Eng nei Zäit

Eng nei Zäit

Film
Produktiounsland	Lëtzebuerg Belsch
Produktiounsjoer	2015
Première	2015
Originalsprooch	Lëtzebuergesch
Ekipp
Regie	Christophe Wagner
Dréibuch	Christophe Wagner Viviane Thill
Fotografie	Jako Raybaut
Musek	André Dziezuk
Schnëtt	Jean-Luc Simon
Produzent	Claude Waringo
Produktiouns- gesellschaft	Samsa Film Artémis Productions
Schauspiller
Luc Schiltz als Jules Eugénie Anselin als Mathilde Fabienne Hollwege als Marie André Jung als Hubertus Jules Werner als Armand Christian Kmiotek als Theis Raoul Schlechter als Claude Elsa Rauchs als Léonie Jean-Paul Raths als Hary Frédéric Frenay als Krier Jean-Paul Maes als Papp Luc Feit als Glesener Max Gindorff als Dollinɡ Philippe Thelen als Mett Pierre Bodry als Koener Michel Tereba als Sûretésagent Brigitte Urhausen als Infirmière Pascal Granicz als Metzler Angel Marcel Heintz als Paschtouer Lommel Al Ginter als Josef Raus Raoul Albonetti als Emile Krieps Marc Limpach als Untersuchungsriichter Claude Fritz als Michel Schmitz Vincent Peiffer als Norbert Raiko Küster als Obersturmbannführer Valentine Fagny als Nelly Thierry Mousset als Georges Kaufmann Marc Beideler als Gendarmerie-Offizéier Konstantin Rommelfangen als Gendarme Germain Wagner als Avocat général Dan Schmit als Offizéier bei der Exécutioun Clod Thommes als Giichtchen Roland Gelhausen als Riichter
Filmportal - Filmer no Joren - Film no Länner - Film no Genre

Eng nei Zäit (och Demain, après la Guerre) ass e Spillfilm vum lëtzebuergesche Regisseur Christophe Wagner, deen op engem Dréibuch baséiert, dat d'Viviane Thill an hien zesumme geschriwwen hunn. En hat seng Avant-première de 7. Oktober 2015 um Festival International du Film Francophone zu Namouer an den 9. Oktober am Utopolis, a koum de 14. Oktober 2015 an d'Kinoen.

Gedréint gouf e vum 4. August bis Mëtt September 2014, sou wéi vum 12. bis den 20. Januar 2015.

De franséischen Titel vum Film ass Demain, après la guerre an deen engleschen Tomorrow After the War.

Ëm wat geet et am Film?

Februar 1945: De Jules Ternes kënnt aus dem franséische Maquis, wuer e virun der Zwangsrekrutéierung geflücht war, nees heem a säin Éisleker Duerf a wëll säin onbeschwéiert Liewe vu virdrun nees weiderféieren. Mee d'Duerf ass duerch d'Ardennenoffensiv uerg zerstéiert, säi Papp nach net aus der Ëmsiidlung zeréck, säi fréiere Patron gouf deportéiert, seng Schwëster Mathilde ass ewell mam Armand, engem lokale Resistenz-Chef, zesummen, an d'Léonie, seng Frëndin, freit zanter kuerzem mat engem aneren, nämlech dem Jong vum Piechter vum Wandhaff...

Soss

De Film huet déi sozial a politesch Spannungen an der direkter Nokrichszäit zu Lëtzebuerg als Hannergrond, an thematiséiert, an enger fiktionaliséierter Form, de fënneffache Muerd um Wandhaff (am Film "Waldhaff" genannt), deen am Juli 1945 geschitt ass. Weider historesch Evenementer, déi agefloss sinn, sinn déi zu Munneref agespaart Nazi-Cheffen an héich däitsch Offizéier, de Gommand-Prozess, d'Epuratiouns-Prozesser, déi montéiert Virwërf vun engem Offizéiesch-Putsch, an allgemeng de Muechtkampf tëscht de Virkrichs-Parteien a -Politiker op där enger an de Resistenzler op där anerer.

D'(Hanner-)Grondthema vum Film ass, wat no engem kollektiven traumateschen Erliefnes, wéi dem Zweete Weltkrich, méi wichteg ass: d'Wouerecht opzedecken oder d'Gewiicht op de gesellschaftlechen Zesummenhalt ze setzen, quitt datt bewosst Saachen, déi geschitt sinn, "ënnert den Teppech gekiert ginn". Dëst kënnt am Film senger Tagline zum Ausdrock: "Kann e Land seng Zukunft op Ligen opbauen?".

De Budget louch bei 3,8 Milliounen Euro, an de Film gouf, eng Première fir e Film op Lëtzebuergesch, vun enger belscher Firma koproduzéiert. De Lëtzebuerger Filmfong huet d'Produktioun vum Film mat 2.608.660 Euro ënnerstëtzt.

Et gëtt eng op franséisch synchroniséiert Versioun vum Film, fir datt en a frankophone Länner ka gewise ginn.

Wéi de Film erauskoum, goufe verschidden Evenementer am Zesummenhang dermat organiséiert: An der Abtei Neimënster war am November 2015 eng Ausstellung iwwer d'Kulissen an d'technesch Effekter vum Film ze gesinn an am CNA gouf et den 23.-24. Oktober, an Zesummenaarbecht mat der Uni Lëtzebuerg, eng Table-ronde a Konferenzen zum Theema "Continuités et ruptures" iwwer d'1940er Joren a verschiddenen europäesche Länner.

Am Dezember 2016 koum d'DVD eraus; de Film ass och online op Streaming-Platforme wéi vod.lu oder iTunes ze lounen, resp. ze kafen.

Accueil a Filmpräisser

De Film gouf vu 15.228 Leit zu Lëtzebuerg am Kino gesinn.

2016 gouf Eng nei Zäit mam Lëtzebuerger Filmpräis fir dee beschte Fiktiounsfilm ausgezeechent. Och de Kameramann Jako Raybaut an den Haaptacteur Luc Schiltz kruten dee Präis fir hir Aarbecht an dësem Film.

Am Dezember 2016 huet de Christophe Wagner fir de Film de Regiepräis (Trophée francophone de la réalisation) bei de 4èmes Trophées francophones du cinéma gewonnen. Donieft war de Luc Schiltz och fir de selwechte Präis an der Kategorie "Beschte Schauspiller an enger Haaptroll" (Trophée Francophone de l'interprétation masculine) nominéiert.

Dréiplazen

De Film gouf bal nëmmen an natierlechen Decore gedréint, dorënner:

• 
  D'Schleefmillen, Filmdekor vun Ternessen hirem Haff.
• 
  D'Gare am Fonds-de-Gras, steet am Film fir déi vun Ettelbréck.
• 
  Ronderëm d'Abtei Neimënster, deemools e Prisong.
• 
  Eng al Schräinerei zu Veianen, mat den Haiser ronderëm e weidere Set vum Film.
• 
  Kräizkapell a Kierfecht zu Esch-Sauer.
• 
  Bannenhaff vum Iechternacher Kolléisch als e Sanatorium zu Munneref.

Kuckt och

• Lëscht vu lëtzebuergesche Filmer

Um Spaweck

• Eng nei Zäit op samsa.lu
• engneizait.lu, D'offiziell Websäit vum Film, mat ë. a. Hannergrondmaterial iwwer d'Zäit vun deemools, Pressedossier, Dossier fir d'Schoulen, Fotoen...
• Dossier zum Film op wort.lu.
• Reportage a Kritik op 100komma7.lu, 15. 10.2015.
• E Making-of (19 min.).

Radiosemissioune mat laangen Interviewe mam Regisseur Chr. Wagner iwwer de Film:

• "De Freides-Invité vum 9. Oktober: Christophe Wagner." op rtl.lu, 09.10.2015, 13:37:37.
• "The Kamikaze Show" op ara.lu, 18.10.2015 (mat Extraite aus der B.O. vum Film).