Allianz vun Humanisten, Atheisten an Agnostiker

Vu Wikipedia
Op d'Navigatioun wiesselen Op d'Siche wiesselen
De Logo vun A.H.A. Lëtzebuerg a.s.b.l.

D'Allianz vun Humanisten, Atheisten an Agnostiker Lëtzebuerg a.s.b.l., ofgekierzt A.H.A. Lëtzebuerg, ass eng Associatioun ouni Gewënnzweck mat Sëtz an der Stad Lëtzebuerg, déi den 13. Mee 2010 gegrënnt gouf.[1] Wéi den Numm et scho seet, wëll dës Allianz sech fir d'Intressie vun den Humanisten, Atheisten, Agnostiker an aneren net gleewege Mënschen zu Lëtzebuerg asetzen.

Am Kader vum Virtrag Glaubst Du noch oder denkst Du schon? vum däitsche Philosoph Michael Schmidt-Salomon gouf d'A.H.A. de 6. November 2010 an der Abtei Neimënster an der Stad presentéiert[2].

De Veräi schafft enk mat der däitscher Giordano-Bruno-Stiftung, vun där hien och d'Grondsätz iwwerholl huet, zesummen.

Campagne 'Net reliéis? Stéi dozou!' op Gefierer vum ëffentlechen Transportwiesen am Joer 2011

Haapttheme vun A.H.A. Lëtzebuerg[änneren | Quelltext änneren]

Wëssen amplaz Glawen[änneren | Quelltext änneren]

Reliounen hunn traditionell Problemer mat wëssenschaftlechen Entdeckungen, déi net an hiert dogmatescht Weltbild passen. D'kathoulesch Kierch huet z. B. 360 Joer gebraucht fir unzeerkennen, datt d'Äerd sech ronderëm d'Sonn dréint. D'Evolutioun gëtt bis haut vun der Kierch nach ëmmer net vollstänneg unerkannt.

Duerch hire gesellschaftlechen Afloss bremst d'Kierch wichteg wëssenschaftlech Fuerschungen, besonnesch am Beräich vun der Medezin (Stamzellefuerschung, Gehirfuerschung).

A.H.A. Lëtzebuerg setzt sech dofir an, datt d'Politik sech punkto wëssenschaftlech Fuerschung a Wëssensvermëttlung net vun der kathoulescher Kierch beaflosse léisst.

Zitat aus dem Depliant vun A.H.A. Lëtzebuerg:

"Ich bin ein Gegner der Religion. Sie lehrt uns, damit zufrieden zu sein, dass wir die Welt nicht verstehen."
Richard Dawkins, Evolutiounsbiolog.[3]

Ethik fräi vun Dogmen[änneren | Quelltext änneren]

Wäerter sinn e Garant vum Zesummenhalt vun all Gesellschaft. Doru scheiteren d'Weltreliounen, well si wéinst Dogmen a Seeërcher d'Gesellschafte splécken.

En naturwëssenschaftlecht Weltbild, dat déi mënschlech Besoinen an hirer Wierklechkeet erfaasst, dat op enger universeller humanistescher Ethik baséiert, fir datt all d'Mënschen Usproch op Eegebestëmmung a Gerechtegkeet kënnen hunn.

Zitat aus dem Depliant vun A.H.A. Lëtzebuerg:

"Mit oder ohne Religion werden sich gute Menschen gut verhalten und schlechte Menschen werden Böses tun. Aber der Beitrag der Religion in der Geschichte war, es guten Menschen zu erlauben, Böses zu tun.".
Steven Weinberg, Physiker a Kosmolog.

Fester ouni Relioun a Kierch[änneren | Quelltext änneren]

Fester an Zeremonië kënne fräi vu reliéisen Zwäng sou op eng liewensfrou an ergräifend Aart a Weis gefeiert ginn. Wichteg Uläss wéi Gebuert, Bestietnes an Doud kënnen no perséinleche Virléiften a Besoine gefeiert ginn. Dacks entscheede sech Leit fir eng kierchlech Zeremonie net aus reliéise Grënn, mä duerch sozialen Drock vu Famill an Ëmfeld, oder aus Angscht, sech net wéi anerer ze behuelen.

A.H.A. Lëtzebuerg setzt sech dofir an:

  • d'Kanner no hirer Gebuert net direkt an e reliéisen Tirang ze stiechen, mä et hinne selwer z'iwwerloossen, wa si erwuesse sinn, hir Choixen ze treffen;
  • et engem z'erliichteren, ouni kierchlech Zeremonien ze feieren, wann ee souwisou net gleeweg ass;
  • et engem z'erliichteren, vun der Famill an der Gesellschaft Respekt ze fuerdere géintiwwer der eegener Entscheedung, ouni Relioun ze feieren.

Trennung vu Kierch a Staat[änneren | Quelltext änneren]

A.H.A. Lëtzebuerg setzt sech fir de Prinzip vun der Glawensfräiheet an, dofir fuerdert de Veräin e laizistesche Staat, deen net nëmmen d'Reliounsfräiheet unerkennt, mä och d'Fräiheet vu Relioun.

D'Lëtzebuerger Konstitutioun gesäit am Artikel 20 vir, datt keen dozou gezwonge ka ginn, eng bestëmmt Relioun z'ënnerstëtzen, och net finanziell. Déi kathoulesch Kierch zu Lëtzebuerg gëtt awer zu engem bedeitenden Deel vun alle Steierzueler finanzéiert.

D'kathoulesch Kierch zu Lëtzebuerg hëlt reegelméisseg zu gesellschaftlech relevanten Theme Stellung, souwuel an der Politik wéi och an de Schoulen, z. B. beim Gesetz iwwer d'Stierfhëllef. D'Kierch hëlt a wichtege moraleschen a gesondheetleche Froe bedenklech Positiounen an: Diskriminéierung vun de Fraen an Opzwénge vum Zölibat an den eegene Reien, Diskriminéiere vun Homosexualitéit, Ofleenung vun der Verhiddung, asw.

D'A.H.A. Lëtzebuerg fuerdert eng konsequent Trennung vu Kierch a Staat an eng Trennung vu Kierch an ëffentlechem Schoulwiesen duerch déi generell Aféierung vun eenheetlechen an ideologesch neutralen Ethikcoursen amplaz déi haiteg Opdeelung tëscht kathoulesche Reliounscoursen a Moral-/Sozialcoursen.

Zitat aus dem Depliant vun A.H.A. Lëtzebuerg:

« Dans chaque village un homme tend un flambeau, l'instituteur, et un autre souffle dessus, le curé ».
Victor Hugo.

A.H.A. Lëtzebuerg an der Kritik[änneren | Quelltext änneren]

De Professer Norbert Campagna vun der Universitéit Lëtzebuerg bewäert déi senger Meenung no ondifferenzéiert Slogane vun der Allianz an der Zäitschrëft forum als bal scho skandaléis onkritesch. Duerch den Ausschloss vun allem reliéisen Diskurs aus der Ëffentlechkeet géif d'Mënschsinn ëmmer méi op en eendimensionalt hedonistescht Dosi reduzéiert ginn; dat chrëschtlecht Welt- a Mënschebild hätt wesentlech Elementer zum moderne Mënscherechtsdiskurs bäigedroen.[4]

D'A.H.A.-Memberen Manuel Huss an Taina Bofferding publizéieren doropshin eng Géigenduerstellung an der Folgenummer vun därselwechter Zäitschrëft, déi dem Prof. Campagna virgehäit, sech just mat de Slogane vun der A.H.A. Lëtzebuerg ze beschäftegen ouni de Kontext an déi begleedend Erklärungen ze beuechten.[5]

Literatur[änneren | Quelltext änneren]

Kuckt och[änneren | Quelltext änneren]

Um Spaweck[änneren | Quelltext änneren]

Commons: Atheismus – Biller, Videoen oder Audiodateien

Referenzen[Quelltext änneren]

  1. Cf. d'Grënnungsstatuten am Mémorial C Nr. 1403: 67327-67330 vum 8. Juli 2010.
  2. Cf. AHA! Auftakt der Humanisten in Luxemburg Humanistischer Pressedienst, Nr. 10619, 11. November 2010.
  3. Cf. Dawkins 2007 an der Literatur.
  4. Norbert Campagna, AHA - Überlegungen zum Programm einer neuen Vereinigung. forum Nr. 302 (Dez. 2010): 4-6.
  5. Manuel Huss an Taina Bofferding: Replique op d'Kritik vum Norbert Campagna. forum Nr. 303 (Jan. 2011): 49-50.