Arborloo

Vu Wikipedia
Wiesselen op: Navigatioun, sichen
Eng Arborloo op Haiti

Eng Arborloo ass eng einfach an ekologesch Toilett, déi een an Entwécklungslänner fënnt. Si besteet aus engem Lach, dat an de Buedem gegruewen ass an dat mat enger Plack oder engem Briet zougedeckt ass, an aus engem Opbau als Siichtschutz. Duerch e Lach an der Plack oder am Briet falen d'Exkrementer an d'Lach, a wann et voll ass gëtt e jonke Bam dra geplanzt.

Dës Zort Toilett gouf an den 1990er Joren am Zimbabwe erfonnt an huet sech schnell an de ländleche Regiounen an anere waarme Länner verbreet, virun allem am Süden an am Oste vun Afrika an an der Karibik.

Den Numm Arborloo kënnt vun "arbor", dem laténgesche Wuert fir Bam, a "loo", dem englesche Wuert fir Toilett, eng Bamtoilett deemno.

Geschicht a Verbreedung[änneren | Quelltext änneren]

D'Arborloo huet scho virun hirer formeller Erfindung existéiert: an Ostafrika war et de Brauch, e Bam an eng voll Latrin ze planzen, mä oft konnt deen net richteg vun den Nutrimenter am Buedem profitéieren, well d'Lach meeschtens ze déif war.[1] An den 1980er Joren huet den Instituto Nacional de Pesquisas da Amazônia, de brasilianeschen Institut fir Fuerschung am Amazonas-Reebësch, mat sougenannte Fossas migratórias experimentéiert.[2] Dëst waren Toiletten ouni déif Lächer a mat engem transportabelen Opbau, am Stil vun enger Drosëtz. E Bam gouf tëscht e puer Lächer geplanzt, fir datt d'Beem richteg vun den Nierstoffer kënne profitéieren. Trotzdeem gëtt d'Erfindung, oder zumindest d'Formalisatioun vun der Arborloo, dem Peter Morgan zougeschriwwen, deen och schonn aner Zorten Toiletten erfonnt huet. Enn vun den 1990er Joren ass dat Konzept am Zimbabwe opgetaucht, wou den ekologeschen Assainissement mat deenen einfache Latrinnen, déi do scho verbreet waren, verbonne ginn ass.

D'Einfachheet, den niddrege Präis an déi sanitär a wirtschaftlech Virdeeler vun där Toilett hunn dozou bäigedroen, datt si vun Netregierungsorganisatiounen och an aneren afrikanesche Länner agefouert ginn ass.

Fir d'Arborlooe weider ze verbreeden an der lokaler Populatioun d'Zweifel ze huelen, gi Reklammscampagne gemaach an Demonstratiounsmodeller benotzt, mä och op d'mëndlech Iwwerdroe vun de Virdeeler gëtt gesat.[3]

Et gëtt geschat, datt et Ufanks 2008 an Ethiopien 15.000, am Malawi 14.000, am Zimbabwe 2.000 an am Mosambik 1.000 där Toilettë gouf. Hir Käschte léien tëscht 5 an 20 $. Och an anere Länner gëtt mam Konzept experimentéiert, wéi am Kenia oder op Haiti.[4]

Fonctionnement[änneren | Quelltext änneren]

Eng Arborloo ass eng vun deenen einfachsten Toiletten déi et gëtt, dacks sou guer nach méi einfach a méi bëlleg wéi e sougennante "Plumpsklo". Si besteet aus engem Lach mat enger klenger Déift, bei deem d'Säiten heiansdo geschützt sinn an op deem eng Plack oder e breet Briet oder en Dill läit, an engem Siichtschutz. Virun der éischter Benotzung gëtt de Buedem vum Lach mat Blieder ausgeluecht, an duerno gëtt no all Utilisatioun e bëssen organescht Material (Buedem, Äschen, Blieder...) dragehäit, fir d'Formatioun vu Kompost ze fërderen. Äschen a Buedem hu nach den anere Virdeel, datt si schlechte Geroch an d'Presenz vu Mécke reduzéieren.

Wann d'Lach bal voll ass, gëtt d'Plattform mam Siichtschutz einfach op en anert Lach geréckelt, während dat bal vollt Lach opgefëllt gëtt an dann e Bam, waméiglech e Friichtebam, drageplanzt gëtt fir vun deem natierlechen Dünger kënnen ze profitéieren. Dëst gëtt all Kéier widderholl, wann d'Lach voll ass. Deemno wéi d'Klima ass muss de Bam am Ufank oder géint Enn vun der Reensaison geplanzt gi fir vum beschtméigleche Kompost kënnen ze profitéieren. D'Nährstoffer am Buedem droen zum Bam sengem Wuestum bäi a seng Wuerzele festegen de Buedem; gläichzäiteg liwwert hie Friichten an Holz. Dofir ass Arborloo fir aarm a ländlech Géigende konzipéiert ginn.

D'sanitär and d'ëmweltlech Problemer ginn als ganz kleng ugesinn. Engersäits ass d'Lach (75 cm bis 1,5 m) net déif genuch fir d'Grondwaasser ze verschmotzen, anerersäits kënnt de Mënsch net a Kontakt mat den Exkrementer, well de Kompost net méi muss verschafft ginn (net wéi zum Beispill bei enger Kompost-Toilett). Den Zousaz vun organeschem Material a vu Buedem dréit zu enger gudder Zersetzung vu Krankheetserreeger während dem Kompostéiere bäi.

D'Arborloo ongeféier annerhalleft Joer no der Benotzung : am éischte Lach (lénks) wiisst e Bam dee scho Friichten dréit; e jonke Bam wiisst am zweete Lach; en drëtt Lach gëtt nach benotzt an e véiert ass grad am Gaang gegruewen ze ginn an de Siichtschutz gëtt dropgesat soubal dat drëtt Lach voll ass.

Konstruktioun[änneren | Quelltext änneren]

Siicht an eng Arborloo mat enger transportabler Bëtongsplack, engem Sëtz aus Holz a Maueren aus Stréi.

Fir eng Arborloo ze baue muss ee genuch Plaz hunn, well een am Kader vun enger normaler Benotzung duerch eng Famill ongeféier all sechs Méint en neit Lach gruewe muss.

A sengem Buch Toilets that make compost: Low-cost, sanitary toilets that produce valuable compost for crops in an African context huet de Peter Morgan gutt beschriwwen, wéi een sou eng Toilett baut. Et gëtt verschidde Methoden, déi sech de lokale Praktiken upassen.

De Bau vun enger Arborloo hänkt vun der Aart vum Buedem an der gewënschter Qualitéit of. Wann de Buedem fest genuch ass, mussen d'Mauere vum Lach net cuveléiert (stabiliséiert) ginn: et geet duer, e klengt Lach ze gruewen an d'Briet oder d'Plattform dropzeleeën. Wann de Buedem awer net fest ass, dann existéiert de Risiko, datt d'Lach a sech zesummefält an eng minimal Befestegung ass also néideg. De Cuvelage ka mat engem virpreparéierte Bëtonsrank gemaach ginn, dee während dem Aushiewen an d'Lach gesat gëtt. Wann de Buedem e bësse méi fest ass, geet heiansdo och eng Verkleedung mat Zillen oder Steng a Speis duer. Dës Verkleedung muss net méi déif si wéi 20 bis 30 cm, well just deen ieweschten Deel vum Lach stabiliséiert muss ginn.

D'Lach huet normalerweis kleng Dimensiounen, fir d'Gruewen méi einfach ze maachen an d'Käschte kleng ze halen: si entspriechen normalerweis de Wuerzele vum Bam, deen herno geplanzt gëtt. Am geleefegste si ronn Lächer (déi si méi einfach fir ze gruewen) mat engem Duerchmiesser vun ongeféier 80 cm an enger Déift vu 70 bis 1,5 m (meeschtens tëscht 1 an 1,2 m). De Volume vum Lach läit sou tëscht 300 a 700 Liter, wat enger Benotzungszäit vu 4 bis 9 Méint bei enger duerchschnëttlecher Famill entsprécht. De Buedem vum Lach gëtt net verkleet fir d'Duerchsickere vum Urin z'erlaben. Nëmmen e puer Blieder sollen op de Buedem geluecht ginn, fir de Kompostéierungsprozess un d'Goen ze bréngen.

Iwwer dat Lach leet een dann eng Plack oder en Dill, zum Beispill en Dill aus Bëtong oder eng Platform aus Holz. Bei enger Dill aus Bëtong gëtt et zwou Méiglechkeeten: entweder mécht een se aus Stolbëtong, mat engem Duerschnëtt vun ongeféier 10 cm, oder et mécht een eng kuppelformeg, méi dënn (5 cm Dëckt an der Mëtt) an aus normalem Bëtong, well een da mat Kompressioun schafft. Bei deenen zwee gëtt d'Lach an d'Mëtt gebuert. Jee no de lokale Praktiken ass dann nach e Sëtz aus Bëtong oder Holz drop, oder Erhéigungen fir d'Féiss drop ze stellen an eng Hupppositioun anzehuelen. Eng Plattform aus Holz ass méi ëppes Rudimentäres. Si kann aus verschiddene Brieder bestoe mat engem einfache Lach oder engem Sëtz. De Buedem, deen duerch d'Gruewe vum Lach iwwreg ass, ka benotzt gi fir d'Dill ze befestegen an d'Oflafe vum Reewaasser an d'Lach ze verhënneren. Fir Kanner ass et och méiglech, méi kleng Dillen ze bauen.

Den Opbau ass néideg fir dem Benotzer seng Intimitéit ze garantéieren a fir hie géint Wand, Reen a Sonn ze schützen. Sou een Opbau variéiert enorm an de verschiddene Länner, engersäits well se vun de lokale Bauweisen ofhänken, anerersäits well den Arborloo haaptsächlech an aarmen, ländleche Regioune verbreet ass an do mat deem gebaut gëtt, wat disponibel ass. Sou fënnt ee Strukturen aus Stréi, Bambus, Räissäck, Blech, an heiansdo souguer kleng Kabanne mat enger Dier. Bannendra fënnt een déi gebräichlech Hygiènesutensilien. Well den Opbau regelméisseg soll geréckelt ginn, muss e liicht sinn.

Benotzung[änneren | Quelltext änneren]

E liichten Opbau, deen einfach ze réckelen ass.

Wei bei all aner Komposttoilett soll een organescht Material dobäi maachen fir de Prozess vum Kompostéieren ze verbesseren an méi séier ze maachen. No all "grousser" Benotzung (bei enger "klenger" Benotzung ass dat net neideg) soll een e Grapp Buedem an, wann méiglech, Äschen drop geheie fir d'Exkrementer ze verdecken an de Geroch ze limitéieren. Periodesch kann een och Blieder drop leeën ; et soll een awer keen aneren Offall drop geheien. Wann den Inhalt bis ongeféier 15 cm ënner dem ieweschten Deel vum Lach ukomm ass, gëtt den Opbau op en neit, eidelt Lach geréckelt, während dat anert mat Buedem opgefëllt gëtt.

Den Inhalt vum Lach kann op verschidden Aart a Weis benotzt ginn. Et ass méiglech, de Bam am Ufank vun der Reesaison ze planzen, da muss een en och net méi nätzen. Et kann een de Bam och direkt nom opfëllen planzen, mä da muss een en eventuell nach nätzen. Déi lescht Method ass, ze waarde bis den Inhalt komplett kompostéiert ass, also ongeféier sechs Méint bis ee Joer duerno, an en dann ausgruewen an um Feld verdeelen.

D'Zort Bam déi ee planzt, hänkt vun der gewënschter Benotzung of, dacks handelt et sech ëm Beem déi Friichte fit z'iessen droen, fir domat eng weider Liewensmëttel- oder Akommensquell ze hunn. De Peter Morgan huet gutt Erfarunge gemaach mat Bananebeem, Avocadosbeem, Guavebeem, Papayasbeem a Mangosbeem gemaach. Aner erfollegräich getesten Zorte sinn Eukalyptusbeem, Zitrusplanzen an Maracujasbeem, déi ganz séier wuessen. E jonke Bam (manner wéi ee Meter héich) gëtt geplanzt an virun Déiere geschützt bis e grouss ass. Et ass méiglech, an heiansdo souguer wënschenswäert, fir nach anere Kompost dobäizemaachen. Beem, déi Stéckstoff gären hu wéi zum Beispill Banannebeem, kënne vun engem wëchentlechen Apport u verdënntem Urin profitéieren. An Ethiopien fënnt een heiansdo Kürbisen a Plaz vu Beem, am Zimbabwe éischter Tomaten. An deenen zwee Fäll ass den Impakt vum Kompost am Lach däitlech siichtbar.

D'Arborloo gouf haaptsächlech an tropeschen bis tempreéierte Klimaë geteste, mat e puer Versich a semi-ariden Zonen an Ethiopien. Well d'Friichtebeem vill Waasser brauchen, kann ee se net an ze vill dréchene Géigende planzen. Trotzdeem si si duerch d'Presenz vum Kompost manner fuerdernd géintiwwer vun der Buedemqualitéit, a souguer a ganz sandege Biedem kann e Bam wuessen.

Wann de Benotzer de Kompost gären aus dem Lach hëlt (generell fir d'Lach nach eng Kéier kennen ze benotzen a sou Plaz ze spueren), da muss hien ee Joer waarden, bis de Kompost sech forméiert huet a keng Krankheetserreger méi dra sinn. Well d'Liewensdauer vun engem Lach am Schnëtt sechs Méint laang ass, brauch een dann am Ganzen dräi Lächer. Ee méi einfache System, deen op datselwecht eraus kënnt, ass d'fossa alterna, déi nëmmen zwee Lächer benotzt.

Verglach mat aneren Toiletten an Impakt op d'Ëmwelt[änneren | Quelltext änneren]

Verglach mat anere Toilettentyper
D'Arborloo am Verglach mat... Virdeeler Nodeeler
... konventionellen Latrinen
  • D'Grondwaasser gëtt manner verschmotzt duerch déi niddreg Déift vum Lach (maximal 1,5 m, géint e puer Meter).
  • Integréierten ekologesche System, deen et erlaabt, d'Nährstoffer erëm ze benotzen, d'Verschmotzung reduzéiert, de Buedem verbessert an eng Naturalwirtschaft erméiglecht.
  • Si fält manner séier a sech zesummen, well se net déif ass.
  • Si setzt eng Ëmstellung vun der Gewunnecht viraus, well d'Toilett all sechs Méint muss geréckelt ginn.
  • Si brauch vill Plaz: véier Lächer no zwee Joer, etc. Si ass dofir nëmmen u ländlech Regiounen adaptéiert.
  • Si setzt de Wëllen an d'Nofro fir Naturalwirtschaft viraus.
  • Si erlaabt et net, Waasser ze benotze fir sech propper ze maachen, an et däerf soss näischt an d'Toilett geheit ginn (Offall, Steng), fir datt de Kompostéierungsprozess efficace bleift.
... aneren ecologeschen Toiletten
  • Et muss ee flësseg a fest Exkrementer net trennen, dofir brauch een och déi Schläich dofir net (ecologesch Toiletten trennen den Urin, fir de Kompost ze verbesseren; e gëtt benotzt fir ze nätzen oder fléisst an d'Ofwaasser).
  • Sanitär Risike si kleng, well ee keen direkte Kontakt mat den Exkrementer huet (mat aneren ecologeschen Toilette gëtt de Kompost per Hand um Feld verdeelt).
  • Si ass déi bëllegst ecologesch Toilett.
  • D'Verschmotzung vum Grondwaasser bleift méiglech, wann dëst héicht steet, am Géigesaz zu deenen anere mat waasserdichte Lächer.
  • De Kompostage ass manner efficace wéi bei engem gehëtzten, gelëften a reguléierte System, wat méi e schlechte Geroch kann als Konsequenz hunn.
  • Si kann net ëmmer an d'Wunneng integréiert ginn.
... verbesserten Toiletten (mat Waasser, etc.)
  • Integréierten ekologesche System, deen et erlaabt, d'Nutrimenter nei ze benotzen, a sou d'Verschmotzung limitéiert, de Buedem verbessert a Liewensmëttel liwwert.
  • Ganz niddrege Präis.
  • Si gëtt als "rustikal" an als Toilett fir aarm Leit ugesinn. Si ass geduecht fir aarm, ländlech Regioune wou d'Leit nach vill an d'Natur maachen, wa se keng Toilett hunn.
  • Si erlaabt et net, Waasser ze benotze fir sech ze botzen.

Den Ëmweltimpakt vun der Arborloo limitéiert sech net op eng méi kleng Verschmotzung; duerch d'Formatioun vun engem räichhaltege Buedem erlaabt si de Beem, déif Wuerzelen z'entwéckelen, an ass dofir besonnesch un dréche Biedem adaptéiert. Ugeräicherte Buedem hält d'Reewaasser méi laang, an d'Wuerzelen limitéieren d'Bullislawine.

Fir d'Benotzer gëtt et vill Virdeeler: Réckgang vun de Krankheeten, déi fäkal-oral (Duerchfall, Typhus, Cholera, Hepatitis) oder e iwwer e Parasit iwwerdroe (Filariose) ginn, eng méi grouss Intimitéit an Dignitéit, méi Sécherheet fir Fraen, méi Komfort a souguer e méi héije soziale Status. D'Ufankskäschte si kleng (manner wéi 20 $) an d'Käschte fir dat ganzt z'ënnerhalen si minim (just d'Reparéiere vum Siichtschutz, a vläicht d'Ausgruewe vum Lach all sechs Méint).

De geplanzte Bam ass generell e Friichtebam, deen et aarme Famillen erméiglecht, hir Ernährung ze verbesseren. Duerch d'Arborloo kënne si gratis Dünger benotzen (si musse keen chemesche Dünger méi kafen). D'Famille kënnen d'Friichten och duerno verkafen, a sou en Akomme generéieren. Fir all dës Ursaache gëtt probéiert, d'Arborloo weider ze verbreeden, fir domat d'Existenzmëttel vun de viséierte Communautéite ze verbesseren an den Aarmut op laang Siicht ze reduzéieren.

Quellen[änneren | Quelltext änneren]

  • Remarque: Dësen Artikel ass komplett oder deelweis vum Artikel "Arborloo", an der Versioun vum 30.September 2011, aus der franséischsproocheger Wikipedia iwwersat ginn.

Bibliographie[änneren | Quelltext änneren]

Um Spaweck[änneren | Quelltext änneren]

Commons: Arborloo – Biller, Videoen oder Audiodateien

Referenzen[änneren | Quelltext änneren]

  1. Mayling Simpson-Hebert: Low-cost Arborloo offers Ethiopians health and agriculture benefits, an "Waterlines", Vol. 26, N°2, Oktober 2007
  2. Duncan Mara: Fossas migratórias (17. Abrëll 2008; gekuckt den 22. Juni 2012)
  3. Lessons from a low cost ecological approach to sanitation in Malawi, Field Note, Juni 2007
  4. Sanitation and Hygiene in Kenya: Lessons on What Drives Demand for Improved Sanitation, Field Note, Juni 2004