Lycée Hubert-Clément

Vu Wikipedia
Op d'Navigatioun wiesselen Op d'Siche wiesselen
Stub W.svg Dësen Artikel ass eréischt just eng Skizz. Wann Dir méi iwwer dëst Thema wësst, sidd Dir häerzlech invitéiert, aus dëse puer Sätz e richtegen Artikel ze schreiwen. Wann Dir beim Schreiwen Hëllef braucht, da luusst bis an d'FAQ eran.
De Lycée Hubert-Clément vun der Jean-Pierre Michels-Strooss aus gesinn (2008).
Den ale Meedercherslycée, am Schoulbierg.

De Lycée Hubert-Clément ass eng Secondaire-Schoul zu Esch-Uelzecht. Et ass dee fréiere Meedercherslycée, deen 1971 nom Hubert Clément (1889-1953) genannt gouf.

Historique[änneren | Quelltext änneren]

Duerch Gesetz vum 17. Juni 1911 gouf d'Basis geschaf fir en ëffentlechen Enseignement moyen fir Meedercher an der Stad Lëtzebuerg an zu Esch-Uelzecht mat Hëllef vun deene respektive Gemengen anzeféieren.

De 5. August 1911, huet de Gemengerot vun der Stad Esch-Uelzecht decidéiert fir der Regierung provisoresch dofir Schoulsäll mam noutwendege Mobiliar zur Verfügung ze stellen. En Arrêté ministériel vum 20. September 1911 huet festgeluecht, fir d'Diere vum Lycée den 2. Oktober 1911 opzemaachen. Op deen Datum war och d'Erëffnung vum Lycée de jeunes filles à Luxembourg duerch Arrêté ministériel vum 26. Juli 1911 fixéiert. Als éischt Gebai huet dat vun der fréierer Primärschoul am Schoulbierg gedéngt.

De 24. Abrëll 1955 gouf dat neit Gebai vum Lycée Hubert-Clément, deemools nach Lycée de jeunes filles d'Esch-sur-Alzette genannt, ageweit, an dat a Presenz vun der Groussherzogin Charlotte, dem Prënz Felix, de Regierungsmemberen an dem Escher Buergermeeschter Antoine Krier. Deen éischten Direkter an dësem Gebai war den Albert Goedert.

Den Dag drop souzen 312 Meedercher a 14 Klassen. Wéi am Laf vun der Zäit d'Klasseneffektiver bis op 50 eropgaange waren, goufen am September 1965 véier Klassesäll am Schoulhaff an zwéi "Pavillonen" ageriicht.

Nodeem d'Gesetz vum 10. Mee 1968 et erlaabt huet, "Mixteklassen" opzestellen, hunn am Schouljoer 1970/71 déi éischt 30 Jongen do d'Bänke gedréckt.

Den 12. November 1971 gouf duerch e groussherzoglecht Reglement aus dem "Lycée de jeunes filles d'Esch-sur-Alzette" de "Lycée Hubert Clement"[1], nom Escher Politiker (Deputéierten, Buergermeeschter) a Journalist (Direkter vum Tageblatt) Hubert Clément.

Renovéierungsaarbechten[änneren | Quelltext änneren]

Vu Summer 2012 bis Januar 2018 gouf de Lycée Hubert-Clément komplett renovéiert, an en neien Turnsall gouf bäigebaut.

Virdru gouf et Pläng, e komplett neit Gebai op der Industriefriche vun Terre Rouge ze bauen. Dës sinn awer nees verworf ginn, well et ze vill komplizéiert an deier gewiescht wier, den Terrain ze preparéieren, datt iwwerhaapt drop gebaut kéint ginn, an och, well et keng Pläng gouf, wat duerno mam ale Gebai ze maache wier. Dofir gouf decidéiert, dat aalt Gebai schréckweis ze renovéieren; en Deel vun de Klasse misst dann zäitweileg an déi al Handwierkerschoul, op der Victor-Hugo-Plaz (déi zanter dem Bau vum neie Lycée technique vun Esch eidel steet a renovéiert gouf), auswäichen. Geplangt war ufanks, dass d'Aarbechte bis 2016 daueren a 46,5 Milliounen Euro kaschte sollten.[2]

Direkteren[änneren | Quelltext änneren]

Literatur[änneren | Quelltext änneren]

  • Lycée Hubert-Clément: LHCEntenaire. 1911-2011. [Esch-sur-Alzette]: 2012. 400 S. + DVD.
  • Graas, Gusti, 2012. Vom Escher Mädchenlyzeum zum Lyzeum Hubert Clément: Historische Entwicklung einer Sekundarschule im Süden des Landes. Lëtzebuerger Journal 2012, Nr. 175 (11. September), S. 17. [1] (Archived by WebCite®)

Kuckt och[änneren | Quelltext änneren]

Um Spaweck[änneren | Quelltext änneren]

Commons: Lycée Hubert-Clément – Biller, Videoen oder Audiodateien

Referenzen an Notten[Quelltext änneren]

  1. ↑ Eréischt 2012 gouf aus dem Clement offiziell Clément: Interview mam Rapporteur Marc Spautz.
  2. ↑ "Esch/Alzette: Hubert-Clément, les plans dévoilés." lequotidien.lu, 2012-05-16 09:38:00.
Vun „https://lb.wikipedia.org/w/index.php?title=Lycée_Hubert-Clément&oldid=2153337“