëmlaf ze beaflossen, leet d'Europäesch Zentralbank de Leetzënssaz (Taux directeur) fest, dee fir déi ganz Eurozon gëllt.
Hir Funktiounsweis
[änneren | Quelltext änneren]D'Aarbechte vun der EZB ginn duerch dës 3 Entscheedungsinstanzen definéiert:
- Den Directoire sëtzt sech zesummen aus dem President, dem Vizepresident a véier anere Memberen, déi all vun de Staats- a Regierungscheffe vun de Länner vun der Eurozon eenheetlech op 8 Joer designéiert goufen. Éischte President war de Wim Duisenberg, am November 2003 gouf de Jean-Claude Trichet säin Nofollger, den November 2011 war et de Mario Draghi, an zanter 2020 ass et d'Christine Lagarde. Den Directoire sëtzt Wärungspolitik ëm, sou wéi se vum Conseil vun de Gouverneure vun den Zentralbanken (kuckt méi wäit ënnen) decidéiert gouf, a gëtt den nationalen Zentralbanken Instruktiounen. Hien ass verantwortlech fir d'alldeeglech Gestioun vun der EZB.
- De Conseil vun de Gouverneure vun den Zentralbanken ass dat iewescht Decisiouns-Organ vun der EZB. E sëtzt sech zesummen aus de 6 Membere vum Directoire an de Gouverneure (Presidente) vun de 16 Zentralbanken aus der Eurozon. Hien decidéiert iwwer d'Wärungspolitik an der Eurozon, an e leet d'Zënssätz fest, zu deenen d'Geschäftsbanke bei der Zentralbank Sue léine kënnen.
- Den Erweiderte Conseil, an deem de President an de Vizepresident vun der EZB, souwéi d'Gouverneure vun den Zentralbanke vun alle 27 EU-Memberstaaten zesummekommen. Den Erweiderte Conseil dréit ë. a. dozou bäi, d'Ausbreedung vun der Eurozon mat ze preparéieren.
Soss
[änneren | Quelltext änneren]Op all Euroschäin sti lénks uewen d'Initiale vun der EZB an deene verschiddene Sproochen:
- EZB: Europäische Zentralbank
- BCE: Banque Centrale Européenne, Banco Central Europeo, Banca Centrale Europea, Banco Central Europeu
- ECB: European Central Bank, Europæiske Centralbank, Europese Centrale Bank, Europeiska Centralbanken, Evropske Centralny Banka
- ΕΚΤ: Ευρωπαικη Κεντρικη Τραπεζα
- EKP: Euroopan Keskuspankki
D'Ënnerschrëft op der 2002er-Serie ass, bei de Schäiner, déi bis 2003 gedréckt goufen, déi vum Wim Duisenberg, déi vun 2004 bis 2011 droen déi vum Jean-Claude Trichet, déi bis 2019 vum Mario Draghi, an zanterhier déi vun der Christine Lagarde.
Literatur
[änneren | Quelltext änneren]- Otmar Franz: Die Europäische Zentralbank, Europa-Union-Verlag, Bonn, 1990
Kuckt och
[änneren | Quelltext änneren]Um Spaweck
[änneren | Quelltext änneren]| Commons: Europäesch Zentralbank – Biller, Videoen oder Audiodateien |
|
Portal EU – All d'Artikelen op der Wikipedia iwwer d'Europäesch Unioun. |