Wuelmereng

Vu Wikipedia
Volmerange-les-Mines
lb: Wuelmereng
Land Frankräich
Regioun Grand Est
Departement Moselle
Arrondissement Thionville
Kanton Yutz
Postcode 57330
Gemengecode 57731
Koordinaten 49° 26’ 35’’ N
      06° 04’ 52’’ O
Fläch  1.292 ha
Bevëlkerung  2.237 (2017)

Volmerange-les-Mines (Wuelmereng op Lëtzebuergesch) ass eng franséisch Uertschaft a Gemeng an der Regioun Grand Est am Departement Moselle.

Am Uert, deen zum Arrondissement Thionville gehéiert, liewen 2237 Awunner (Stand 2017). Wuelmereng läit eng 5 km südlech vun Diddeleng, op der Grenz mat Lëtzebuerg.

Geschicht[änneren | Quelltext änneren]

Gemengenhaus
D'Kierch vu Wuelmereng

Urspronk vum Numm[änneren | Quelltext änneren]

Den Numm vu Wuelmereng däerft vun engem gallo-réimeschen Här mam Numm Volcmarus kommen. De Suffix "eng" deit de Besëtz un. Fir d'éischt gouf d'Uertschaft am Joer 980 als Valembregam villam in pago Moslenci ernimmt, wat och d'Interpretatiounen opkomme gelooss huet, et kéim entweeder vun engem Walah(ber) oder et wier den Zesummeschloss vum laténgesche Wuert "Vallum" fir Dall an dem keltesche Wuert "Briga" fir Festung.

Dono fënnt een et nach als Garmerange, Warmerange a Woilmeringen, ier et da joerhonnertelaang ënner dem Numm Volmerange-lès-Oeutrange bekannt war. 1920 kritt d'Duerf den offiziellen Numm Volmerange-les-Mines.

Mëttelalter bis Neizäit[änneren | Quelltext änneren]

D'Duerf huet dem Klouschter Saint-Denis vu Paräis gehéiert, bis datt et 1531 un de Bernhard vun Eltz, Här vun Ëtteng verkaaft gouf. Duerch den Traité vun de Pyrenäen 1659 goung dat lëtzebuergescht Lehen u Frankräich, d'Famill Eltz blouf awer weider lokalen Här, bis datt duerch Bestietnes 1749 d'Famill Hunolstein iwwerholl huet. Mat der franséischer Revolutioun 1789 goung d'Feudalherrschaft op en Enn. Duerch den Traité vu Frankfurt vun 1871 huet d'Duerf op eemol als Deel vun Elsass-Loutrengen zum Däitsche Räich gehéiert, bis datt et mam Traité vu Versailles 1918 nees zeréck u Frankräich goung.

Wirtschaftsentwécklung[änneren | Quelltext änneren]

Wuelmereng war e klengt Bauerenduerf, bis datt d'Minett am Buedem fonnt gouf an d'Awunnerzuel stënterlech an d'Luucht geschoss ass. Wärend engem ganze Joerhonnert (vun 1874 bis 1973) waren zwou Grouwe fir den Opschwonk verantwortlech: Laangebierg a Kraemer.

Hautdesdaags bestëmmt virun allem de Klenghandel d'Ekonomie vu Wuelmereng, nieft der Gesellschaft Poeckes vun Téiteng, déi hir Steekaul op Wuelmerenger Gebitt huet.

Bevëlkerungsentwécklung[änneren | Quelltext änneren]

Joer       Awunner
1885 822
1910 1.386
1931 1.644
1936 1.519
Joer       Awunner
1968 1.511
1975 1.607
1982 1.767
1990 1.755
Joer       Awunner
1999 1.724
2007 2.064
2012 2.054
2017 2.237

Ëffentleche Verkéier[änneren | Quelltext änneren]

D'Gare Wuelmereng ass eng CFL - Kappgare, déi, vu Lëtzebuerg aus gesinn, hanner der Gare Diddeleng-Schmelz läit an zu der Linn 6b vum CFL gehéiert.

Kuckeswäertes[änneren | Quelltext änneren]

En Ëmwee wäert ass fir Frënn vum Schéisssport den Eurostand vu Wuelmereng, wou een op 10, 25, 50, 100 an 200 m schéisse kann, a wou et och eng mobil Scheif op 50 m gëtt.

Kuckt och[Quelltext änneren]

Um Spaweck[änneren | Quelltext änneren]

Commons: Wuelmereng – Biller, Videoen oder Audiodateien