Kierch Steesel
| ||||
|---|---|---|---|---|
 Parkierch vu Steesel | ||||
| Uertschaft / Plaz | Steesel | |||
| Par | Steesel–Walfer Sainte-Trinité | |||
| Dekanat | Lëtzebuerg | |||
| Numm / Patréiner | Kathedra Petri | |||
| Konsekratioun | 1866 | |||
| Architekt(en) | J.-B. Kintzelé | |||
| Baujoer | 1851/52 | |||
| Koordinaten | 49° 40’ 36.1’’ N 06° 07’ 26.4’’ O | |||
| Kierchen - Kapellen | ||||
D'Kierch zu Steesel ass eng kathoulesch Kierch déi zur Par Steesel–Walfer Sainte-Trinité, zum Dekanat Lëtzebuerg an zu der Gemeng Steesel gehéiert.
D'Kierch ass dem hellege Péitrus sengem Léierstull (Kathedra Petri) geweit. D'Fest gëtt den 22. Februar gefeiert. De Péitrus vu Mailand[1] figuréiert als zweete Patréiner a gëtt um Päischtméindeg geéiert.
D'Kierch steet, wéi sou dacks, op der Kiercheplaz, der Place de l'Église, déi zum CR123 gehéiert. Hanner der Kierch ass de Kierfecht ugeluecht.
Zur fréierer Par Steesel gehéiert ausser der Parkierch vu Steesel och nach d'Filialkierch vun Heeschdref.
Geschicht[änneren | Quelltext änneren]
Déi Steeseler hate scho ganz fréi eng Kierch, déi se op d'Ruine vun enger réimescher Villa a merowengesche Griewer opgeriicht haten. De Bertels hat 1571 eng Skizz dovun ugeluecht, et war eng ganz einfach Kierch, déi du spéider awer vergréissert gouf.
Wéi den éisträichesche Keeser Joseph II. 1785 den Dominikaner-Uerden opgeléist huet, dunn huet och Steesel, wéi vill aner Paren aus der Ëmgéigend, um Ausverkaf vum Märjendaller Klouschter profitéiert. Den deemolege Paschtouer Dominique-Henri de Neunheuser huet mol gläich zwéi stengen Altär vun do erbäigeschaaft. Een dovu war dem Péitrus vu Mailand geweit, a sou huet deen Hellege säi Wee op Steesel fonnt.
1848 gouf decidéiert déi al a baufälleg Kierch ofzerappe well se ze vill kleng gi war. Den Héichaltor vun där Kierch gouf un d'Par Wuermer verkaaft, wou en nach ëmmer benotzt gëtt. Déi zwéi Säitenaltär sinn awer zu Steesel bliwwen, wou se nach haut gutt an där neier Kierch maachen.
Den 12. Juni 1851 gouf de Grondstee fir de Neibau geluecht, dee no de Pläng vum Heeschdrëffer Baukondukter Jean-Baptiste Kintzelé ausgefouert gouf. Déi am neogotesche Stil gebaute Kierch gouf schonn den 19. Dezember 1852 ageseent, awer eréischt de 14. Juli 1866 gouf se vum Bëschof Nicolas Adames konsekréiert.
Bei Renovatiounsaarbechten an de Joren 2000 bis 2005 gouf ë. a. de Banneraum vun der Kierch komplett renovéiert. Déi siwe Fënsteren am Chouer goufen 1980 vum Ben Heyart entworf.
Klacken[änneren | Quelltext änneren]
Am Klackentuerm hänken dräi Klacken déi am Schlagtoun si, la, sol, oder och h', a', g' genannt, lauden.
De Chronogramm[änneren | Quelltext änneren]
Iwwer dem Kiercheportal kann een dëse Chronogramm gesinn, deen d'Joer 1866 duerstellt, d'Joer vun der Konsekratioun vun der Kierch:
- NICOLAUS EPISC. HANC IN STEINSEL
- CONSECRAVIT ECCLESIAM
Kuckt och[änneren | Quelltext änneren]
- Lëscht vu reliéise Gebaier zu Lëtzebuerg
- Lëscht vun de Lëtzebuerger Paren
- Lëscht vun de fréiere Lëtzebuerger Paren
Um Spaweck[änneren | Quelltext änneren]
| Commons: Kierch Steesel – Biller, Videoen oder Audiodateien |
- D'Kierch op der Websäit vum Parverband Steesel
- D'Fënstere vun der Kierch vu Steesel op der Websäit vun der Stiftung Forschungsstelle Glasmalerei des 20. Jh. e. V. (de)
- D'Uergel vun der Kierch op Orgues.lu
Referenzen an Notten[Quelltext änneren]
- ↑ Hie gëtt och ënner den Nimm Péitrus vu Verona oder Péitrus de Märtyrer gefouert. En ass liicht z'erkennen, well hie meeschtens mat engem Schwäert am Kapp duergestallt gëtt, sou och zu Steesel.