Ministère de l'Éducation nationale, de l'Enfance et de la Jeunesse

Ministère de l'Éducation nationale, de l'Enfance et de la Jeunesse
Den Educatiounsministère (lénkst Gebai)
Ministère fir Educatioun, Kanner a Jugend
Land	Lëtzebuerg
Minister	Claude Meisch
Verwaltungssëtz	Lëtzebuerg
Adress	33, Rives de Clausen L-2165 Lëtzebuerg
Ënnersteet der/dem	Lëtzebuerger Regierung
Um Spaweck	http://www.men.public.lu/fr/index.html, https://menej.gouvernement.lu/

Deen dacks als Educatiounsministère genannte Ministère fir Educatioun, Kanner a Jugend ((fr)Ministère de l'Éducation nationale, de l'Enfance et de la Jeunesse, gekierzt MENEJ) ass e Ministère zu Lëtzebuerg, dee fir d'Beräicher vun der Bildung, de Kanner an der Jugend zoustänneg ass.

Allgemenges

Ee vun den Haaptbestanddeeler vun der Bildungspolitik vum Ministère ass et, fir de Bildungssystem ëmmer nees un d'Entwécklung vun der Gesellschaft an d'Besoine vun der Bevëlkerung unzepassen.

Kompetenz vum Ministère

D'Servicer a Verwaltungen déi ënnert d'Kompetenz vum Educatiounsministère falen, sinn am interne Reglement vun der Regierung festgehalen. Dozou gehéieren ë. a.:

• Kanner: Allgemeng netformal Bildungs- an Erzéiungspolitik; Entwécklung vun de Strukture vun der netformaler Erzéiung (Erzéiungs- a Betreiungsservicer, Elterenassistenten, Mini-Crèchen, …); Entwécklung vun der Qualitéit vun de Strukture vun der netformaler Ausbildung; Verwaltung, Iwwerwaachung a Kontroll vun den Agrementen; Verwaltung an Iwwerwaachung vum System vun de Chèque service accueil.
• Jugend: Allgemeng Jugendpolitik; nationale Jugendbericht; Aktiounsplang fir d'Jugend; national Schülerkonferenz; national Jugendkonferenz; Jugenddéngschter a Jugendhaiser; nationale Jugenddéngscht, Au-pair; Kampf géint de Cybermobbing; BeeSecure, nautesche Stëtzpunkt Lëlz (zesumme mam Sportsministère).

• Museksschoulen: Entwécklung vu Museksunterrecht; pedagogesch a kulturell Koordinatioun vun de Musekscoursen an de Schoulen, de Betreiungsstrukturen, de Museksschoulen an de Conservatoiren.
• Grondschoul: Allgemeng Politik vun der Grondschoul; Entwécklung vun der Offer vun der ëffentlecher Grondschoul; Planifikatioun an Zoudeele vun de Finanz- a Personalressourcen; Qualitéitskontroll vum Enseignement.
• Secondaire: Allgemeng Politik vun de Secondairesschoulen; Entwécklung vun der Offer am Secondaire (General, Classique, ëffentlech international Schoulen); Planifikatioun an Zoudeele vun de Finanz- a Personalressourcen; Qualitéitskontroll vum Enseignement; Lycéeën, Direktioune vun de Lycéeën; Definitioun an Ausstelle vun den nationalen Diplomer.
• Beruffsausbildung
• Internater a Logementer fir Schüler: Entwécklung vu Konzepter vu Logementer fir déi Jonk, mat an ouni spezifesch pedagogesch Betreiung; Gestaltung vun neien Internater an Ausbau vun deenen déi scho bestinn.
• Inklusioun: Allgemeng Politik a Promotioun vum inklusiven Enseignement; Ausbau vun der Qualitéit vum System fir Schüler mat spezifesche pedagogesche Bedierfnesser opzehuelen; Kompetenzzenteren an der Psychopedagogie; national Kommissioune fir Inklusioun, Koordinatioun mat de Gestionnaire vu sozial- a psychotherapeuteschen Zentren; nationale Service fir den inklusiven Enseignement.
• Kanner- a Familljenhëllef
• Rechter vum Kand
• Adoptiounen
• Erwuessenebildung
• Digital Léieren
• Service vun de Schoul- an Universitéitsrestauranten (Restopolis)
• …

D'Promotioun vum Lëtzebuergeschen, déi bis 2023 ënner d'Kompetenz vum Educatiounsministère gefall ass, gëtt elo vum Kulturministère iwwerholl.

Kuckt och

• Regierung (Lëtzebuerg)
• Lëscht vun de lëtzebuergeschen Educatiounsministeren

Um Spaweck

Commons: Ministère de l'Éducation nationale, de l'Enfance et de la Jeunesse – Biller, Videoen oder Audiodateien

• De Ministère op gouvernement.lu, der Websäit vun der Regierung