Bosscha-Observatoire

Bosscha-Observatoire
	Bosscha-Observatoire (2003)
Typ	astronomeschen Observatoire
Opgaangen	1923
Websäit	https://bosscha.itb.ac.id
Instrumenter
Teleskopen	Zeiss-Duebelrefrakter, Schmidt-Teleskop, Bamberg-Refrakter, Cassegrain GOTO, Unitron-Refrakter
Geographesch Situatioun
Land	Indonesien
Regioun/Gemeng	West-Bandung
Koordinaten	6°49'28,416"S, 107°36'57,240"O
Héicht	1.310 m

De Bosscha-Observatoire ass den eelsten Observatoire an Indonesien. E gouf 1923 gegrënnt a gehéiert zum Institut Teknologi Bandung. E steet op enger Héicht vun 1.310 m an der Stad Lembang am Weste vun der Insel Java.

Teleskopen

Den Observatoire huet fënnef gréisser Teleskopen:

Zeiss-Duebelrefrakter

Mat deem Teleskop ginn Duebelstären, besonnesch duerch Photometrie, Moundkrater, d'Planéite Mars, Saturn a Jupiter souwéi Koméiten ënnersicht resp. observéiert. Den Teleskop huet zwou Objektivlënse mat 60 cm Duerchmiesser an enger Brennwäit vun 10,7 Meter.

Teleskop (Bild virun 1941)
Zeiss-Duebelrefrakter vun 1923 vu Jena
Zeiss-Duebelrefrakter

Schmidt-Teleskop

Mat dem Schmidt-Teleskop (Spëtznumm: Bima Sakti) gi Galaxien, Stärespektren, Asteroiden a Supernovaen ënnersicht. Den Haaptspigel huet en Duerchmiesser vun 71 cm, d'Schmidt-Plack 50 cm, d'Brennwäit ass 2,5 m.

Bamberg-Refrakter

Dëse Refrakter mat 37 cm Duerchmiesser an enger Brennwäit vu 7 m gëtt besonnesch bei Ënnersich vun der visueller Hellegkeet, der Distanzmiessung vu Stären, Photometrie vu Stären déi sech verdecken a bei der Sonnenobservatioun gebraucht. Den Teleskop ass mat engem Photometer ekipéiert.

Cassegrain GOTO

De Cassegrain-Spigelteleskop ass e Geschenk vun der japanescher Regierung an huet eng computergesteiert Ausriichtung (GOTO). Un den Teleskop kann e Spektrometer ugeschloss ginn.

Unitron-Refrakter

Mat dësem Teleskop, deen e Lënsenduerchmiesser vun 13 cm huet, gi Mounddäischterten, Sonnendäischterten a Sonneflecken observéiert.

Direkteren

00	De Contenu vun dësem Kapitel oder dësem Artikel ass net vollstänneg oder net méi aktuell. Hëlleft wgl. mat, en ze komplettéieren oder nees op de leschte Stand ze bréngen.