Seminairesbierg

Seminairesbierg
Seminairesbierg
	De Seminairesbierg, vum Fetschenhaff aus gesinn
Land	Lëtzebuerg
Kanton	Lëtzebuerg
Héicht	315 m
Koordinaten	49°36'57,53"N, 6°8'41,64"O

De Seminairesbierg (oder Seminärsbierg), och alt Wurthsbierg^[1] ass eng Kopp um Weimeschhaffer Plateau an der Stad Lëtzebuerg. Ronderëm leien de Milliounewee mam Malakoff Kierfecht, de Seminaire an d'Neiduerfer Strooss. E Fielsvirsprong um südwestleche Wupp vum Plateau mécht d'Grenz mam Quartier Clausen.

Ursprong vum Numm

Wurthsbierg

Ufank der 1870er Jore gouf een Deel vum Terrain vum Stater Bierger Dr Louis Wurth kaaft, deen do e Summerhaus baue gelooss huet. Dowéinst gouf d'Kopp am Volleksmond „Wurthsgaart“ oder „Wurthsbierg“ genannt.

Seminairesbierg

De „Grousse Seminaire“ ass eréischt an de Joren 1970 - 1973 um Weimeschhaff gebaut ginn, den Numm „Seminairesbierg“ fir d'Kopp bestoung awer scho virdrun. 1875 huet Wurth de Baarmhäerzege Bridder den Terrain verkaaft a wéinst dem neie Besëtzer war d'Kopp iwwer d'Joerzéngten e beléift Ausfluchszil vun de Seminaristen déi aus dem ale Seminaire aus der Stad (bis 1930) oder vum Lampertsbierg (1930 - Uganks der 1970er Joren) dohi koumen.

Geschicht

Ier den Numm „Wurthsbierg“ oder „Seminairesbierg“ opkoum, war d'Kopp mat de Flouernimm „Op der Héicht“ an „Am Déieregaart“^[2] bekannt. Absënns déi lescht genannt Bezeechnung weist op den alen Déieregaart vun de Grofe vu Lëtzebuerg hin, deen de Péiter Ernest vu Mansfeld gepacht a mat an den Ëmrank vu sengem Schlass La Fontaine abezunn hat.

Nodeems d'Festung no 1867 geschleeft gouf, huet de Jean Michel Foehr, den éischte Präses vum Seminaire, Deeler vum Areal etappeweis opkaaft an se dem Seminaire 1885 vermaacht. Um fréieren Terrain vum Wurth haten d'Baarmhäerzeg Bridder e Park ugeluecht. Mat enger zweeter Schenkung 1911 ass dem Seminaire säin Ëmrank nach méi grouss ginn.

Tëscht 1970 an 1973 gouf dunn am Park den neie Priisterseminaire „Centre Jean XXIII“ gebaut. Iwwerreschter vum Reduit vum Fort Parkhöhe goufen 1970 beim Bau vum Seminaire erëmfonnt. Vun der rietser Flank bestinn nach d'Grondmaueren, déi de Plateau zur Neiduerfer Säit hi stäipen a fräileeën.

Jousefsstatu

1888 gouf um hënneschten Deel vum Plateau eng Statu vum hellege Jousef ageweit, déi vum [[Däitschland|däitsch]-hollännesche Sculpteur Jean Theodore Stracké entworf gi war. Se steet op engem neogotesche Sockel vum Dikrecher Architekt Jean-Pierre Knepper.

Flora

De Botaniker François Tinant (1803 - 1853) hat sengerzäit verschidde Raritéiten um Seminairesbierg entdeckt an de Jemmy Koltz (1909 - 1989) huet déi botanesche Spezialitéiten detailléiert opgelëscht^[3].

Um Spaweck

Commons: Seminairesbierg – Biller, Videoen oder Audiodateien

Michel Schmitt, Der "Seminärsbierg" auf Weimershof, Ons stad 46/1994 (S. 20-21)

Referenzen an Notten

↑ J.-J. Kariger, Florule de la capitale: Le Wurthsberg de Clausen et quelques hauteurs analogues. Bulletin de la Société des naturalistes luxembourgeois : Jg. 51, nº 62 (1957). Gekuckt de(n) 01.05.2021.
↑ op ale Kaarten als „Auf der Hoecht“ an „Im Thiergarten” agedroen
↑ Jean-Pierre Koltz, GUIDE DU BOTANISTE dans ses recherches des plantes rares ou peu répandues du Grand-Duché de Luxembourg,. a-z.lu. Recueil des mémoires et des travaux publiés par la Société de Botanique du Grand-Duché de Luxembourg (01.01.1874). Gekuckt de(n) 01.05.2021.

[1] J.-J. Kariger, Florule de la capitale: Le Wurthsberg de Clausen et quelques hauteurs analogues. Bulletin de la Société des naturalistes luxembourgeois : Jg. 51, nº 62 (1957). Gekuckt de(n) 01.05.2021.

[2] Kaarten als „Auf der Hoecht“ an „Im Thiergarten” agedroen

[3] Jean-Pierre Koltz, GUIDE DU BOTANISTE dans ses recherches des plantes rares ou peu répandues du Grand-Duché de Luxembourg,. a-z.lu. Recueil des mémoires et des travaux publiés par la Société de Botanique du Grand-Duché de Luxembourg (01.01.1874). Gekuckt de(n) 01.05.2021.

[1]

[2]

[3]