Tréischterin am Leed

Déi restauréiert Statu vun der Tréischterin

Tréischterin am Leed ass den Titel ënnert deem d'Muttergottes haaptsächlech zu Lëtzebuerg veréiert gëtt a steet fir dat Laténgescht consolatrix afflictorum (consolatrice des affligés op Franséisch an Trösterin der Betrübten op Däitsch).

Dësen Titel ass ee vu villen aneren, mat deem Maria an der Lauretanescher Litanei (benannt nom italienesche Pilgeruert Loreto) gelueft gëtt.

D'Veréierung vu Maria als 'Tréischterin am Leed' geet zeréck op de Jesuitepater Jacques Brocquart, deen den 8. Dezember 1624, um Fest vun der Onbefleckter Emfängnis, eng Muttergottesstatu mat Kand (déi zënter 1796 definitiv an der Kathedral vu Lëtzebuerg steet) an enger Pressessioun mat Studente virun d'Festungsmauere matgeholl huet. Doraus huet sech d'Muttergottesoktav entwéckelt.

D'Statu ass "vollplastesch", aus polychroméiertem Lannenholz, an ass 73 cm héich. Si gehéiert zum Typ vu majestéitesch wierkenden Immaculata-Duerstellungen. D'Maria steet als "apokalyptesch" Fra mat engem Fouss op der Moundséchel (Offb 12,1 EU). Nom spéitmëttelalterleche spueneschem Brauch gesäit de Pilger se awer just als Gewandfigur. (Dat deemolegt Lëtzebuerg huet zu de Spueneschen Nidderlanden gehéiert.)

D'Bild vun der Tréischterin (e Kofferstach vun der Tréischterin vu Lëtzebuerg) gëtt zënter 1642 zu Kevelaer veréiert.

Déi lëtzebuergesch Restaurateurin Muriel Prieur huet d'Statu vun der Tréischterin 2008 a ronn 500 Aarbechtsstonnen an hiren ursprénglechen Zoustand bruecht.

Duerstellungen

De Fändelssproch vum Kofferstach vum I.M. Kaeyll (wahrscheinlech 1697 zu Lëtzebuerg gebuer) seet dëst:

Consolatrix - afflictorum - ora - pro - nobis Tot tibi sunt dotes virgo quot sidera caelo Gloriosae Virgini Mariae Matri Iesu Consolatrix afflictorum Patronae civitatis et patriae Luxemburgensis in sacello Soc. Iesu Miraculis clarae

Tréischterin - am Leed - biet - fir - eis Du hues esou vill Qualitéiten wéi den Himmel Stären Héich geluefte Jongfra Maria Mamm vum Jesus Tréischterin am Leed Patréinesch vun der Stad an dem Lëtzebuerger Land an der Jesuitekapell, duerch Wonner berühmt

Zënter 1875 hu Lëtzebuerger, déi no Amerika ausgewandert sinn, eng Kopie vun der Tréischterin an der Basilica and National Shrine of Our Lady of Consolation zu Carey am Ohio opgestallt, fir dohinner ze pilgeren.

D'Tréischterin vun den a Schlesien Ëmgesidelten, 1942-1945, steet haut an der Krypta vun der Kathedral. Fir déi ëmgesidelt Famillje war déi 59 cm grouss, aus Holz geschnëtzte Kopie vun der Tréischterin, Trouscht an Erënnerung un d'Heemecht.

Tréischterin am Leed ass och d'Patréinesch vun der belscher Uertschaft Chevetogne a vun der Parkierch zesumme mam Hellege Maurice.

D'Gnodebild vu Kevelaer mat der Lëtzebuerger Consolatrix

Kofferstach, Kaeyll Ufank 18. Jh.

D'Tréischterin mat engem Gewand virun der Restauréierung

D'Tréischterin 2009

Tréischterin vun den Ëmgesidelten, 1942-1945

Madonna, 1953, vum Auguste Trémont, Säiteportal vun der Kathedral

Um Spaweck

• (de) Die Verehrung der Trösterin der Betrübten
• (lb) Den Titel "Consolatrix Afflictorum": theologesch, historesch, sozial
• (de) Consolatrix-Statue wieder im Originalzustand
• (de) Sonja Kmec, Verehrung Unserer Lieben Frau von Luxemburg
• (de) Giovanni Andriani, Wunderheilungen Unserer Lieben Frau von Luxemburg im 17. Jh.
• (de) (lb) Mariendevotion zwischen Tradition und Moderne

Duerstellunge vun der Tréischterin:

• Andachtsbild vu 1640 (Archives départementales de la Somme)
• Our Lady of Consolation, Carey, Ohio, USA
• Consolatrix op Timberen (1945)
• Consolatrix Plastik (Will Lofy, Villeroy&Boch, 1983)
• Consolatrix Statu virun der Restauratioun