Louis vu Lëtzebuerg

Vu Wikipedia
Zur Navigation springen Zur Suche springen
De Prënz Louis mat senger Fra, der Tessy Antony, an hirem Bouf Gabriel, 2006 bei hirer Hochzäit

De Louis Xavier Marie Guillaume vu Lëtzebuerg, gebuer den 3. August 1986 an der Maternité Grande-Duchesse Charlotte zu Lëtzebuerg, ass Prënz vun Nassau a Prënz vu Lëtzebuerg. Hien ass den drëtte Jong vum Groussherzog Henri a senger Fra, der Groussherzogin Maria Teresa.

Liewen[änneren | Quelltext änneren]

Den 29. September 2006 ass de Prënz Louis zu Lëtzebuerg mat der Tessy Antony (* 28. Oktober 1985) bestuet ginn. Déi kierchlech Feier war zu Gilsdref.

De Groussherzog Henri huet der Fra vum Prënz Louis um Nationalfeierdag 2009 den Titel Prinzessin vu Lëtzebuerg ginn.

D'Prënzekoppel huet zwee Kanner, de Prënz Gabriel (* 12. Mäerz 2006) an de Prënz Noah (* 21. September 2007).

De Prënz Louis ass zanter 2004 Titulaire vum Ordre du Lion d'or de la Maison de Nassau.

Ufank Februar 2016 huet hien ëffentlech iwwer seng Schwieregkeeten als Dyslexiker geschwat[1]

Den 18. Januar 2017 huet den Haff ugekënnegt datt de Prënz Louis géif vun der Tessy Antony gescheet ginn[2].

De 17. Februar 2017 goufen de Louis an d'Tessy zu London an enger Blëtzscheedung (quickie divorce) gescheet, ouni selwer present gewiescht ze sinn[3]

Prënz Gabriel[änneren | Quelltext änneren]

De Prënz Gabriel Michael Louis Ronny de Nassau ass den 12. Mäerz 2006 an der Clinic des Grangettes zu Genf op d'Welt komm. Hien ass dat éischt Enkelkand vum Groussherzog Henri an der Groussherzogin Maria Teresa. Dem Jong säi Pätter ass säi Monni Michel Antony an d'Giedel ass seng Tatta, d'Prinzessin Alexandra.

Prënz Noah[änneren | Quelltext änneren]

De Prënz Noah Guillaume de Nassau ass den 21. September 2007 an der Maternité Grande-Duchesse Charlotte zu Lëtzebuerg op d'Welt komm. Hien ass dat zweet Enkelkand vum Groussherzog Henri an der Groussherzogin Maria Teresa. Hie gouf grad wéi säi Brudder Gabriel an der Kierch vu Gilsdref gedeeft. Dem Jong säi Pätter ass säi Monni, den Ierfgroussherzog Guillaume an d'Giedel ass seng Tatta d'Patty Antony.

Studien[änneren | Quelltext änneren]

No der Primärschoul zu Luerenzweiler huet e seng Sekundarstudien zu Lëtzebuerg an der American School of Luxembourg gemaach. Duerno ass hien an de Collège Alpin International Beau Soleil zu Villars-sur-Ollon an der Schwäiz gaangen, wou hien 2005 och säin Ofschlossdiplom krut.

Duerno huet en e Stage vun engem Joer bei der Croix-Rouge zu Genf gemaach.

Nodeem en zwee Joer an den USA war, woubäi en eng Formatioun an Aeronautics and Aeronautical Management gemaach huet, duerno huet hie mat senger Famill an England gewunnt, wou de Prënz an d'Prinzessin op d'Universitéit gaange sinn fir sech weider auszebilden. De Louis huet zu London Kommunikatioun studéiert an 2014 säin Ofschloss gemaach. Hie schafft am Beräich sozial Verantwortung vun Entreprisen[4].

Patronagen[änneren | Quelltext änneren]

De Prënz Louis mécht de Patronage vun der Fédération luxembourgeoise de tennis de table (zanter 2004), der Fédération des arts martiaux (zanter 2010) an der Fédération aéronautique luxembourgeoise, (2011).

Um Spaweck[änneren | Quelltext änneren]

Commons: Louis vu Lëtzebuerg – Biller, Videoen oder Audiodateien

Referenzen[Quelltext änneren]

  1. Exklusivinterview mam Prënz Louis iwwer seng Dyslexie op wort.lu
  2. De groussherzoglechen Haff deelt mat, dat de Prënz Louis an d'Prinzessin Tessy sech wëlle scheede loossen. op RTL.lu
  3. D'Noriicht vun der Scheedung op dailymail Als Grond vun der Scheedung gëtt "unreasonable behaviour" genannt.
  4. Ukënnegung vun der Scheedung op wort.lu an am LW, 19.1.2017, S.63