Hubert Berg

Dëse Konschtartikel ass eréischt just eng Skizz. Wann Dir méi iwwer dëst Theema wësst, sidd Dir häerzlech invitéiert, aus dëse puer Sätz e richtegen Artikel ze schreiwen. Wann Dir beim Schreiwen Hëllef braucht, da luusst bis an d'FAQ eran.

Hubert Berg
Gebuer	19. Oktober 1825 Weimeschkierch
Gestuerwen	29. Juli 1903 Lëtzebuerg
Nationalitéit	Lëtzebuerg
Aktivitéit	Moler, Zeecheprofesser
Member vun	Willibrordus-Bauveräin, Section historique vum Institut grand-ducal

Den Hubert Berg, gebuer den 19. Oktober 1825^, zu Weimeschkierch an der fréierer Gemeng Eech, a gestuerwen den 29. Juli 1903 an der Stad, war e lëtzebuergesche Moler an Zeecheprofesser.

Säi Liewen

Den Hubert Berg huet säi Secondaire am Stater Kolléisch ugefaangen an no der V^e opgehalen. Hien huet seng Grondkenntnesser iwwer d'Zeechne beim Jean-Baptiste Fresez geléiert.

Ouni op d'Universitéit gaangen ze sinn, krut hien 1846, am Alter vun 21 Joer, eng Nominatioun als Maître de dessin an der École moyenne et industrielle zu Iechternach. 1856 gouf hien Zeecheprofesser an der selwechter Schoul. Weider Nominatioune waren: Professeur de 2^e classe zu Iechternach (1874) an an der Stad (1879) an duerno Professeur de 1^re classe (1889).

Chouer vun der Basilika deen zesummegefall war

Tëscht 1856 an 1868 war hien och nach Chargé de cours an der École agricole de l'État, wou hien eng ganz Rëtsch verschidde Fächer (Zeechnen, Kalligraphie, Mathematik, Däitsch, asw.) enseignéiert huet.

Als Passionéierte vun der Architektur gouf den Hubert Berg 1857 als Member an der deemoleger Société pour la recherche et la conservation des monuments historiques opgeholl an huet vun do un Zeechnunge vun den Iechternacher Antiquitéite gemaacht, dacks zesumme mat den Historiker Jean-Pierre Brimmeyr a Jean Engling.

Säi gréisste kënschtleresche Succès war, datt seng Zeechnung vum Chouer vun der Iechternacher Basilika deen zesummegefall war, den 12. Januar 1861 an der bekannter franséischer Wochenzeitung L'Illustration publizéiert gouf.

1862 gouf de Berg Member vum Willibrordus-Bauveräin, deem säin Zil et war, Suen ze sammele fir d'Iechternacher Basilika, déi deemools just nach eng Ruin war, nees opzeriichten.

Den Hubert Berg ass 1897 an d'Pensioun gaangen an den 29. Juli 1903 gestuerwen. Hien ass um Kierfecht vun Iechternach begruewen.

Wierker

Zeechnungen

• Véiergëtterstee vu Bäerdref
• Diana-Denkmal vu Bollenduerf
• Dënzelt, virun der Renovatioun
• Iwwerreschter vun der Réimescher Villa vun Iechternach

Guide du touriste (1880)

Schrëftstécker

• 1863: Manuel pour l'enseignement du dessin professionnel, Édition V. Buck
• 1869: Entwurf und Anleitung zu einer landwirtschaftlichen Buchgeführung nach der doppelten Art ohne Journal, Édition V. Buck
• 1880: Guide du touriste dans les environs d'Echternach, au Müllerthal, à l'Eszbach, etc., Édition V. Buck
• 1884: Carte des environs d'Echternach: itinéraire des excursions: Müllerthal, Hallerbach, Eszbach, Leiwerdelt, Schankweiler, Prüm zur Lay, Girsterklause, etc., Édition V. Buck

Literatur

• APEA, 1987, Regard sur deux siècles de création et d'éducation artistiques au Luxembourg, Association des Professeurs d'Education artistique de l'Enseignement secondaire et supérieur (APEA), Impr. St-Paul, Luxembourg, 332 S. (Hubert Berg: S. 86-87)
• Hubert Berg (1825-1903): Pionnier de l'enseignement du dessin, Tirage-à-part aus: Regard sur deux siècles de création et d'éducation artistiques au Luxembourg, 1988, S. 49-70

Kuckt och

• Lëscht vu lëtzebuergesche Konschtschafenden

Um Spaweck

Commons: Hubert Berg – Biller, Videoen oder Audiodateien