Fernand Mertens

Dëse Museksartikel ass eréischt just eng Skizz. Wann Dir méi iwwer dëst Theema wësst, sidd Dir häerzlech invitéiert, aus dëse puer Sätz e richtegen Artikel ze schreiwen. Wann Dir beim Schreiwen Hëllef braucht, da luusst bis an d'FAQ eran.

Fernand Mertens
Gebuer	29. Februar 1872 Léiwen
Gestuerwen	9. Juli 1957 Beetebuerg
Nationalitéit	Belsch
Aktivitéit	Dirigent, Musikolog, Komponist

De Fernand Mertens, gebuer den 29. Februar 1872 zu Louvain, a gestuerwen den 9. Juli 1957 zu Beetebuerg, war e belsche Komponist. Hien huet awer souzesoe säi ganzt Liewen zu Lëtzebuerg verbruecht an do geschafft. Dofir gëtt hien och zu de grousse lëtzebuergesche Komponiste gezielt.

Studium a Liewen

De Fernand Mertens ass den 29. Februar 1872 als Jong vun engem einfache Fabrécksaarbechter op d'Welt komm. Hie war dat jéngst vun 10 Kanner. De Fernand Mertens ass zu Louvain an d'Primärschoul an duerno och do an de Kolléisch gaangen. Well en ëmmer Freed un der Musek hat, wéi de Musekskritiker Léon Blasen eis erzielt, ass hie scho fréi an de Conservatoire zu Louvain gaangen an huet mat 12 Joer den éischte Präis am Solfège a mat 14 Joer den 1. Präis an der Braatsch kritt. Duerno huet hie sech an d'Normalschoul ageschriwwen. Hie war der Schoul awer geschwë midd an ass net Schoulmeeschter ginn, wéi seng Eltere wollten, mä huet sech eng Plaz gesicht. De jonke Fernand ass an déi belsch Arméi gaangen a koum als élève-cornet an de Musekscorps. 1897 ass hien dunn an d'Militärmusek zu Lëtzebuerg agetratt. Vun do u war säi Wee gemaach:

• 1901: Dirigent vun der Diddelenger Stadmusek
• 1903: Dirigent vun der Hollerecher Musek
• 1909: Concours fir d'Dirigenteplaz vun der Militärmusek, aus deem hien als éischten ervirgaangen ass, a krut doropshin dat selwecht Joer seng Ernennung an där Funktioun
• 1918 gouf de Fernand Mertens zum Haff-Kapellmeeschter ernannt
• Hie war och Professer am Museksconservatoire bis zu senger Altersgrenz am Joer 1937

Nodeem e sech 1937 op Beetebuerg zeréckgezunn hat, ass hien do 1957 gestuerwen a gouf den 11. Juli 1957 um Nikloskierfecht begruewen.

Zu Beetebuerg dréit eng Strooss säin Numm.

Wierk

Eng grouss Varietéit zeechent dem Fernand Mertens säi Wierk aus. Déi follgend Lëscht ass net komplett. Nëmmen déi bekanntst Kompositioune sinn opgeféiert:

Märsch

De Fernand Mertens ass virun allem bekannt als Komponist vun de Märsch:

• Grande-Duchesse Charlotte Marsch (de bekanntsten)
• Prince Jean Marsch
• Princesse Josephine-Charlotte Marsch
• Lëtzebuerger Zaldotemarsch
• Ettelbruck, Porte des Ardennes
• Salut à Differdange
• Lëtzebuerg Rousestad

Sonnerien

• Sonnerie nationale Lauschteren

Operetten

• D'Wonner vu Spéisbech (No engem Text vum Batty Weber) (Eng Operett, déi e groussen Erfolleg hat an och am Ausland ënner dem Titel: Le Miracle de la Toison d'Or opgeféiert ginn ass)
• Am Pyjama; Musek: Fernand Mertens, Text: Nikla
• E Mammenhierz; Musek: Fernand Mertens, Text: Willy Dumont
• Eng Schwéiermamm; Musek: Mertens/Merzig, Text: Edouard Joris,

Aner Kompositiounen

• eng Partie Potpourriën an Arrangementer wéi d'Dicksiana oder de Scholdschäin an Spuenescht Blutt
• Eng Mass zu Éiere vun der Muttergottes vu Lëtzebuerg, déi 1950-51 fir gemëschte Chouer, Uergel an Orchester bestëmmt war.
• Ouverture mat dem Titel Mëllerdall.
• Scènes luxembourgeoises a fënnef Deeler.
• E puer Lidder wéi:
  • Abrëll,
  • Meereenchen,
  • Op der Heed,
  • Et reent, et reent
• Zwee Muttergotteslidder:
  • Ons léif Fra vu Lëtzebuerg an
  • Mutter der Liebe
• Zwee Lidder aus dem Exil (Texter vum Lambert Schaus):
  • Le'wen hellegen Zinnikléschen
  • Chrëschtlidd

Auszeechnungen

• Officier de l'ordre de la couronne de chêne (Promotioun 1952)
• Chevalier avec Couronne vum Ordre de Nassau „Pour le mérite civil et militaire“
• Chevalier de l'Ordre de Léopold
• Chevalier de l'Ordre de la Couronne
• Chevalier de l'Ordre de Léopold II
• Médaille en Or de l'Ordre Pontifical „Bene Merenti“
• Médaille de Ire classe de la Reconnaissance Nationale (Médaille du Roi Albert)
• Médaille Commémorative du règne de Léopold II
• Palmes d'Officier de l'lnstruction Publique
• Croix de Service avec Couronne de l'lnsigne en Argent de la Société des „Arts, Sciences et Lettres“

Bibliographie

• Blasen, Léon: Lëtzebuerger Komponisten, Erausgin 1988 vun der „Lëtzebuerger Stad-Musek

Kuckt och

• Lëtzebuergesch Operetten

Um Spaweck

• Offiziell Säit vun der Lëtzebuerger Militärmusek
• De Fernand Mertens am Musikerlexikon

Dirigente vun der Lëtzebuerger Militärmusek

Franz Hoebich - Philippe Decker - Gustave Kahnt - Edmond Patzké - Fernand Mertens - Pol Albrecht - Albert Thorn - Norbert Hoffmann - Pierre Nimax - André Reichling - Jean-Claude Braun