Braderie

Vu Wikipedia
Wiesselen op: Navigatioun, sichen
Stub W.svg Dësen Artikel ass eréischt just eng Skizz. Wann Dir méi iwwer dëst Thema wësst, sidd Dir häerzlech invitéiert, aus dëse puer Sätz e richtegen Artikel ze schreiwen. Wann Dir Hëllef braucht beim Schreiwen, da luusst bis an d'FAQ eran.
Ettelbrécker Braderie, 1931
D'Munnerefer Braderie, Biederstrooss, 30. August 2009

Eng Braderie ass e Stroosseverkaf op engem festgeluechten Dag, meeschtens an der Zäit vun de Solden, dee vum Geschäftsverband vun enger Uertschaft organiséiert gëtt.

D'Geschäftsleit riichten da Stänn virun hirem Buttek op, op deene se Wueren zu staark erofgesaten ("bradéierten") Präisser ubidden. Meeschtens ass eng Braderie verbonne mat Manifestatioune vu Museksgesellschaften a Veräiner, am Sënn vun engem Volleksfest.

D'Wuert Braderie kënnt aus der franséischer Provënz Flandern an ass ofgeleet vu "braaden", (broden op lëtz.). Dat kënnt dohier, well deen Dag op ville Stänn gebroden Iesswuere wéi Fleesch an Hierken ugebuede goufen. Zu Lëtzebuerg waren dat am Ufank Thüringerwurschten, spéider hu Mettwurschten a Kotletten d'Rei opgefëllt.

Geschichtleches[änneren | Quelltext änneren]

Déi éischt Braderien waren an der franséischer Provënz Flandern, mat engem Schwéierpunkt, der Stad Lille. Vun do aus huet nom Éischte Weltkrich d'Iddi vun der Braderie sech verbreet, an ass iwwer Reims a Chalons och op Nanzeg, Metz an Hayange komm.[1]

Den deemolege Buergermeeschter vun der Stad Lëtzebuerg, Gaston Diderich, hat keng Schwieregkeete fir der Geschäftswelt kloer ze maachen, wat fir eng Avantage sou eng Braderie och fir d'Haaptstad vu Lëtzebuerg kënnt hunn. Op alle Fall, sou heescht et, waren d'Commerçanten, déi 1928 d'Braderie zu Nanzeg besicht hunn, staark begeeschtert. Den 2. September 1929 ass déi éischt Braderie am Kader vun der Schueberfouer an der Stad iwwer d'Bühn gaangen. Déi aner gréisser Geschäftsuertschaften sinn net hanner dem Bësch bliwwen.

Haut huet all gréisser Geschäftsuertschaft zu Lëtzebuerg all Joer seng Braderie, net nëmmen am Minett, mä och anerwäerts, wéi Dikrech, Ettelbréck a Miersch, fir nëmmen dës dräi Uertschaften ze nennen. Zu Diddeleng an zu Esch-Uelzecht profitéieren d'Geschäfter dovun, fir bei der Journée française, um franséischen Nationalfeierdag, e grousse Stroosseverkaf am Joer weider z'organiséieren.

Braderien zu Lëtzebuerg[änneren | Quelltext änneren]

  • Dikrecher Braderie
  • Escher Braderie
  • Ettelbrécker Braderie
  • Diddelenger Braderie
  • Mierscher Braderie
  • Munnerefer Braderie
  • Péitenger Braderie
  • Stater Braderie

Literatur[änneren | Quelltext änneren]

Kuckt och[änneren | Quelltext änneren]

Referenzen[änneren | Quelltext änneren]

  1. cf. Jules Klensch an der Nummer 18/1929 vun der Luxemburger Illustrierte.